زيالىلاردىڭ قانشا ءتۇرى بار؟
جوق، ءارقايسىمىز ءوز-ءوزىمىزدى زيالى دەپ بەلگىلەپ الامىز با؟
يتاليانىڭ عۇلاماسى انتوني گرامشي زيالىلاردىڭ ەكى ءتۇرى بولادى دەيدى.
ءبىرى، قاراپايىم حالىق ورتاسىنان شىققان ەستيار، كوزى اشىق ازاماتتار.
ەكىنشىسى، ساۋاتتى، ءبىلىمدار، كاسىبي مامان دەڭگەيىنە كوتەرىلگەندەر.
شىن مانىندە زيالى (ينتەلليگەنت) بولۋ ءۇشىن ۋاقىتتى بوسقا ولتىرمەۋ كەرەك. زيالىلىق الدىمەن كوپ ءبىلۋ، سونان سوڭ سونىسىن ومىرگە پايدالانا ءبىلۋ، پايدالىلىق، تاربيلەلىلىك، ۇلگىلىلىك. ادالدىق، ارلىلىلىق.
ۋاقىتى ەلتەڭ-سەلتەڭمەن وتكەن ادام زيالى بولا الا ما؟ اسەم گالستۋك، قىمبات كوزىلدىرىك نەمەسە سۇلۋ تاياق زيالى ەتىپ كورسەتەتىن كەز ءوتتى. تاۋىستى اسەم ەتىپ تۇرعان قۇيرىعى. ەگەر قۇيرىعىن كەسىپ تاستاساڭ، جاي قۇستان ايىرماشىلىعى شامالى.
حالىقتىڭ حالىق بولماعى الدىڭعى قاتاردا جول كورسەتىپ جۇرگەن ازاماتتارىندا. ەلدى ءوسىرۋ دە، ءوشىرۋ دە سولاردىڭ قولىندا. ەگەر ولار جەتىلگەن، وزىق ويلى بولماسا، وندا قيىن. قاراپايىم حالىق بارىنە سەنەدى، قايدا جەتەلەسەڭ، سوندا ەرەدى.
دوستايەۆسكي زيالىلاردى ەكىگە بولگەن: تابانى جەرگە ءتيىپ تۇرعاندار مەن تيمەي تۇرعاندار، - دەپ. تابانى جەرگە ءتيىپ تۇرعان دەگەنىمىز ۇلتتىق ءدىلى بار، ۇلتتىق رۋحقا ارقاي سۇيەيتىن جانە ونى كوتەرۋگە تىرىساتىن، ۇلتىنا ۇستىن بولۋعا ءارقاشان دايىن ازاماتتار، ال تابانى جەرگە تيمەي تۇرعاندار - ول ۇلتتىڭ جاقسىسى بولسا پايدالانىپ، جامانى تۇزەتۋگە اتسالىسپايتىندار، ءوز ۇلتىنىڭ باسىنان اسىرا قاراعىسى كەلەتىندەر.
ولار بيىك مانساپتى شەنەۋنىك تە، پايداسىز ينتەللەكتۋال دا، زامانا باعىتىن ءتۇسىنىپ العان «پريسپوسوبلەنەتس» تە بولۋى مۇمكىن. ەتىكشىنىڭ پيعىلىنداعى ۋازىرلەر مەن دەپۋتاتتار دا كەزدەسەدى. ءوز سوزدەرىندە ەڭ قىمبات نارسە حالىق دەپ، حالىقتى الداپ قانا قويعىسى كەلەتىن، شىن مانىندە حالىققا ەمەس قارا باسىنا عانا قىزمەت ەتەتىندەردىڭ ءبارىن سولارعا جاتقىزۋعا بولادى.
ماسەلەنى «ءومىر سۇرۋگە زيانىڭدى تيگىزبە» دەپ قويعان دۇرىس. ول: رۇقسات، ءومىر ءسۇر، ىزدەن، قيمىلدا، ويلان، پايداڭدى تيگىز دەگەنى. زيالى دەپ وسى تالاپقا جاۋاپ بەرەتىندەردى ايتامىز.
«بۇ دۇنيە باسقا ءبىر الەمگە وتكەل ەكەنى كۇمانسىز. وتكەل ءۇستى - كىسىگە سىن، وندا شىن مانىندە باقىتتى ادام جوق. ادامدار زيالى جانە قاراڭعى بولىپ ەكىگە بولىنەدى. ماقسات قاراڭعىلاردىڭ سانىن ازايتۋ. ءبىزدىڭ عىلىم ۇيرەتۋ دەپ اسپاندايتىنىمىز دا سول» - دەيدى ۆيكتور گيۋگو.
اۆتور: اكەجان داكەن
massaget
