كەل سانايىق ساناماق
كەل سانايىق ساناماق،
ساۋساقتاردى دارالاپ.
باس بارماعىم العاشقى -
بالاڭ ۇيرەك جالعاسى.
ورتان تەرەك - كەزەكشى،
شىلدىر شۇمەك - كومەكشى.
شىناشاعىم - بالاپان،
بارىنە ورتاق الاقان.
شىلدىر شۇمەك - مەن،
تيتتەي بوبەك - سەن.
ءبىر ۇيدە ءبىز نەشەۋمىز؟
ءبىر ۇيدە ءبىز - بەسەۋمىز.
* * *
ال، ساناڭدار، ساناڭدار
ال، ساناڭدار، ساناڭدار،
بىزدە قانشا ادام بار؟
الدىمدا:
اتام، اجەم بار،
الدىمدا:
اكەم، انام بار.
بىلمەسەڭدەر بىلىڭدەر،
تاعى ساۋساڭ بۇگىڭدەر.
الدىمدا:
اپكەم، كوكەم بار،
«امان ءجۇرسىن ءىنىم» بار.
ءوزىم بارمىن،
ءىنىم بار،
كىپ-كىشكەنتاي كۇنىم بار.
قانشا بولدىق ءبارىمىز،
قانشا بولدىق؟...
ءبىلىپ ال!
بىزدە قانشا مىسىق بار؟
بىزدە قانشا كۇشىك بار؟...
* * *
ءبىر دەگەنىم - بوز دالام
ءبىر دەگەنىم - بوز دالام،
ەكى دەگەن - ەر بابام.
ءۇش دەگەنىم - ءۇي-وردام،
ءتورت دەگەنىم - تاۋ-ورمان.
بەس - بالانىڭ بەسىگى،
التى - الاشتىڭ ەسىمى.
جەتى - جەردىڭ قاباتى،
سەگىز - ساۋدىڭ ساناسى.
توعىز دەسەم - توي بارام،
ون دەگەندە - ويلانام.
مۇنىڭ ءبارى بىزدە بار،
ون ءبىردى ءوزىڭ ىزدەپ ال.
* * *
امال ساناماقتار
الدىندا ءۇش بالاپان،
ارتىندا ءۇش بالاپان.
اق تاۋىق پەن بالاپان
ايتشى سانىن، بالاقان.
بۋىرشىن مەن اتان بار،
تايلاعىم مەن بوتام بار.
ءۇش ىنگەنگە يەمىن،
سانىن ايتشى تۇيەمنىڭ.
***
ءبىر دەگەنىم - بىلىك
ءبىر دەگەنىم - بىلىك،
قولىڭ ءجۇر ءىلىپ،
بىلىك - شالعى تۇتقاسى،
العانىڭ ءجون ءبىلىپ.
ەكى دەگەن ەستى،
ەل جايلاۋعا كوشتى.
سالقىن ەكەن جايلاۋ،
سالقىن سامال ەستى.
ءۇش دەگەنىڭ - ۇسكى،
ۇشىپ جەرگە ءتۇستى.
تىندىراتىن ءىستى،
ۇسكى نەتكەن كۇشتى.
ءتورت دەگەنىم - توسەك،
وت جاعامىن كوسەپ.
توسەك جاقسى، ويتكەنى
جايلى ورىنعا ەسەپ.
بەس دەگەنىم - بەسىك،
بوبەك جاتار ءوسىپ.
ۋاعىندا اناسى
شومىلدىرار شەشىپ.
التى دەگەن - ارشا،
ارشا وتىن جانسا.
مىڭتاپ قازان قايناتار،
جىكتەپ وتقا سالسا.
جەتى دەگەن - جەبە،
جەبە بۇزار كەبە.
جەبە-كەبە ءسوزى -
ەرتەگى ءسوز كونە.
سەگىز دەگەن - سەنىم،
بولاشاعىڭ سەنىڭ.
سەنى ازامات بولار دەپ،
سەنىپ وتىر ەلىڭ.
توعىز دەگەن - تورپاق،
بولما ءوزىڭ قورقاق.
ەڭبەك ەتسەڭ جارايدى،
كوپ ىسىنە ورتاق.
ون دەگەندە ويلاپ،
تاپقان ءسوزىم - ويماق.
جالعاستىرىپ تاعى دا،
ايتىڭدارشى جايلاپ.
ءبىر، بەتىڭ وتە كىر
ءبىر،
بەتىڭ وتە كىر.
ەكى،
بەيباسقا جەكى
ءۇش،
ۇمتىل العا ءتۇس.
ءتورت،
بەسكە وقۋ - سەرت.
بەس،
بەلەستەردەن جەلدەي ەس.
التى،
انتتى بۇزباۋ - اتا سالتى.
جەتى،
قويدىڭ سەمىز ەتى.
سەگىز،
قوزداسىن قوي ەگىز.
توعىز،
ارام ايۋان - دوڭىز.
ون،
تورقادان ارتىق تون.
* * *
ءبىر دەگەنىم - بەلىڭ
ءبىر دەگەنىم - بەلىڭ،
ەكى دەگەنىم- ەگىن،
ءۇش دەگەنىم - ۇكى،
ءتورت دەگەنىم - ءتول،
بەس دەگەنىم - بەكىرە،
التى دەگەنىم - ادام،
جەتى دەگەنىم - جەمىس،
سەگىز دەگەنىم - سەڭ،
توعىز دەگەنىم - توڭ،
ون دەگەنىم - وڭ،
ون ءبىر بولادى ودان سوڭ.
* * *
ب-دان باستالادى - بيە دە
1. بىردەن باستالادى - بيە دە،
2. ەكىدەن باستالادى - ەگىن دە،
3. ۇشتەن باستالادى - ۇلەك تە،
4. تورتتەن باستالادى - توبە دە،
5. بەستەن باستالادى - بەسىك تە،
6. التىدان باستالادى - اتان دا،
7. جەتىدەنن باستالادى - جەنت دە،
8. سەگىزدەن باستالادى - سەڭ دە،
9. توعىزدان باستالادى - تون دا،
10. وننان باستالادى - وقۋ دا،
ون ءبىر ويعا توقۋ دا.
* * *
ءبىر ۇيدە ون بالامىز
ءبىر ۇيدە ون بالامىز،
ءبىر-ءبىر جاستان ارامىز.
ءبىر جاستاعى - ءبىرجان
ەكىدەگىمىز - ەلجان
ۇشتەگىمىز - ۇسەن
تورتتەگىمىز - توكەن
بەستەگىمىز - بەكەن
التىداعىمىز - الپان
جەتىدەگىمىز - جەتەن
سەگىزدەگىمىز - سەكەن
توعىزداعىمىز - تويتان
ونداعىمىز - ويقان
جاستارىمىزدى قوسىڭىز،
قوسىندىسى قانشا وسىنىڭ؟
* * *
بىزدەر ساناي بىلەمىز
بىزدەر ساناي بىلەمىز،
بىلمەگەنگە كۇلەمىز.
بىرەۋ، ەكەۋ، ءۇش، ءتورت دەپ،
بەس، التى... دەپ جۇرەمىز.
* * *
ساندار سىرى
ءبىر - دەگەنىم بىرلىك،
بىرگە وينادىق، كۇلدىك.
ءبىر ۇيدەگى كوپ بالا،
ءبىر كولىككە مىندىك.
ەكى دەگەنىم - ەلىم،
اتامەكەن جەرىم.
ول - وزەن، كول، كەڭ دالا،
ول - تاۋلارىم مەنىڭ.
ءۇش دەگەنىڭ - ءۇي.
ءۇيسىز وڭباس كۇي.
ءۇي - تۋعان ەل بولشەگى،
سونى ەسكە ءتۇي.
ءتورت - اتاقتى ءتورت تۇلىك.
ءتورت تۇلىككە توقشىلىق.
جىلقى، سيىر، قوي، ەشكى،
ءوسىر ءبارىن كوپ قىلىپ.
بەس - قولىڭدا بەس ساۋساق،
ىسكە دايار تۇر سامساپ.
تاس قامالدى بۇزامىز،
جۇدىرىقتاي ءبىر بولساق.
التى - اساۋ ارعىماق،
مىنسەڭ شابار ارقىراپ.
قيالدايدى سوندايدى،
بايگە سۇيگىش اركىم-اق.
جەتى - تۋعان جەرىمىز،
ءبىز - تۋعان جەر ءتولىمىز.
ءجيى بارساق اۋىلعا،
تولا تۇسەر كەمىمىز.
سەگىز - دەگەن سالتانات،
ەل جينالار انتالاپ.
تاۋەلسىزدىك تويى بار،
سايىس قۇرار بار تالانت.
توعىز - تورعىن توعايىڭ،
باۋىر، تۋىس، اعايىن.
ۇستازدارىڭ، دوستارىڭ،
شاتتىق تولى ماڭايىڭ.
ون - وتانىڭ ارداقتى،
ول - قورعانىڭ سالماقتى.
سەنى اقىلدى بولار دەپ،
بار تىلەگىن ارناپتى.
* * *
ونعا دەيىن سانايىق!
قولعا قالام الايىن،
قانشا سان بار جازايىق.
قاراپ تۇرماي، سانداردى
قايتا-قايتا سانايىق.
1
ءبىزدىڭ ۇيدە ءبىر تاۋىق،
ءبىر جۇمىرتقا ءجۇر تاۋىپ.
ءبىر سيىر بار قورادا،
ءباتىش تاتەم ءجۇر ساۋىپ.
2
ەكى اياقپەن جۇرەمىن،
ەكى كوزبەن كورەمىن.
ەكى قولىم بار مەنىڭ،
ەكەۋ قۇلاق، بىلەمىن.
3
ۇيىمدە بار ءۇش قالام،
ۇشەۋىن دە ۇشتاعام.
ءۇش دوسىمدى سالدىم مەن،
ءۇش بالىققا ۇقساعان.
4
ءتورت دوڭگەلەك اربادا،
ءتورت اياق بار مالدا دا...
تاۋىسا الماي بيدايدى،
ءتورت تىشقان ءجۇر قامبادا.
5
«بەستىك» دەگەن باعانى،
باقىت كۇندە الادى.
ءبارى جاقسى كورەدى،
«بەسكە» وقىعان بالانى.
6
«الاقاي!» دەر كەلدى كۇن،
التىدامىن مەن بۇگىن.
التى جاسقا كەلمەكشى،
العى اپتادا ەندى كىم؟!
7
جەتى سانى كيەلى،
جۇرتتىڭ ءبارى بىلەدى.
جەتى جاسقا جەتكەندەر،
جىعىلماي-اق جۇرەدى.
8
سەن دە، مەن دە بالامىز،
سەگىز سانىن سالامىز.
سەگىز دەگەن ەكى ءتورت،
سەگىز جاستا اعامىز.
9
توعىز جاسقا كەلگەنىم -
توعىز جىلدى كورگەنىم.
توعىز جاستا ءتانتى ەتكەن،
تالابىمدى كور مەنىڭ!
10
ون جىل، ون جاس - ون دەگەن،
ون جاس كىشى ول مەنەن.
وندى جازا الامىز،
ون - تۇرعان ءبىر نول مەنەن.
* * *
جاندىك-ساناماق
ءبىر دەگەنىم - بۇرگە.
ەكى دەگەنىم- ەسەكقۇرت.
ءۇش دەگەنىم - ۇيەز (شىبىن).
ءتورت دەگەنىم - تۇكتى قۇرت.
بەس دەگەنىم - بوگەلەك،
التى دەگەنىم - الامان.
جەتى دەگەنىم - جەگى
سەگىز دەگەنىم - سۇلىك.
توعىز دەگەنىم - تىشقان.
ون دەگەنىم - وق جىلان.
جەتىم قالار جاندىكسىز،
مىنا ورتا قورشاعان.
* * *
وسىمدىك-ساناماق
ءبىر دەگەنىم - بۇرگەن،
ەكى دەگەنىم - ەرمەن.
ءۇش دەگەنىم - ۇلپىلدەك،
ءتورت دەگەنىم - تۇلكىشەك.
بەس دەگەنىم - بەستاماق،
التى دەگەنىم - القا.
جەتى دەگەنىم - جەكەن،
سەگىز دەگەنىم - سەلەۋ.
توعىز دەگەنىم - توشالا،
ون دەگەنىم - وشاعان،
شوپتەن ءدارى جاساعان.
* * *
قۇس-ساناماق
ءبىر دەگەنىم - ءبىرقازان،
ەكى دەگەنىم - ەمەنتۇمسىق.
ءۇش دەگەنىم - ۇيرەك،
ءتورت دەگەنىم - تورعاي.
بەس دەگەنىم - بەزگەلدەك،
التى دەگەنىم - الابۇلدىرىق،
جەتى دەگەنىم - جەك (دۋاداق)،
سەگىز دەگەنىم - سۇڭقار.
توعىز دەگەنىم - توقىلداق،
ون دەگەنىم - وقپاق.
* * *
اعاش-ساناماق
ءبىر دەگەنىم - بايتەرەك،
ەكى دەگەنىم - ەمەن.
ءۇش دەگەنىم - ۇيەڭكى،
ءتورت دەگەنىم - تۇت.
بەس دەگەنىم - بالقاراعاي،
التى دەگەنىم - ارشا.
جەتى دەگەنىم - جيدە،
سەگىز دەگەنىم - سەكسەۋىل.
توعىز دەگەنىم - توراڭعى،
ون دەگەنىم - ورمان.
ورمان - اڭ-قۇستارعا قورعان.
* * *
اڭ-ساناماق
ءبىر دەگەنىم - ءبورى،
ەكى دەگەنىم - ەلىك.
ءۇش دەگەنىم - ۇشار (اڭ)،
ءتورت دەگەنىم - تۇلكى.
بەس دەگەنىم - بوكەن،
التى دەگەنىم - ارقار.
جەتى دەگەنىم - جايران،
سەگىز دەگەنىم - سىلەۋسىن.
توعىز دەگەنىم - تاۋتەكە،
ون دەگەنىم - ور قويان.
* * *
الما جيناپ ءبولىستى
الماس، اسان كەلىستى،
الما جيناپ ءبولىستى.
اراسىندا ءبىر الما،
ايتىس بولدى بۇلارعا.
اسان بەرسە، الماسى
ۇشتەن ءبىرى كەم بولار.
الماس بەرسە، الماسى
اساننىڭ دا تەڭ بولار.
الما ساناپ كورىڭدەر،
ەكىگە تەڭ بولىڭدەر.
* * *
ەگەۋ - ەكەۋ،
تىستەۋىك - ەكەۋ.
قوس-قوسىنان
قوسسا نەشەۋ؟
* * *
ءبىر - ءبىلىم الدىم
ءبىر - ءبىلىم الدىم،
ەكى - ەگىن سالدىم.
ءۇش - ءۇي كوشىردىم،
ءتورت - ءتول ءوسىردىم.
بەس - بەلگە شىقتىم،
التى - اسىق ۇتتىم.
جەتى - جەلىم جاقتىم،
سەگىز - سەركە باقتىم.
توعىز - تويعا باردىم،
ون - وتىن جاردىم.
