قىتاي ەلىندە تۇراتىن قانداسىمىز، بەلگىلى اقىن قۇرمانبەك زەيتىنعازى ۇلى دۇنيەدەن وزدى

10- قاڭتار. قازاقپارات /باقىتجول كاكەش/ - سەنبى، 8- قاڭتار كۇنى قىتاي ەلىندە تۇراتىن قانداسىمىز بەلگىلى اقىن، ايتىس ساحناسىنىڭ تارلانبوزى، جىر ءدۇلدۇلى قۇرمانبەك زەيتىنعازى ۇلى ۇزاققا سوزىلعان ناۋقاستان كەيىن دۇنيەدەن وزدى.

ايتىسكەر اقىن قۇرمانبەك زەيتىنقازى ۇلى 1941- جىلى ق ح ر شىنجاڭ ولكەسى التاي ايماعى شىڭگىل اۋدانىندا دۇنيەگە كەلگەن.

قۇرمانبەك زەيتىنقازى ۇلى شىنجاڭ قازاق ادەبيەتىنىڭ بۇگىنگى ايتىس ونەرىنىڭ كوشىن باستاۋشى. بۇرىنعى وتكەن اقىنداردا كوپ ۇشىرايتىن جۇمباق ايتىس ءتۇرىن قايتا تۇلەتىپ، كەيىنگى بۋىنعا وزىندىك ۇلگى كورسەتە بىلگەن اقىن. ول ءار جىلدارى قاتىسقان الامان ايتىستاردا باس جۇلدەنى جيىرما مارتە جەڭىپ الىپ، «ەرەكشە ەڭبەك سىڭىرگەن حالىق اقىنى»، «حالىق اقىنى»، «قۇرمەتتى اقىن» سەكىلدى ش ۇ ا ر-دىڭ جوعارعى دارەجەلى ماراپاتتارىن ەنشىلەگەن. اقىن ىلە قازاق اۆتونومياسى وبلىستىق اۋىز ادەبيەتى قوعامىنىڭ، التاي ايماقتىق ادەبيەت-كوركەمونەر قوعامىنىڭ قۇرمەتتى ءتوراعاسى. قىتاي مەملەكەتتىك اۋىز ادەبيەتى قوعامىنىڭ، مەملەكەتتىك سانى از ۇلت جازۋشىلارى عىلىمي قوعامىنىڭ مۇشەسى.

ايتىس ولەڭدەرى ش ۇ ا ر وقۋلىقتارىنا كىردى. «اقىندار ايتىسى»، «جىلىپ وتكەن جىلدار-اي» ت.ب. جىر جيناقتارىن كوپكە ۇسىندى. سونىمەن قاتار اقىن شىعارمالارى جەكە كىتاپ بولىپ قىتاي تىلىنە دە اۋدارىلعان.

ونەر ساپارىمەن 1991- جىلى قازاقستاندا، 1992- جىلى تۇركيادا، 1994-1996- جىلدارى موڭعوليادا، 2006-جىلى گەرمانيا، فرانسيا، گوللانديادا بولىپ، الىستاعى اعايىندار ورتاسىندا جىر توگىپ، جۇرتتىڭ العىسىنا بولەندى.

ماعىنالى وتسە ەكەن ءومىر دەگەن،

قۇر اۋناماي قاڭباقتاي جەل ۇرلەگەن.

جەر بەسىگى دەنەمدى قۇنداقتاسا،

ءسوز قالسا ەكەن ارتىمدا كومىلمەگەن، - دەپ جىر تولعاعان اقىن ماعىنالى عۇمىرىندا حالقى سۇيگەن، حالقىن ونەرىمەن رازى-حوش ەتە بىلگەن اقىن رەتىندە كەڭىنەن تانىمال بولدى.