ارقارلاردىڭ تولدەۋى كەزىندە ماڭعىستاۋداعى تابيعي پارك اۋماعى ەرەكشە قورعالادى

اقتاۋ. قازاقپارات – 20-ناۋرىزدان باستاپ ەلىمىزدىڭ بىرنەشە ايماعىندا تاۋ ارقارلارىن ساناۋ ناۋقانى باستالدى.

بۇل رەتتە ماڭعىتاۋ وبلىسىندا دالا جانۋارلارىن ساناۋ جۇمىسى كۇزدە وتكىزىلەدى. وبلىستاعى «قىزىلساي» مەملەكەتتىك وڭىرلىك تابيعي پاركىنىڭ ديرەكتورى مىڭبەرگەن قاراتاۋوۆ ارقارلاردى ارقارلاردى ساناۋ جۇمىستارى جوسپارلى تۇردە جۇزەگە اساتىنىن مالىمدەدى.

«ناۋرىزدىڭ سوڭىنان مامىر ايىنىڭ باسىنا دەيىن ارقارلار تولدەيدى. سول ۋاقىتتا پارك اۋماعىندا تىنىشتىقتى ساقتاۋ ءۇشىن ءبىزدىڭ ينسپەكتورلار كۇنى-ءتۇنى جۇمىسىن اتقارىپ جاتىر. بىزدە ساناق نەگىزىنەن كۇز ايلارىن وتەدى. كوكتەمگى جوسپارعا ساي ىشكى ءتارتىپ بويىنشا ءوزىمىز ساناق جۇرگىزەمىز»، - دەدى مىڭبەرگەن قاراتاۋوۆ.

بۇل رەتتە «وحوتزووپروم ءو ب» ر م ق ك قىزمەتكەرلەرى جانە وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى مەن «زوولوگيا ينستيتۋتى» رمك وكىلدەرىمەن بىرلەسە وتىرىپ تاۋ ارقارىنا (ارقارعا) كوكتەمگى اۋە ساناعى جۇمىستارى جۇرگىزىلىپ جاتقانىن مالىمدەدى.

«كوكتەمگى اۋە ساناعى جۇمىستارى تۇركىستان، جامبىل، قاراعاندى، پاۆلودار، شىعىس قازاقستان، جەتىسۋ جانە اباي وبلىستارىنىڭ اۋماقتارىندا ءساۋىر ايىنىڭ سوڭىنا دەيىن وتەدى»، - دەدى ەلىمىزدىڭ ەكولوگيا مينيسترلىگىنىڭ باسپا ءسوز قىزمەتى.

بۇعان دەيىن ماڭعىستاۋداعى «قىزىلساي» تابيعي پاركىندە ارقار مەن قاراقۇيرىق سانى كوبەيگەنى تۋرالى ايتىلعان ەدى. ەرەكشە قورعاۋعا الىنعان ارقار باسىنىڭ كوبەيۋى مەن بۇلاقتاردىڭ كوزىن اشۋدا مەملەكەتتىك ينسپەكتورلار ەلەۋلى ۇلەس قوسىپ وتىر.

اۆتور

جانكەلدى قارجان