ارگەنتينا پرەزيدەنتىنىڭ رەفورمالارىنا قارسى نارازىلىق شەرۋلەرى قاقتىعىسقا ۇلاستى

استانا. KAZINFORM - بۋەنوس-ايرەس پوليتسياسى زاڭناماعا ەنگىزىلگەن وزگەرىستەر تالقىلانىپ جاتقان ۇلتتىق كونگرەسس عيماراتىنىڭ ماڭىندا ارگەنتينا پرەزيدەنتى حاۆەر مايليدىڭ رەفورمالارىنا قارسى نارازىلىق اكتسياسىن تاراتۋ ءۇشىن كوزدەن جاس اعىزاتىن گاز بەن سۋ اتقىشتارىن قولداندى، دەپ حابارلايدى BBC.

رەفورمالاردىڭ ميلليونداعان ارگەنتينالىقتارعا زيانىن تيگىزەتىنىن العا تارتقان شەرۋشىلەر پوليسياعا قاراي جانارماي قۇيىلعان شولمەك پەن تاس لاقتىرىپ، ەكى كولىكتى ورتەپ جىبەردى. اكسيانىڭ بىرنەشە قاتىسۋشىسى جاراقات الدى.

ارگەنتينانىڭ قاۋىپسىزدىك مينيسترلىگى AFP اگەنتتىگىنە حابارلاۋىنشا، كەم دەگەندە توعىز پوليتسيا قىزمەتكەرى زارداپ شەكتى. 10 ادام قاماۋعا الىندى.

حاۆەر ميلەيدىڭ ارگەنتينا ەكونوميكاسىن جانداندىرۋ ءۇشىن ۇسىنعان رەفورمالار پاكەتى ەكونوميكالىق توتەنشە جاعداي جاريالاۋدى، زەينەتاقىنى قىسقارتۋدى جانە ەڭبەك قۇقىقتارىن شەكتەۋدى قامتيدى.

شەرۋدى ۇيىمداستىرعان سولشىل پارتيالار، كاسىپوداقتار مەن قوعامدىق ۇيىمدار بۇل شارالارعا قارسى شىقتى.

ميلەيدىڭ باسپا ءسوز قىزمەتى شەرۋشىلەر توڭكەرىس جاساپ، كونگرەسس جۇمىسىنا كەدەرگى جاساماق بولعانىن، ال قاۋىپسىزدىك كۇشتەرى «تەرروريستىك توپتاردى باسىپ- جانشۋعا ارەكەت جاسادى» دەپ مالىمدەدى.

600 دەن استام باپتان تۇراتىن رەفورمالاردىڭ باستاپقى پاكەتى وتكەن جىلدىڭ سوڭىندا پارلامەنتكە جىبەرىلگەن بولاتىن. وپپوزيتسيانىڭ قىسىمىمەن ول كەرى قايتارىلىپ، ەلەۋلى وزگەرىستەرمەن قايتا ەنگىزىلدى (وندا 238-باپ قالدى).

كونگرەسس دەپۋتاتتارىنىڭ پالاتاسى جاڭا جوبانى ءساۋىر ايىندا ماقۇلدادى. سەنات ونى سارسەنبىدە تالقىلادى.

جوعارعى پالاتادا ءسوز سويلەگەن وپپوزيتسيالىق زاڭ شىعارۋشىلار رەفورمالار پاكەتى ەلدى ونداعان جىلدارعا ارتقا تاستايتىنىن ايتتى.

«ارگەنتينادا ءبىزدى 100 جىلعا ارتقا تاستايتىن زاڭ تالقىلانىپ جاتقانىنا سەنە الماي وتىرمىز»، - دەدى نارازىلىق بىلدىرۋشىلەردىڭ ءبىرى، 55 جاستاعى زاڭگەر فابيو نۋنەس.

ناتيجەسىندە كەشكە قاراي سەنات رەفورمالار جوباسىن جالپى ماقۇلدادى، ال ونى تالقىلاۋ بەيسەنبى كۇنى جالعاسادى.

سەنات ماقۇلداعاننان كەيىن قۇجات تۇپكىلىكتى بەكىتۋ ءۇشىن تومەنگى پالاتاعا قايتارىلۋى ءتيىس.