ارميا سپورتشىلارى دۇنيەجۇزىلىك كوشپەندىلەر ويىندارىندا 5 التىن مەدال جەڭىپ الدى
استانا. KAZINFORM - جارىستىڭ ەكىنشى كۇنى قورعانىس مينيسترلىگى ورتالىق سپورت كلۋبىنىڭ قۇراماسى قازاقستاننىڭ قورجىنىنا 5 التىن، 1 كۇمىس مەدال سالدى.
قازاق كۇرەسى، جامبى اتۋ جانە قۇراشتان وتكەن سايىستاردا ارميا سپورتشىلارى ءساتتى ونەر كورسەتتى.
- دۇنيەجۇزىلىك كوشپەندىلەر ويىندارىندا سپورتتىڭ بەس تۇرىنەن 14 ارميا سپورتشىسى سىنعا تۇسۋدە. ەكى كۇن ىشىندە ولار التى مەدال جەڭىپ الدى. قازىر ءبىزدىڭ بالۋاندار ءۇشىن ءوز كۇشتەرىن تەكسەرۋگە تاماشا مۇمكىندىك تۋىپ وتىر. 2025 -جىلى استانادا قازاق كۇرەسىنەن حالىقارالىق اسكەري سپورت كەڭەسىنىڭ (CISM) الەم چەمپيوناتى وتەدى. بۇل جارىسقا وسى ۇيىمنىڭ وكىلدەرىن ارنايى شاقىردىق. ءبىز ءۇشىن بۇل اسكەري سپورتشىلار اراسىندا قازاق كۇرەسى جارىسىن دايىنداۋ مەن ناسيحاتتاۋدىڭ ماڭىزدى كەزەڭدەرىنىڭ ءبىرى، - دەدى ق ر قورعانىس مينيسترلىگى سپورت كوميتەتىنىڭ ءتوراعاسى - ورتالىق سپورت كلۋبىنىڭ باستىعى پولكوۆنيك ارمان ابەۋوۆ.
جامبى اتۋدان ازيا ستيلىندەگى جارىستا ق ر قارۋلى كۇشتەرىنىڭ قىزمەتكەرى باتىر بەكساۋىت چەمپيون اتاندى. بۇل سپورت تۇرىنەن 27 ەلدەن بارلىعى 78 سپورتشى باق سىناسقان بولاتىن.
9 ەلدىڭ 64 سپورتشىسى قاتىسقان اۋدارىسپاقتا 70 كەلىگە دەيىنگى سالماق دارەجەسىندە ق ر قارۋلى كۇشتەرىنىڭ قىزمەتشىسى المات لاتىپبەك التىن يەلەندى.
وكىلدىك قۇرام قازاق كۇرەسى جارىسىنا قاتىسۋ ءۇشىن قۇرىلدى. وعان 41 ەلدەن سەگىز سالماق دارەجەسى بويىنشا 274 سپورتشى (ەرلەر مەن ايەلدەر) ءوتىنىم بەردى. بالۋاندار بەلدەسۋى جاقسىلىق ۇشكەمپىروۆ اتىنداعى جەكپە-جەك سارايىندا ءوتىپ جاتىر. بوزكىلەمدەگى سايىستا قر قارۋلى كۇشتەرىنىڭ قىزمەتشىلەرى بەكجان تولەپوۆ (55 كگ) ، جۇماجان قوجامبەكوۆ (74 ك گ) جانە باقىت قۇساقبايەۆ (60 ك گ) جەڭىمپاز اتاندى.
27 ەلدىڭ 106 سپورتشىسى باق سىنايتىن قۇراش تۋرنيرىندە ارميا بالۋانى اعا لەيتەنانت مارات بايقامۇروۆ 100 كەلىدەن استام سالماق دارەجەسىندە كۇمىس مەدال جەڭىپ الدى.
