پاراليمپيادا ويىندارىنىڭ جەڭىمپازدارى مەن جۇلدەگەرلەرى ەلگە ورالدى
استانا. KAZINFORM - بۇگىن XVII جازعى پاراليمپيادا ويىندارىنىڭ جەڭىمپازدارى مەن جۇلدەگەرلەرى ەلگە ورالدى.
ولاردىڭ قاتارىندا پاراليمپيادا ويىندارىنىڭ چەمپيونى اقمارال ناۋاتبەك (پارا دزيۋدو) پەن داۆيد دەگتياريەۆ (پارا پاۋەرليفتينگ)، كۇمىس جۇلدەگەر اتانعان ەرعالي شامەي (پارا دزيۋدو)، نۇرداۋلەت جۇماعالي (پارا ءجۇزۋ)، قولا جۇلدەگە قول جەتكىزگەن دايانا فەدوسوۆا (پارا دزيۋدو)، زارينا رايفوۆا (پارا دزيۋدو) مەن جۇرقامىرزا شۋكۋربەكوۆ (پارا دزيۋدو) جانە پارا دزيۋدو، پارا پاۋەرليفتينگ، پارا ءجۇزۋ، ۆولەيبولدى وتىرىپ ويناۋ، پارا كانوە قۇراما كوماندا وكىلدەرى بار. سپورتشىلاردى استانا اۋەجايىنان تۋىستارى، دوستارى، جانكۇيەرلەرى مەن قازاقستانداعى سپورت ۇيىمدارىنىڭ وكىلدەرى قارسى الدى.
«وسى پاراليمپيادانىڭ ناتيجەلەرى قازاق پاراسپورتى تاريحىنداعى ەڭ ۇزدىك بولدى - قازاقستان قۇراماسى مەدالدار سانى بويىنشا رەكوردتىق كورسەتكىشكە قول جەتكىزدى. داۆيد دەگتياريەۆ - ەل تاريحىندا تۇڭعىش ەكى دۇركىن پاراليمپيادا چەمپيونى. وزدەرىڭىز بىلەتىندەي، ءبىز وليمپيادالىق سپورت تۇرلەرى سياقتى پاراسپورت تۇرلەرى ءۇشىن دە تەڭ جاعداي جاساۋعا تىرىسامىز. چەمپيوندارىمىزدىڭ جاتتىعۋ تەحنيكاسىن زەرتتەپ، باسقا سپورتشىلارعا قولدانۋدى جوسپارلاپ وتىرمىز. بالالار اراسىندا پاراسپورتتى دامىتۋ بويىنشا دا بەلسەندى جۇمىس جۇرگىزىلەتىن بولادى»، - دەدى تۋريزم جانە سپورت ءمينيسترى ەربول مىرزابوسىنوۆ.
ايتا كەتەيىك، قازاقستاندىق سپورتشىلار پاراليمپيادادان مەدالدار سانى بويىنشا رەكوردتىق كورسەتكىشپەن ورالدى.
«بۇل ناتيجەگە جەتۋ ءۇشىن ءبىز كوپ جۇمىس ىستەدىك. ەلىمىزدىڭ جانە بىزگە سەنگەن ءاربىر ادامنىڭ قولداۋى بارلىق قازاقستاندىق پاراليمپياداشىعا سوڭىنا دەيىن كۇرەسۋگە كۇش بەردى. ءبىز قازاقستاندى الەمدىك ارەنادا تانىتقانىمىزدى ماقتان تۇتامىز جانە شەكتەۋ تەك ميدا عانا بولاتىنىن دالەلدەدىك»، - دەدى 2024 -جىلعى پاراليمپيادا ويىندارىندا التىن العان دزيۋدوشى اقمارال ناۋاتبەك.
پاراليمپيادا جەڭىمپازىنىڭ سوزىنە ءدۇيىم جۇرت شاپالاق سوعىپ، قوشەمەت كورسەتتى.
جالپى، 2024 -جىلى پاريجدە وتكەن پاراليمپيادا ويىندارىندا قازاقستان نامىسىن سپورتتىڭ 9 تۇرىنەن 44 سپورتشى قورعادى، بۇل رەكوردتىق كورسەتكىش بولدى. ءبىزدىڭ قۇراما مەدالدىق ەسەپتە 39-ورىنعا يە بولدى.
ايتا كەتەيىك، XVII جازعى پاراليمپيادا ويىندارىندا پارا پاۋەرليفتينگتەن 54 ك گ سالماق دارەجەسىندە سىنعا تۇسكەن داۆيد دەگتياريەۆ التىن مەدال جەڭىپ الدى. جەرلەسىمىز 188 ك گ سالماقتى ەڭسەرىپ، ەكى دۇركىن پاراليمپيادا چەمپيونى اتاندى.
كۇمىس مەدالدى 185 ك گ كوتەرگەن كۋبا وكىلى راميرەز بارريەنتوس پابلو جەڭىپ السا، قولا جۇلدەنى 179 ك گ ناتيجەسىمەن قىتاي سپورتشىسى يان دجينلان يەلەندى.
پارا دزيۋدودان 48 ك گ سالماق دارەجەسىندە (J2 ساناتى) بەلدەسكەن اقمارال ناۋاتبەك پاريج پاراليمپياداسىنىڭ جەڭىمپازى اتاندى. فينالدا ول فرانسيا وكىلى ساندرينا مارتينەدەن باسىم ءتۇسىپ، التىن جۇلدەگە قول جەتكىزدى.
نۇرداۋلەت جۇماعالي پاريج پاراليمپياداسىنىڭ فينالىندا SB13 ساناتىندا 100 مەترگە براسس ادىسىمەن جۇزۋدەن باق سىناپ، كۇمىس مەدال جەڭىپ الدى.
پارا دزيۋدودان J1 ساناتىندا 73 ك گ سالماقتا ونەر كورسەتكەن ەرعالي شامەي فينالدىق بەلدەسۋدە رۋمىنيالىق بالۋان فلورين-الەكساندر بولوگاعا جول بەرىپ، پاريج پاراليمپياداسىنىڭ كۇمىس جۇلدەگەرى اتاندى.
J2 ساناتى بويىنشا 57 كەلىدەگى دايانا فەدوسوۆا قولا جۇلدە ءۇشىن بەلدەسۋدە تۇركيا وكىلى دەنديۋ ەشيليۋرتتى اي̆قىن جەڭىپ، ەل قورجىنىنا كەزەكتى جۇلدەنى سالدى.
پارا دزيۋدودان ايەلدەر اراسىندا +70 ك گ سالماق دارەجەسىندە J2 ساناتىندا بەلدەسكەن زارينا رايفوۆا قولا مەدال جەڭىپ الدى. ءۇشىنشى ورىن ءۇشىن وتكەن كەزدەسۋدە رايفوۆا يتاليالىق كارولينا كوستادان باسىم ءتۇستى.
جۇرقامىرزا شۇكىربەكوۆ پارا دزيۋدودان J2 ساناتىندا 90 كەلى سالماقتى سىنعا ءتۇسىپ، قولا مەدال جەڭىپ الدى. ءۇشىنشى ورىن ءۇشىن وتكەن بەلدەسۋدە ول فرانسيا وكىلى ناسەر زورگانيدى يپپونمەن تىزە بۇكتىردى.
اۆتور
كۇنسۇلتان وتارباي
