پاراليمپيادا-2024: قازاقستان قۇراماسىنىڭ باستى ۇمىتكەرلەرى كىمدەر
استانا. KAZINFORM - قازاقستاندىق پاراليمپياداشىلار 28-تامىز بەن 8-قىركۇيەك ارالىعىندا پاريج شاھارىندا وتەتىن جازعى پاراليمپيادا ويىندارىندا باق سىنايدى. بۇعان دەيىنگى دودالاردا قورجىنىمىز بوس قايتقان جوق. بيىلعى باسەكەدەن نە كۇتەمىز؟ Kazinform اگەنتتىگىنىڭ ءتىلشىسى وتكەندى شولىپ، بولاشاققا كوز جۇگىرتىپ كوردى.
جازعى پاراليمپيادا ويىندارىنداعى جەتىستىكتەر
1996 -جىلدان بەرى قازاقستاندىق سپورتشىلار جازعى پاراليمپيادا ويىندارىندا سۋدا ءجۇزۋ، پاراپاۋەرليفتينگ جانە پارادزيۋدو سياقتى سپورت تۇرلەرىنەن 7 مەدال (2 التىن، 4 كۇمىس جانە 1 قولا) جەڭىپ الدى.
2016 -جىلى ريودا جۇزۋدەن ءزۇلفيا عابيدۋللينا التىن مەدال ەنشىلەسە، راۋشان قويشىبايەۆا پاراپاۋەرليفتينگتەن كۇمىسپەن كۇپتەلدى.
2020 -جىلى توكيودا قازاقستان قۇراماسى 1 التىن، 3 كۇمىس جانە 1 قولانى قورجىنعا سالدى. توكيو التىنىن پاراپاۋەرليفتينگتەن داۆيد دەگتياريەۆ يەلەنسە، ءۇش كۇمىستى پارادزيۋدوشىلار داۋلەت تەمىرجان، زارينا بايباتينا جانە ءانۋار ساريەۆ موينىنا تاقتى. ال جۇزۋدەن نۇرداۋلەت جۇماعالي قولاعا قول جەتكىزدى. جەڭىپ الدى. وسىلايشا، توكيوداعى پاراليمپيادا ويىندارىنىڭ مەدال تىزىمىندە قازاقستان 5 جۇلدەمەن 51-ورىنعا تۇراقتادى.
پاريج ءھام وتاندىق پاراليمپياداشىلار
2024 -جىلى پاريجدە وتەتىن پاراليمپيادا ويىندارىندا ەل قۇراماسى ساپىندا پارا ءجۇزۋ، پارا پاۋەرليفتينگ، پارا جەڭىل اتلەتيكا، كانوەدە ەسۋ، پارا تاەكۆوندو، وتىرىپ ۆولەيبول ويناۋ، پارا اتۋ، ۇستەل تەننيسى، پارا دزيۋدو سياقتى 9 سپورت تۇرىنەن 44 سپورتشى جۇلدەگە تالاسادى.
ايتا كەتەيىك، دوداعا پاراليمپيادا ويىندارىنىڭ چەمپيوندارى زۋلفيا عابيدۋللينا مەن داۆيد دەگتياريەۆ، پاراليمپيادا ويىندارىنىڭ جۇلدەگەرلەرى راۋشان قويشىبايەۆا (كۇمىس) پەن نۇرداۋلەت جۇماعالي (قولا) قاتىسىپ، تاعى ءبىر مارتە مىقتىلىعىن پاش ەتپەك.
ەڭ كوپ ليتسەنزيانى پارادزيۋدوشىلار (10 ادام) جەڭىپ العانىن اتاپ وتكەن ءجون.
قازاقستان قۇراماسىنىڭ ءۇمىتى
تانىمال سپورت جۋرناليسى دميتري نەستەرەنكو قازاقستان بيىل رەكوردتىق ليتسەنزيا جەڭىپ العانىن اتاپ ءوتتى. سايكەسىنشە، قورجىنعا تۇسەتىن مەدال سانى كوپ بولادى دەگەن ۇمىتتە.
«1998 -جىلدان بەرى العاش رەت ليتسەنزيا العان ءبىزدىڭ پاراۆولەيبول كومانداسىنىڭ ونەرىن تاماشالاۋ قىزىقتى بولعالى تۇر»، - دەدى نەستەرەنكو.
ونىڭ ايتۋىنشا، ءزۇلفيا عابيدۋللينا مەن نىشان ءومىرالىنىڭ، سونداي-اق پارادزيۋدو قۇراماسىنىڭ وكىلدەرىنىڭ جۇلدەگە مۇمكىندىكتەرى زور.
«ەگەر مەدالعا دەگەن ءۇمىت تۋرالى ايتاتىن بولساق، ارينە، سۋدا ءوزىن بالىقتاي سەزىنەتىن زۋلفيا عابيدۋللينانى اتاپ وتۋگە بولادى. جاس كورسەتكىشىنە قاراماستان، ول ەكىنشى پاراليمپيادا التىنىن الۋدى ماقسات ەتىپ وتىر. ارينە، پارادزيۋدو مەن پاراتاەكۆاندودان دا مەدال كۇتەمىز. ەكى دۇركىن الەم چەمپيونى نىشان ءومىرالى دە پاريجدە التىن الۋعا تىرىساتىنى انىق»، - دەدى ول.
سونىمەن قاتار، نەستەرەنكو سيەۆدا اليەۆانىڭ پارا اتۋدان مەدال الۋعا ءۇمىتى بار ەكەنىن بولجاپ وتىر. ول پارا- بيدەن اۋىسىپ، جاڭا سپورت ءتۇرىن جەدەل مەڭگەرىپ العانىن اتاپ وتكەن ءجون.
«مەن سيەۆدا اليەۆانىڭ پارا اتۋدان مەدال الاتىنىنا سەنگىم كەلەدى. ول پارا بيدەن جاقىندا عانا اۋىستى، ءبىراق چەمپيوندىق رۋح از ۋاقىتتىڭ ىشىندە پاراليمپيادا جولداماسىن يەلەنۋگە مۇمكىندىك بەردى»، - دەدى ول.
سپورت جۋرناليسى داۆيد دەگتياريەۆتىڭ دە جەتىستىگىنە ۇمىتتەنەتىنىن ايتىپ، ءالي ماقۇلبەكوۆ ونەر كورسەتەتىن پارا اتلەتيكا مەن پارا ۇستەل تەننيسىنەن ليتسەنزيالاردىڭ بار ەكەنىن ەسكە سالدى. ياعني، كۇتپەگەن جەردەن ەل قورجىنىنا جۇلدە ءتۇسۋى دە عاجاپ ەمەس.
دەلەگاتسيالار مەن قاتىسۋشىلاردىڭ رەكوردتىق سانى
«2024 -جىلى پاريجدە وتەتىن پاراليمپيادا ويىندارىنا دەلەگاتسيالار مەن ايەلدەردىڭ رەكوردتىق سانى قاتىسادى»، دەپ حابارلادى حالىقارالىق پاراليمپيادا كوميتەتى.
كوماندالاردىڭ ۇزدىكسىز كەلۋىنە بايلانىستى سوڭعى ساندار ءالى انىقتالىپ جاتىر، جالپى، 168 دەلەگاتسيا ساپىندا شامامەن 4400 سپورتشى قاتىسادى دەپ بولجانۋدا.
دەلەگاتسيالار سانى لوندون-2012 جانە توكيو-2020 پاراليمپيادا ويىندارىندا تىركەلگەن (164) رەكوردىق كورسەتكىشتەن اساتىنىن جازدىق. ال قاتىسۋشىلار سانى بويىنشا الدىڭعى رەكورد توكيو ويىندارىنا (4393 سپورتشى) تيەسىلى ەدى.
پاريج پاراليمپيادا ويىندارىندا 1983 ايەل سپورتتىڭ 22 تۇرىنەن 549 مەدال ءۇشىن سايىسقا تۇسەدى.
بۇعان دەيىن جازعانىمىزداي، قازاقستان اتىنان 44 سپورتشى جۇلدەگە تالاسادى. بۇل دا رەكوردتىق كورسەتكىش ەكەنىن ەسكە سالامىز.
2024 -جىلعى پاراليمپيادا ويىندارىنداعى بەس ءىرى دەلەگاتسيا
2004 -جىلى افينىدان بەرى ءاربىر پاراليمپيادا ويىندارىندا مەدالدار سانى بويىنشا كوش باستاپ كەلە جاتقان قىتاي بيىل 282 سپورتشىسىنا سەنىم ارتىپ وتىر.
برازيليا 255 سپورتشىسىمەن ەكىنشى ورىندا تۇر. جارىستى قابىلداۋشى ەل فرانسيا 237 سپورتشىمەن قاتىسادى.
ا ق ش قۇرامىندا 220، ۇلى بريتانيا ساپىندا 201 سپورتشى بار.
بۇعان دەيىن پرەمەر-مينيستر ولجاس بەكتەنوۆ ەكى تۋ ۇستاۋشىعا - ازيا پاراليمپيادا ويىندارىنىڭ جەڭىمپازى، قازاقستان چەمپيوناتىنىڭ ون دۇركىن جەڭىمپازى بەرىك ىزماعانبەتوۆكە (پاراۆولەيبول) جانە وق اتۋدان قازاقستان چەمپيوناتىنىڭ جەڭىمپازى سيەۆدا اليەۆاعا مەملەكەتتىك تۋدى تابىس ەتكەن بولاتىن.
سونداي-اق، XVII جازعى پاراليمپيادا ويىندارىنا قاتىساتىن قازاقستاندىق پاراليمپياداشىلاردىڭ العاشقى لەگى پاريجگە اتتاندى.
بۇگىن، 28-تامىزدا پاراليمپيادا ويىندارىنىڭ اشىلۋ سالتاناتى وتەدى.
جارىس كەستەسى:
- 29، 30، 31-تامىز: پاراتاەكۆوندو؛
- 29، 31-تامىز، 2، 5، 6-قىركۇيەك: پاراۆولەيبول؛
- 30، 31-تامىز، 4، 5-قىركۇيەك: جەڭىل اتلەتيكا؛
- 31-تامىز، 1، 4-قىركۇيەك: وق اتۋ؛
- 1، 3، 4، 5، 6-قىركۇيەك: جۇپتىق ءجۇزۋ؛
- 1، 2، 4، 6، 7-قىركۇيەك: ۇستەل تەننيسى؛
- 5، 7-قىركۇيەك: پاۋەرليفتينگ؛
- 5، 6، 7-قىركۇيەك: پارادزيۋدو؛
- 6، 7-قىركۇيەك: پاراكانوە.
اۆتور
ورالحان قوجانوۆ
