پارا بەرگەن: اقتوبەدە سوتتالعان ءبىلىم ءبولىمىنىڭ باسشىسىنا تاعى ءبىر ايىپ تاعىلدى

بۇعان دەيىن پارا العانى ءۇشىن سوتتالعان اقتوبە وبلىسى ىرعىز اۋداندىق ءبىلىم ءبولىمىنىڭ باسشىسى ايبەك الدانوۆقا تاعى ءبىر ەپيزود بويىنشا ايىپ تاعىلىپ، ونىڭ جازاسى اۋىرلادى، دەپ حابارلايدى Kazinform.

ىرعىز اۋداندىق سوتىندا ايبەك الدانوۆقا قاتىستى ەكىنشى ءىس قارالدى. ءىس ماتەريالىنا سۇيەنسەك، اتالعان اۋداننىڭ ءبىلىم ءبولىمىنىڭ باسشىسى تەكسەرۋ جۇمىستارىن جۇرگىزگەن «اقتوبە وبلىسىنىڭ ەڭبەك جانە الەۋمەتتىك قورعاۋ دەپارتامەنتى» ر م م حالىقتى الەۋمەتتىك قورعاۋ سالاسىنداعى باقىلاۋ ءبولىمىنىڭ باسشىسى اسقار مۇحيتوۆقا 25 مىڭ تەڭگە پارا بەرگەن. ا. مۇحيتوۆ ءبىلىم ءبولىمى عيماراتىندا پاندۋس جانە تاكتيلدى بەلگىلەر جوقتىعىن انىقتاعان. پارانى وسى فاكتىنى جاسىرىپ قالۋ ءۇشىن العان.

بۇعان دەيىن ەشقايدا كەتپەۋ جانە ءتيىستى مىنەز-قۇلىق تۋرالى قولحاتپەن جۇرگەن ا. مۇحيتوۆ قىلمىستىق كودەكستىڭ «پارا الۋ» بابى بويىنشا ايىپتى دەپ تانىلىپ، وعان 3 جىلعا باس بوستاندىعىنان ايىرۋ جازاسى تاعايىندالدى. جازانى قىلمىستىق- اتقارۋ جۇيەسىنىڭ ورتاشا قاۋىپسىز مەكەمەسىندە وتەيدى. سونداي-اق بۇدان بىلاي مەملەكەتتىك قىزمەتتە، بانك سالاسىندا ەڭبەك ەتە المايدى.

ال ىرعىز اۋداندىق ءبىلىم ءبولىمىنىڭ باسشىسى ا. الدانوۆ قىلمىستىق كودەكستىڭ «پارا بەرۋ» بابىمەن ايىپتى دەپ تانىلدى. سوت 2 جىل باس بوستاندىعىنان ايىرۋ جازاسىن بەلگىلەدى. بۇعان دەيىن «پارا الۋ» بابىمەن سوتتالعان ول قىلمىستىق كودەكستىڭ 58-بابى 6-بولىگىنىڭ نەگىزىندە تۇپكىلىكتى 4 جىلعا باس بوستاندىعىنان ايىرىلدى. جازانى وتەۋگە قىلمىستىق-اتقارۋ جۇيەسىنىڭ ورتاشا قاۋىپسىز مەكەمەسىنە جولدانادى.

سوت ۇكىمى زاڭدى كۇشىنە ەنگەن جوق.

اۆتور

التىناي ساعىندىقوۆا