اقتوبەدەگى اسكەري قىزمەتشىنىڭ ولىمىنە بايلانىستى قىلمىستىق ءىس قوزعالدى
استانا. KAZINFORM - اقتوبە وبلىسىندا اسكەري قىزمەتشىنىڭ سۋيتسيد جاساۋىنا بايلانىستى قىلمىستىق ءىس قوزعالدى.
«وسى جىلدىڭ 23-قاراشاسىندا اقتوبە گارنيزونىنا قاراستى اسكەري بولىمدەردىڭ بىرىندە مەرزىمدى قىزمەتتىڭ اسكەري قىزمەتشىسى قاراۋىل قىزمەتىن اتقارۋ كەزىندە وزىنە بەكىتىلگەن قارۋمەن اتىلىپ، سۋيتسيد جاسادى. وقيعانىڭ سەبەبى مەن ءمان-جايى انىقتالىپ جاتىر. اتالعان فاكتى بويىنشا قىلمىستىق ءىس قوزعالدى. تەرگەۋ مۇددەسىنە وراي وزگە اقپارات جاريالانبايدى. قۇرلىقتاعى اسكەر قولباسشىلىعى اسكەري قىزمەتشىنىڭ تۋعان- تۋىستارى مەن جاقىندارىنا كوڭىل ايتادى»، - دەلىنگەن اقتوبە گارنيزونى تاراتقان اقپاراتتا.
بۇعان دەيىن اقتوبە وبلىسىنداعى اسكەري بولىمدە اسكەري قىزمەتشى - سارباز كوز جۇمعانىن جازعان ەدىك.
مۇنداي وقيعالار سوڭعى ۋاقىتتا جيىلەپ كەتتى. ەسكە سالساق، جۋىردا عانا ش ق و- دا مەرزىمدى قىزمەتتەگى اسكەري قىزمەتشى قازا بولدى. 7-قاراشادا شەكارا قىزمەتى شىعىس قازاقستان وبلىسى بويىنشا دەپارتامەنتىنىڭ مەرزىمدى قىزمەتتەگى اسكەري قىزمەتشىسى قازا تاپتى. الدىن الا مالىمەت بويىنشا ءولىم سەبەبى - سۋيتسيد.
