اقتوبەدە تەلەفون ۇرلاعان بالانىڭ اكەسى اكىمشىلىك جازاعا تارتىلدى

اقتوبە. KAZINFORM - اقتوبەدە بالاسى ءۇشىن اكەسى جازا ارقالادى. جاس ءوسپىرىم تەلەفون ۇرلاپ، اكەسى 5 تاۋلىككە قامالدى.

اقتوبە وبلىستىق پ د باسپا ءسوز قىزمەتىنىڭ حابارلاۋىنشا، قوبدا اۋدانىنىڭ 14 جاستاعى تۇرعىنى اقتوبە قالاسىنا كەلگەن. كامەلەت جاسقا تولماعان بالا ادام كوپ جينالاتىن جەردە بەيتانىس بىرەۋدىڭ تەلەفونىن الىپ كەتكەن. پوليتسيا ونى انىقتاپ، ۇرلانعان بايلانىس قۇرالىن تاركىلەدى.

- قوبدا اۋداندىق سوتىندا كامەلەتكە تولماعان بالانىڭ اتا-اناسىنا قاتىستى اكىمشىلىك ءىس قارالدى. بالانى تاربيەلەۋ جانە وعان ءبىلىم بەرۋ، ونىڭ قۇقىقتارىن جانە مۇددەلەرىن قورعاۋ جونىندەگى مىندەتتەردى ورىنداماعانى ءۇشىن سوت شەشىمىمەن اكەسى كىنالى دەپ تانىلدى. بالاسىنىڭ تاربيەسىنە بەيجاي قاراعان ەر ادام 5 تاۋلىككە اكىمشىلىك قاماققا الىندى، - دەپ حابارلادى اقتوبە وبلىستىق پ د باسپا ءسوز قىزمەتى.

ايتا كەتەيىك، بىلتىر ەلدە بالاعا قاتىستى كەز كەلگەن زورلىق-زومبىلىق تۇرلەرى ءۇشىن جاۋاپكەرشىلىك قاتاڭداتىلىپ، زاڭعا وزگەرىس ەنگىزىلدى. جاڭا سانكسيا بويىنشا كامەلەتكە تولماعان بالانى قورلاۋ، ياعني بۋللينگ جاساعانى ءۇشىن 10 ايلىق ەسەپتىك كورسەتكىش مولشەرىندە ايىپپۇل قاراستىرىلعان. ەگەر اگرەسسور كامەلەتكە تولماسا، وندا جاۋاپكەرشىلىك ونىڭ اتا-اناسىنا نەمەسە زاڭدى وكىلدەرىنە جۇكتەلەدى.

اۆتور

التىناي ساعىندىقوۆا