اقتوبەدە سۋ تاسقىنىنان زارداپ شەككەندەرگە ميلليارد تەڭگەگە جۋىق ءبىرجولعى تولەم اۋدارىلدى

اقتوبە. KAZINFORM - اقتوبە وبلىسى بويىنشا 2904 وتباسى ءبىرجولعى تولەمدى الدى. ال 530 ميلليون تەڭگەگە جۋىق قارجى 242 وتباسىنا ءبولىندى. بۇل باسپانانى جوندەۋگە ارنالعان اقشا.

اقتوبە وبلىسى بويىنشا بۇگىنگە دەيىن 2904 وتباسىدان ءبىرجولعى تولەمگە ءوتىنىش ءتۇسىپ، سۋ تاسقىنىنا بايلانىستى ءبارى 100 ا ە ك كولەمىندە نەمەسە 300 مىڭ تەڭگە اقشا الدى. بۇل دەگەنىمىز 939 ميلليون تەڭگەدەن استام قارجى. ەگەر تاعى دا ءوتىنىش تۇسسە، كوميسسيا قاراپ، قارجى اۋدارادى. ال 130 ميلليون تەڭگەدەن استام قارجى 331 وتباسىنا ماتەريالدىق كومەك رەتىندە اۋدارىلدى.

اقتوبە وبلىسى اكىمىنىڭ باسپا ءسوز قىزمەتىنىڭ حابارلاۋىنشا، بۇگىندە وبلىس بويىنشا 4678 ۇيگە سۋ كىرگەن بولىپ ەسەپتەلەدى. ونىڭ 1447 ءى تۇرعىن ءۇي بولسا، وزگەسى ساياجاي اۋماعىنداعى باسپانا. ارنايى كوميسسيا بۇگىندە ونىڭ مىڭنان استامىن تەكسەرىپ، باسىم بولىگىنە باعالاۋ جۇرگىزدى.

— قازىرگى كەزدە 242 وتباسى ءۇيدى قالپىنا كەلتىرۋ ءۇشىن 527 ميلليون تەڭگەدەن استام قارجى الدى. باسپاناسى تۇرۋعا جارامسىز بولىپ قالعان 13 وتباسى دايىن ءۇيدى ساتىپ الۋعا كەلىسىم بەردى. ولارعا 174 ميلليون تەڭگە جۇمسالدى. سونىمەن بىرگە قازىرگى كەزدە 97 ءۇيدىڭ قۇرىلىسى باستالدى، - دەپ حابارلادى اقتوبە وبلىسى اكىمىنىڭ باسپا ءسوز قىزمەتى.

ايتا كەتەيىك، اقتوبە وبلىسى بويىنشا ىرعىز اۋدانىندا عانا تاسقىنعا قارسى كۇرەس جۇمىسى ءجۇرىپ جاتىر. ىرعىزداعى قۇيلىس جانە جايساڭباي اۋىلدارىندا جاعانى بەكىتۋ ءۇشىن توتەنشە جاعدايلار قىزمەتىمەن قاتار اۋىل تۇرعىندارى جۇمىلدىرىلعان. بۇل جۇمىستاردىڭ ءجۇرىپ جاتقانىنا ءبىر ايدان استام ۋاقىت ءوتتى.