اقتوبەدە قىزعالداق ۇستاپ فوتوعا تۇسكەن اۋىل اكىمىنىڭ ءىسىن كوميسسيا تەكسەرىپ جاتىر
اقتوبە. KAZINFORM - مۇعالجار اۋدانى قۇدايبەرگەن جۇبانوۆ اتىنداعى اۋىلدىق وكرۋگ اكىمى ءلاززات بەردىبايەۆانىڭ فوتوسىن ەندى ارنايى كوميسسيا زەردەلەيدى.
قۇدايبەرگەن جۇبانوۆ اتىنداعى اۋىلدىق وكرۋگ اكىمى ءلاززات بەردىبايەۆانىڭ گۇل ۇستاپ تۇسكەن فوتوسى الەۋمەتتىك جەلى ارقىلى تاراپ كەتتى. قازىرگى كەزدە پوليتسيا فوتوداعى گۇلدىڭ قىزىل كىتاپقا ەنگەن-ەنبەگەنىن تەكسەرىپ جاتىر.
- تەكسەرىپ، قىزعالداقتىڭ قىزىل كىتاپقا ەنگەن ءتۇرى مە دەگەن سۇراققا جاۋاپ ىزدەيمىز. كەيىن قۇقىقتىق باعاسى بەرىلەدى، - دەدى وبلىستىق پ د باسپا ءسوز قىزمەتىنىڭ جەتەكشىسى ەربولات سارقۇلوۆ.
ال مۇعالجار اۋدانىنىڭ اكىمى دارحان ەرماعامبەتوۆ قازىر ارنايى كوميسسيا قۇرىلعانىن ايتتى.
- اۋداندا مەملەكەتتىك قىزمەت ىستەرى اگەنتتىگى اقتوبە وبلىسى بويىنشا دەپارتامەنتىنىڭ وكىلى بار. سول كوميسسيادا ءىس قارالادى. ونىڭ قۇرامىندا اۋداندىق پوليتسيا ءبولىمىنىڭ وكىلى دە بار. كەيىن عانا شەشىمىن ايتىپ، جاۋاپقا تارتا الامىز. ول گۇلدى قىزدارى جۇلىپ اكەلگەنىن، فوتوعا ءتۇسىپ، WhatsApp مەسسەندجەرىندەگى ستاتۋسىنا قويعانىن ايتىپ وتىر، - دەدى دارحان ەرماعامبەتوۆ.
ەسكە سالساق، تۇركىستان وبلىسىندا قىزعالداق جۇلعان تۇرعىنعا قاتىستى قىلمىستىق ءىس قوزعالدى.
