اقتوبەدە مالعا قاسقىر شاپتى

اقتوبە. KAZINFORM — اقتوبە وبلىسى مارتوك اۋدانىندا شارۋا قوجالىعىنداعى مالعا قاسقىر شاپتى.

ءۇش باس قويدى جارىپ، 50 شاقتى قوي ءبىر-ءبىرىن تاپتاپ تاستادى.

شارۋا قوجالىعى مارتوك اۋدانى بايناسساي اۋىلدىق وكرۋگىنىڭ تەرريتورياسىندا ورنالاسقانىمەن، تاڭىربەرگەن اۋىلدىق وكرۋگىنە تىركەلگەن.

— العاشىندا 100 دەن استام دەپ ەسەپتەلگەن. ءبىراق ءالجۋاز قويلار ءتىرىلىپ جاتىر. دەمالىستىڭ الدىندا يەسىمەن كەزدەستىم. يەسى قاتتى شىعىن جوق ەكەنىن، اسىرىپ تىركەپ جىبەرگەنىن مويىندادى. 50-60 تان استام قوي جايلاپ قايتا تۇرىپ جاتىر دەپ ايتتى. قويلار ءالجۋاز بولعان، قۇلاعان. قاسقىر بويىنشا اقپاراتتى المادىم. بۇعان دەيىن تىركەلمەگەن سوڭ بىلمەدىم. مالدىڭ يەسى قانداي دا ءبىر تالاپ قويمادى. كومەكتەسۋ جايىن سۇراعانى راس. دەگەنمەن مال شارۋاشىلىعىندا ساقتاندىرۋ دامىماعان، جوق دەسە دە بولادى. تەك kezekte.kz بار. ونى ەندى ۇيرەتىپ جاتىرمىز. بۇل ۇلكەن ماسەلە. شارۋا قوجالىعىنىڭ ءبارى تىركەلە قويمايدى، — دەدى تاڭىربەرگەن اۋىلدىڭ وكرۋگىنىڭ اكىمى مەدەت بەكجانوۆ.

اقتوبە وبلىسى پ د باسپا ءسوز قىزمەتىنىڭ حابارلاۋىنشا، قاسقىردىڭ 3 باس قويدى جارىپ كەتكەنى تۋرالى اقپارات تىركەلگەن. شارۋا قوجالىعىنىڭ يەسى قانداي دا ءبىر اقپارات بەرۋدەن باس تارتتى. ول تەك ولگەن مالدى ساناماعانىن، مۇنداي پروبلەمالارمەن شارۋالار وزدەرى جالعىز قالعانىن حابارلادى.

— اقپارات بەرگىم كەلمەيدى. ماعان ودان ەش پايدا جوق. ارتىق اڭگىمە كەرەك ەمەس. مۇنداي جاعداي ءبىرىنشى رەت بولىپ تۇر وزىمدە. ءبىراق اۋداننىڭ بىرنەشە اۋىلىندا «ءولتىرىپ كەتتى» دەپ ايتىپ جاتادى، — دەدى ول.

بۇعان دەيىن حابارلاعانىمىزداي، اتىراۋ وبلىسىندا شارۋا قوجالىعىنىڭ جۇمىسشىسىنا قاسقىر شاۋىپ، قولىن تىستەپ العان. ەر ادام قولىنان جاراقاتتانعان.