اقتوبەدە جازاسىن وتەۋشى تۇرمە ىشىندەگى بەينەباقىلاۋ كامەراسىن سىندىرىپ، قايتا سوتتالدى

اقتوبە. KAZINFORM - ادام ءولتىرىپ، ۇرلىق جاساپ، توناۋمەن اينالىسقان ەكى جازاسىن وتەۋشى  8-تۇزەتۋ مەكەمەسىنىڭ بەينەباقىلاۋ كامەراسىن سىندىرعان. ەكەۋىنىڭ دە جازاسى اۋىرلادى.

اقتوبە وبلىستىق پروكۋراتۋراسىنىڭ ارنايى پروكۋرورلارى  8-مەكەمەسىندە جازاسىن ءوتىپ وتىرعان ا. جارمۇحانوۆ جانە ر. جۇماشەۆقا قاتىستى ءىستى تەرگەدى. ءىس قىلمىستىق كودەكستىڭ 428-1-بابى 3-بولىگىمەن (قىلمىستىق-اتقارۋ (پەنيتەنسيارلىق) جۇيەسى مەكەمەلەرىندە، تەرگەۋ يزولياتورلارىندا، ۋاقىتشا ۇستاۋ يزولياتورلارىندا بەينەباقىلاۋ جۇيەسىن، سول سياقتى ونىڭ كومپونەنتتەرىن قاساقانا جويۋ نەمەسە ءبۇلدىرۋ) قوزعالدى.

- 2024 -جىلى قاراشا ايىندا كىسى ولتىرگەنى ءۇشىن سوتتالعان ا. جارمۇحانوۆ جانە توناپ، ۇرلىق جاساعانى ءۇشىن سوتتالعان ر. جۇماشەۆ بىرلەسىپ، اقتوبە قالاسىنداعى  8-مەكەمەسىنىڭ بەينەباقىلاۋ كامەراسىن بۇلدىرەدى. بۇل كامەرا ىشكى ءتارتىپ رەجيمىن باقىلاۋعا ارنالعان. جازاسىن وتەۋشى ا. جارمۇحانوۆ ونى سەرۋەندەۋ الاڭىندا قاساقانا ىستەن شىعارعان. اقتوبە قالاسىنىڭ  2-سوتى سوتتالعانداردى كىنالى دەپ تانىپ، بۇرىنعى تاعايىندالعان جازالاردى قوسىپ 7 جانە 6 جىل مەرزىمگە باس بوستاندىعىنان ايىرۋ جازاسىن تاعايىندادى، - دەپ حابارلادى اقتوبە وبلىستىق پروكۋراتۋراسى.