اقتوبەدە پاراشيۋتپەن سەكىرۋ وقۋ-جاتتىعۋىندا كۋرسانت كوز جۇمدى
اقتوبە. KAZINFORM - قازىرگى كەزدە قىلمىستىق ءىس قوزعالىپ، تەرگەۋ ءجۇرىپ جاتىر.
وقيعا 15-شىلدە كۇنى بولدى. ق ر ق ك اۋە قورعانىسى كۇشتەرى اسكەري ينستيتۋتىنىڭ باسپا ءسوز قىزمەتى تاراتقان اقپاراتقا سۇيەنسەك، كۋرسانت جوسپارلى وقۋ-جاتتىعۋ كەزىندە پاراشيۋتپەن سەكىرگەن. سول كەزدە العان جاراقاتىنان وقيعا ورنىندا مەرت بولدى.
- الدىن الا اقپاراتقا سايكەس سەكىرۋ كەزىندە اسكەري قىزمەتشىنىڭ پاراشيۋتى اشىلماي قالىپ، ورنى تولماس قازاعا سەبەپ بولدى. وسى فاكتى بويىنشا قىلمىستىق ءىس قوزعالدى. وقيعانىڭ ءمان-جايىن انىقتاۋ ءۇشىن تەرگەۋ جۇرگىزىلىپ جاتىر. اسكەري ينستيتۋت پەن اۋە قورعانىسى كۇشتەرىنىڭ قولباسشىلىعى قازا تاپقان كۋرسانتتىڭ تۋعان-تۋىستارىنا قايعىرىپ كوڭىل ايتادى. ولارعا بارلىق قاجەتتى كومەك كورسەتىلەدى، - دەپ حابارلادى ق ر ق ك اۋە قورعانىسى كۇشتەرى اسكەري ينستيتۋتىنىڭ باسپا ءسوز قىزمەتى.
ايتا كەتەيىك، بىلتىر قاراشادا اقتوبە وبلىسى مارتوك اۋدانى اۋماعىندا تىكۇشاق قۇلادى. سالدارىنان ءبىر اسكەري قىزمەتشى كوز جۇمدى.
