اقتوبە وبلىسىنىڭ اكىمى وڭىردە قالىپتاسقان جاعداي جونىندە بەينەجازبا جاريالادى

اقتوبە. KAZINFORM - اقتوبە وبلىسىنىڭ اكىمى اسحات شاحاروۆ Facebook الەۋمەتتىك جەلىسىندەگى پاراقشاسىندا وڭىردە قالىپتاسقان جاعداي تۋرالى بەينەجازبا جاريالادى.

ول كەلتىرگەن مالىمەتتەرگە قاراعاندا، وبلىستاعى 7 رەسپۋبليكالىق جانە 7 وبلىستىق ماڭىزى بار اۆتوجولدار جابىق.

«اپاتتىق-قۇتقارۋ جۇمىستارىنا 46 پوليتسيا جاساعى، توتەنشە جاعداي، اسكەري بولىمدەرى مەن جەرگىلىكتى اتقارۋشى ورگانداردان 81 تەحنيكا، 211 جەكە قۇرام تارتىلدى. وبلىستىڭ 8 اۋدانىنىڭ ورتالىعىندا، ياعني قارعالى، قوبدا، ايتەكە ءبي، العا، مۇعالجار، حرومتاۋ، بايعانين، مارتوك اۋداندارىندا 11 -جىلىتۋ پۋنكتى اشىلدى. ولارعا 427 ادام، ونىڭ ىشىندە 18 ايەل جانە 20 بالا ورنالاستىرىلدى. 8 اۆتوبۋس قار قۇرساۋىنان شىعارىلىپ، 157 ادام، ونىڭ ىشىندە 17 بالا ەۆاكۋاتسيالاندى جانە جاقىن جەردەگى جىلىتۋ پۋنكتتەرىنە جەتكىزىلدى. پوليتسيا تراسسالارداعى 50 دەن استام اۆتوكولىكتى قۇتقاردى»، - دەگەن اسحات شاحاروۆ وڭىردەگى جارىق بەرۋ ماسەلەسىنە توقتالعان، بريگادالاردىڭ تۇنىمەن جۇمىس ىستەيتىنىن اتاپ ءوتتى.

«وبلىستاعى 56 اۋىلدىڭ 27 سى جارىققا قوسىلدى. ول - 2700 ابونەنت. اقتوبە قالاسىندا دا جارىق ءسوندى. قالا جانە اۋدانداردا جارىق بەرۋ جۇمىستارى ۇزدىكسىز جۇرگىزىلەدى»، - دەپ اتاپ ءوتتى وبلىس اكىمى.

ال سۋمەن قامتۋ بويىنشا «تومەنگى قارعالى» جانە «تامدى» توعاندارى، سونداي-اق قالانىڭ سۋ تازارتۋ نىساندارىنىڭ جۇمىسى قالپىنا كەلتىرىلگەن.

بەينەجازبا سوڭىندا ءوڭىر باسشىسى سىن ساعاتتا كۇندىز- ءتۇنى قولداۋ كورسەتىپ، جولداعى ازاماتتارعا بارىنشا قول ۇشىن سوزىپ جاتقان مەيىرىمدى جاندارعا، ۆولونتەرلارعا العىس ايتىپ، بارشانى ورىن العان جاعدايلارعا تۇسىنىستىك تانىتىپ، سابىر ساقتاۋعا شاقىرعان.

«ءبىز ءارقاشان بىرگەمىز. اماندىقتا بولايىق»، - دەپ ءسوزىن تۇيىندەدى اسحات شاحاروۆ.