اقتاۋلىق وقۋشى حالىقارالىق روبوت تەحنيكاسى جارىسىندا باس جۇلدە الدى

اقتاۋ. KAZINFORM - اقتاۋداعى « IT مەكتەپ- ليتسەيدىڭ» 10-سىنىپ وقۋشىسى نۇركەن ءىزباسار ۇلى وڭتۇستىك كورەيانىڭ تەدجون قالاسىندا وتكەن «11th IYRC- International youth robotic competition» ءبىلىم بەرۋ روبوتوتەحنيكاسى بويىنشا حالىقارالىق جارىستا «گران پري» جەڭىپ الدى.

وڭتۇستىك كورەيانىڭ تەدجون قالاسىندا وتكەن 11th IYRC- International youth robotic competition سايىسىنا الەمنىڭ 20 ەلىنەن 1 مىڭنان استام وقۋشى قاتىسقان. نۇركەن ءىزباسار ۇلى سول مىڭ وقۋشىنىڭ ىشىنەن ۇزدىك شىقتى.

نۇركەن ءىزباسار ۇلى جارىستا «ورماندى قۇتقارۋ» باعىتى بويىنشا 13 پەن 18 جاس ارالىعىنداعى قاتىسۋشىلار اراسىندا باعدارلامانى جىلدام ءارى، ساپالى جاساپ شىققان.

- مەن روبوتوتەحنيكامەن 5 جىلدان بەرى اينالىسامىن. بۇل - حالىقارالىق جارىس، البەتتە، قاتتى ۋايىمدادىم. ءبىراق ءبارى جاقسى ءوتتى. ماعان كورەيا ۇنادى. بولاشاق ماماندىعىم روبوتوتەحنيكا جانە IT تەحنولوگيامەن بايلانىستى بولعاندىقتان، كورەيا مەملەكەتىنىڭ جوعارى وقۋ ورنىنا تۇسكىم كەلەدى. زور قولداۋىن بىلدىرگەن جاتتىقتىرۋشىم مەن اتا- اناما ءوز العىسىمدى ايتامىن، - دەيدى نۇركەن ءىزباسار ۇلى.

وسى ورايدا باس باپكەر دميتري كۋريچيەۆ شاكىرتىنىڭ سىن ساعاتتا قانداي قيىندىقتى باستان كەشكەنى تۋرالى ايتىپ بەردى.

- باعدارلامانى بىرگە ازىرلەدىك. نۇركەن دە ازداپ قوبالجىدى. ونىڭ ۇستىنە قارسىلاستارى مىقتى بولدى. كورەيا، قىتاي، مالايزيا، تايلاند، لاوس، رەسەي، قازاقستان، برازيليا، ءۇندىستان، الجير، يزرايل، يراك، يندونەزيادان مىڭنان استام بالا قاتىستى. ءبىراق نۇركەن تاپسىرمانى جاقسى ورىنداپ، جەڭىسكە جەتتى. ءبىز ونى جەڭىسىمەن قۇتتىقتايمىز، - دەدى دميتري كۋريچيەۆ.