اقتاۋدىڭ ىرگەسىندە كارتاعا كىرمەگەن اتى جوق اۋىل بار

اقتاۋ. KAZINFORM - ەلدى مەكەننىڭ تۇرعىندارى 20 جىلدان بەرى تۇرعىلىقتى جەرىن زاڭداستىرا الماي ءجۇر. سەبەبى، اۋىل رەسمي تىركەلمەگەن.

- اقتاۋ قالالىق اكىمدىگى بىزگە دۇرىس جاۋاپ بەرمەيدى. سوسىن جەر قاتىناستارى مەكەمەسىنە باردىق. ولار بارىپ كورەمىز، سودان كەيىن اكىمدىكتە اقىلداسامىز، قۇجاتتاردى كوتەرەمىز دەپ شىعارىپ سالدى. مىنە، وسىلاي ۋاقىت سوزىپ كەلەدى، - دەيدى اۋىل تۇرعىنى كاميلا حاشيموۆا.

اتى جوق ەلدى مەكەندە 12 وتباسى تۇرادى. بالالار اقتاۋ قالاسىنداعى مەكتەپكە بارىپ وقيدى. اۋىلعا قوعامدىق كولىك قاتىنامايدى. جەدەل جاردەم دە كەلمەيدى.

- مەنىڭ دەنساۋلىعىم ناشار، كوزىم كورمەيدى. ءبىر اپتادان بەرى اۋىرىپ جاتىرمىن. دارىگەرگە بارا الماي وتىرمىن. اۆتوبۋس تا قاتىنامايدى، - دەيدى اۋىل تۇرعىنى ەلميرا راسۋلوۆا.

تۇرعىندار ەلەكتر ەنەرگياسى ءۇشىن زاڭدى تۇلعانىڭ تاريفىمەن قىرۋار قاراجات تولەۋگە ءماجبۇر. ال، گاز قۇبىرىن قۇجاتتىڭ جوقتىعىنان جۇرگىزە الماي وتىر.

اقتاۋ قالالىق جەر قاتىناستارى ءبولىمى بەرگەن مالىمەتكە سۇيەنسەك، اتالعان جەر اقتاۋ قالاسىنىڭ اۋماعىنا جاتادى ءارى وندىرىستىك ايماق سانالادى.

بۇرىن بۇل جەردە اسكەري قۇرىلىس جاساعىنىڭ جۇمىسشىلارىنا ارنالعان تۇرعىن ۇيلەر تۇرعىزىلعان. كەيىن تۇرعىندار ۇيلەرىن جەكەشەلەندىرىپ، ال كەيبىرى مۇنى جاساماعان.

- تۇرعىندار ەلەكتر قۋاتىنىڭ اقىسىن زاڭدى تۇلعا رەتىندە تولەپ وتىرعانىنىڭ سەبەبى - ولاردىڭ ەسەپتەگىشى «اقتاۋ ءسۇت» ج ش س اۋماعىندا ورنالاسقان. ولار ەلەكتر ەنەرگياسىنا جەكە تۇلعا رەتىندە تولەۋى ءۇشىن ۇيلەردى زاڭداستىرۋى قاجەت. بۇل ماسەلەنى شەشۋ جولدارىن قالا اكىمدىگىندەگى جاۋاپتى بولىمدەر كوممۋنالدىق كاسىپورىندارمەن بىرلەسىپ قاراستىرىپ جاتىر، - دەلىنگەن حابارلامادا.

بۇعان دەيىن ماڭعىستاۋدا جاڭادان بوي كوتەرەتىن كەندىرلى كۋرورتتىق قالاسىنىڭ باس جوسپارى ازىرلەنگەنىن جازعان بولاتىنبىز.