اقتاۋداعى سارباز ولىمىنەن كەيىن بىرنەشە لاۋازىمدى تۇلعا جاۋاپقا تارتىلدى
استانا. KAZINFORM — قازىر ەلوردادا اقتاۋداعى سارباز ولىمىنە قاتىستى سوت ءوتىپ جاتىر. ءىستىڭ ءمان-جايىن ق ر قارۋلى كۇشتەرى قۇرلىق اسكەرلەرىنىڭ باس قولباسشىسى، گەنەرال-مايور مەرەكە كوشەكبايەۆ ايتىپ بەردى.

— اتالعان فاكتى بويىنشا قىزمەتتىك تەرگەۋدى قورعانىس مينيسترلىگىنىڭ باسشىلىعى مەن قورعانىس ءمينيسترىنىڭ ورىنباسارى جۇرگىزدى. قازىر ءىس استانا قالاسىنىڭ اسكەري سوتىندا قارالىپ جاتىر. قىلمىستىق ءىس بويىنشا ۆزۆود كومانديرى، لەيتەنانت دوسوۆقا ايىپ تاعىلىپ وتىر، ول اسكەري جوعارى وقۋ ورنىنىڭ 2024-جىلعى تۇلەگى، وتكەن جىلدىڭ تامىز ايىندا اسكەري بولىمدە قىزمەتكە كىرىستى. قىركۇيەك ايىندا ويماشى پوليگونىنا جىبەرىلدى، — دەدى مەرەكە كوشەكبايەۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
سونداي-اق، قورعانىس مينيسترلىگىنىڭ وكىلى، سارباز ولىمىنە قاتىستى بىرنەشە لاۋازىمدى تۇلعانىڭ جاۋاپقا تارتىلعانىن ايتتى.
— قورعانىس ءمينيسترىنىڭ بۇيرىعى نەگىزىندە «باتىس» وڭىرلىك قولباسشىلىعى اسكەرلەرىنىڭ قولباسشىسى گەنەرال ارتىقوۆ جازالاندى، «باتىس» وڭىرلىك قولباسشىلىعىنىڭ اۋە شابۋىلىنا قارسى قورعانىس اسكەرلەرىنىڭ باستىعى قىزمەتىنەن شەتتەتىلدى، سونىمەن قاتار ءۇش لاۋازىمدى تۇلعاعا قىزمەتىنە تولىق سايكەس كەلمەيتىندىگى ەسكەرتىلىپ، ءتورت وفيتسەر ءارتۇرلى تارتىپتىك جازاعا تارتىلدى، — دەيدى قۇرلىق اسكەرلەرىنىڭ باس قولباسشىسى.
ەسكە سالا كەتەيىك، بىلتىر كۇزدە اقتاۋدا وق جاراقاتىن العان سارباز مەرت بولدى. رەسمي اقپاراتقا سۇيەنسەك، سارباز قارۋدى ۇستاۋ ەرەجەسىن ساقتاماۋ سالدارىنان جاراقات الىپ، ارتىنان قايتىس بولعان.