اقتاۋدا تۇسىرىلگەن فوتو The Guardian ءنىڭ ەڭ ۇزدىك فوتوسۋرەتتەر تىزىمىنە ەندى
استانا. KAZINFORM - الەمنىڭ بەدەلدى باسىلىمدارىنىڭ ءبىرى - ۇلى بريتانيانىڭ The Guardian گازەتى اقتاۋدا وتكەن «دالامەن ۇندەس بابا ونەر» قولونەر شەبەرلەرى فەستيۆالىنىڭ فوتوسۋرەتىن «كۇننىڭ ۇزدىك فوتوسى» ايدارىمەن جاريالادى.
اتالعان فوتوسۋرەت The Guardian باسىلىمىنىڭ ارنايى رەداكسيالىق توبىنىڭ ىرىكتەۋىنەن ءوتىپ، الەمنىڭ تۇكپىر- تۇكپىرىنەن تاڭدالعان ەڭ ۇزدىك فوتوسۋرەتتەر قاتارىنا ەندى.
بۇل - وتاندىق قولونەر مەن مادەنيەتىمىزدى الەمدىك دەڭگەيدە ايگىلەۋدىڭ ءبىر دالەلى. فوتوسۋرەت اۆتورى: تۇركيالىق فوتوسۋرەتشى ەلكين ەسكيپەحليۆان.
ەسكە سالا كەتەيىك، «دالامەن ۇندەس بابا ونەر» حالىقارالىق فەستيۆالى اقتاۋ قالاسىندا ءوتتى.
ماڭعىستاۋ وبلىسى اكىمدىگى مالىمەتىنشە، ءىس-شاراعا قازاقستاننىڭ جانە شەتەلدىڭ ءتۇرلى وڭىرلەرىنەن كەلگەن قولونەر شەبەرلەرى قاتىسىپ، ءوز تۋىندىلارىن ۇسىندى.
فەستيۆال اياسىندا جارمەڭكەلەر، كورمەلەر، شەبەرلىك ساباقتارى ۇيىمداستىرىلىپ، قوناقتار ۇلتتىق داستۇرلەرمەن تانىستى.
فەستيۆالدىڭ باستى ماقساتى - ءداستۇرلى ونەردى دارىپتەۋ، ۇرپاق ساناسىنا ۇلتتىق قۇندىلىقتاردى ءسىڭىرۋ جانە الەمدىك دەڭگەيدە قازاق قولونەرىنىڭ مارتەبەسىن ارتتىرۋ.
