اقتاۋدا جۇزدەگەن تۇرعىن 25 جىلدان بەرى جىلۋسىز وتىر

  اقتاۋدىڭ قاق ورتاسىندا جۇزدەگەن تۇرعىن 25 جىل بويى جىلۋسىز كۇنەلتىپ كەلەدى. 35 وتباسى تۇراتىن تۇرعىن ءۇي ورتالىقتاندىرىلعان جىلۋ جۇيەسىنە مۇلدە قوسىلماعان، دەپ حابارلايدى Kazinform.

مۇنداعى تۇرعىندار باسپانالارىن ەلەكتر پەشىمەن جىلىتىپ وتىر. ال تاماق ءپىسىرۋ ءۇشىن گاز باللون تاسيدى. «مۇنىڭ قاۋىپتى ەكەنىن بىلەمىز، الايدا باسقا شارا قالمادى» دەيدى ولار.

- ءارقايسىمىزدىڭ ۇيىمىزدە ەكى- ۇشتەن گاز باللون بار. ءبىز 1998-جىلدان بەرى جىلۋ دەگەندى ۇمىتتىق. بۇرىن ءبىر جەردە قۇبىر جارىلعان، سودان كەيىن جىلۋ جەتكىزۋشى مەكەمەگە دە، اكىمگە دە باردىق. ولار ءبىزدىڭ ەشقانداي قاتىسىمىز جوق دەپ باسىن الىپ قاشادى،- دەيدى تۇرعىننىڭ ءبىرى جانالى ەسجان اقساقال.

ەلەكتر پەشىمەن جىلىنىپ وتىرعان ءار وتباسى اي سايىن 50 مىڭ تەڭگەدەن استام اقشا تولەيدى. جارىقتىڭ دا ۇنەمى وشەتىنىنە شاعىمدانعان تۇرعىندار بالالارىمىز اۋىرىپ قالا ما دەپ الاڭدايدى.

- پاتەر ءىشى سالقىن، بالالارىمىز ءبىر بولمەگە تىعىلىپ وتىرادى. ەكى ايلىق بالام اۋىرىپ قالا ما دەپ ۋايىمداپ ءجۇرمىن. شاتىردان سۋ ءوتىپ تۇر. ونى كوشىپ كەلگەندە ءوز قاراجاتىمىزعا جوندەتىپ الدىق. مىنە، بيىل اكىمدىككە ءۇشىنشى مارتە باردىم. ماسەلەمىز شەشىلەر ەمەس، اقتاۋدىڭ اكىمى كەلىپ، جاعدايىمىزدى ءوز كوزىمەن كورسە ەكەن،- دەيدى حۋرليما يۋسۋپوۆا.

بۇل ءۇي 1987-جىلى وڭىردەگى زاۋىت قىزمەتكەرلەرى ءۇشىن سالىنعان. ءاۋ باستا جاتاقحانا رەتىندە بەرىلگەن نىسان كەيىن تۇرعىنداردىڭ اتىنا زاڭداستىرىلعان. اكىمدىكتىڭ دە مەنشىگىنە جاتپايتىن ۇيگە ەندىگى جىلۋ جۇرگىزۋدىڭ ءوزى ۇلكەن ماسەلە بولىپ وتىر. ماماندار بۇل نىسان جەكە تۇرعىن ءۇي رەتىندە راسىمدەلگەندىكتەن، پاتەرلەرگە جىلۋ جۇرگىزۋ قيىنعا سوعىپ تۇرعانىن ايتادى.

- جىلۋ قۇبىرى ءۇيدىڭ جەرتولەسىنە كەلىپ تۇر. الايدا بۇل پاتەرلەر جەكەمەنشىك. سوندىقتان جىلۋ جۇيەسىن تارتۋ جۇمىسى «قايتارىمدى قاراجات» مەملەكەتتىك باعدارلاما ەسەبىنەن جۇرگىزىلەدى. قازىر ءۇي تەحنيكالىق ساراپتامادان ءوتىپ تۇر. ساراپتاما بويىنشا ۇيگە كۇردەلى جوندەۋ قاجەت دەگەن قورىتىندى الىندى. جوبالىق- سمەتالىق قۇجاتتاما دايىن بولعاننان كەيىن قاراجات بولۋگە رۇقسات بەرىلەدى. باعدارلاما نەگىزىندە جىلۋ، گاز جۇيەسىن، شاتىردى نەمەسە ءۇيدى تولىق جوندەۋدى تۇرعىنداردىڭ ءوزى تاڭداي الادى،- دەدى اقتاۋ قالالىق تۇرعىن- ءۇي ينسپەكتسياسى ءبولىمىنىڭ باسشىسى نۇرادين كوشەربايەۆ.

سونداي- اق اكىمدىكتەگىلەر گاز قۇبىرىن جۇرگىزۋ ءۇشىن ءتيىستى قۇجاتتاردى راسىمدەپ جاتقانىن ايتىپ وتىر. كەلەر جىلدىڭ بيۋدجەتىنەن قاراجات بولىنسە، بۇل داۋعا نۇكتە قويىلماق.