اقتاۋدا ءۇيىنىڭ كىرەبەرىسىن ۇلتتىق ناقىشتا بەزەندىرگەن تۇرعىن تاپسىرىستىڭ استىندا قالعان
اقتاۋ. KAZINFORM - اقتاۋدا 28-شاعىن اۋدانداعى 16- ءۇيدىڭ تۇرعىنى مەيرامگۇل تۇڭعاتاروۆا كوپقاباتتى ءۇيدىڭ ەكى قاباتىنىڭ قابىرعاسىنا كيىز ءۇيدىڭ كەرەگەسىن، قۇراق كورپەلەر جينالعان ساندىق پەن كونە جادىگەرلەردى سالىپ، كوپشىلىككە تانىلدى. سودان بەرى تۇرعىنداردان تاپسىرىس كوبەيگەن. ۇلتتىق ناقىشتا بالاباقشالاردىڭ قابىرعالارىن بەزەندىرۋگە دە سۇرانىستار تۇسكەن.
- تۇرعىن ءۇي - بۇل ءوزىمىزدىڭ ۇيامىز. ءوزىمىزدىڭ ءۇيىمىزدىڭ ماڭى تازا بولعانىن قالايمىز. مۇنداي ۇلتتىق ناقىشتاعى بەينەلەردى سالۋ ءۇشىن ءبىرىنشى ءوز پودەزىمىزدىڭ تۇرعىندارىنان رۇقسات الدىم. ال يدەيا مەكتەپتەگى جۇزەگە اسىراتىن جوبامنان تۋىندادى. تەك مەكتەپپەن شەكتەلمەي، ۇلتتىق ناقىشتاعى بەينەلەردى ءوزىم تۇرىپ جاتقان ءۇيدىڭ كىرەبەرىسىنە دە سالعىم كەلدى. نەگىزگى ماقسات - بالالارىمىزدى تازالىققا ۇيرەتىپ، ولاردىڭ بويىندا ۇلتتىق قۇندىلىقتاردى قالىپتاستىرۋ، - دەدى مەيرامگۇل تۇڭعاتاروۆا.
مەيرامگۇل تۇڭعاتاروۆا اقتاۋ قالاسىنداعى №20-مۇحتار اۋەزوۆ اتىنداعى جالپى ءبىلىم بەرەتىن مەكتەپتىڭ كوركەم ەڭبەك ءپانىنىڭ ءمۇعالىمى. ول مەكتەپتە ءوز قولىمەن ەتنواۋىل جاساعان.
- ارينە، ۇلتتىق قۇندىلىقتى كەيىنگى ۇرپاققا ناسيحاتتاي وتىرىپ، وسكەلەڭ ۇرپاعىمىزدى تاربيەلەۋ - ءاربىر ادامنىڭ مىندەتى دەپ سانايمىن. اقتاۋ قالاسىندا ادەمى ۇلتتىق ناقىشتاعى دۇنيەلەر كوپ بولعانىن قالايمىن. ماعان ەكى بالاباقشادان جانە جەكە ادامداردان تاپسىرىس ءتۇستى. ءبىراق مەكتەپتەگى جۇمىسىم بار. ۇلگەرمەيتىن بولعاسىن، كەلىسپەدىم، - دەيدى شەبەر.
كورشى-كولەمگە، بارشا اقتاۋلىقتارعا ۇلگى بولىپ، ەل بويىنشا ءجۇرىپ جاتقان «تازا قازاقستان» تازالىق شاراسىنا اتسالىسقان تۇرعىنعا قالا اكىمىنىڭ العىسى جاريالاندى.
بۇعان دەيىن اقتاۋدا «تازا قازاقستان» ەكولوگيالىق اكسياسى اياسىندا تەڭىز ءتۇبىن تازارتۋ جۇمىستارى باستالعانىن جازعان بولاتىنبىز.
اۆتور
اياگوز ءىزباساروۆا
