اقتاۋ اكىمىنىڭ ەكس-ورىنباسارى قازاقستانعا جەتكىزىلىپ، شىمكەنتتەگى تەرگەۋ يزولياتورىنا قامالدى
استانا. KAZINFORM - قارجىلىق مونيتورينگ اگەنتتىگى باس پروكۋراتۋرانىڭ ۇيلەستىرۋىمەن جانە ۇلتتىق قاۋىپسىزدىك كوميتەتىمەن بىرلەسە وتىرىپ، ىزدەۋدە بولعان تيمۋر ءسادۋاقاسوۆتى قازاقستان اۋماعىنا جەتكىزدى.
ول اسا ءىرى كولەمدە الاياقتىق جاساعانى جانە لاۋازىمدى تۇلعالارعا پارا بەرۋگە يتەرمەلەگەنى ءۇشىن كۇدىككە ىلىنگەن.
2023 -جىلعى شىلدە ايىندا تيمۋر ءسادۋاقاسوۆ پەن ادۆوكات قۇرمانبايەۆ س. ن. وزدەرىنىڭ قىزمەتتىك بايلانىسىن پايدالانىپ، دولگاليەۆ ۆ. ي. -دىڭ ىسكەرلىك سەرىكتەستەرىنە قاتىستى سوتقا دەيىنگى تەرگەۋ باستاۋ ماسەلەسىن شەشۋدى ۇسىنعان.
اتالعان ماسەلەنى شەشۋ ءۇشىن ءسادۋاقاسوۆ پەن قۇرمانبايەۆ س. ن.-عا زاڭسىز سىياقى رەتىندە 225 ميلليون تەڭگە بەرۋ جونىندە كەلىسىم جاسالعان. الايدا، كۇدىكتىلەر پارانىڭ العاشقى بولىگى - 90 ميلليون تەڭگەنى العاننان كەيىن بۇل قاراجاتتى ءوز پايداسىنا جاراتقان جانە ءوز مىندەتتەمەلەرىن ورىنداماعان.
كەيىن ءسادۋاقاسوۆ قىلمىستىق جاۋاپكەرشىلىككە تارتىلۋدان قاۋىپتەنىپ، سوتتان جاسىرىنعان.
ول مەملەكەتتىك شەكارانى زاڭسىز كەسىپ ءوتىپ، وزبەكستان رەسپۋبليكاسىنىڭ شەكارا قىزمەتى تاراپىنان ۇستالعان. سوعان بايلانىستى وعان قاتىستى شەكارانى زاڭسىز كەسىپ وتكەنى ءۇشىن قىلمىستىق ءىس قوزعالعان.
2025 -جىلعى 25- اقپاندا تۇركىستان وبلىسىنداعى «قاپلانبەك» شەكارا باقىلاۋ-وتكىزۋ پۋنكتىندە ول قارجىلىق مونيتورينگ اگەنتتىگىنىڭ قىزمەتكەرلەرىنە تاپسىرىلىپ، كەيىن شىمكەنت قالاسىنداعى تەرگەۋ يزولياتورىنا قامالدى.
جاقىن ارادا ول پاۆلودار قالاسىنداعى تەرگەۋ يزولياتورىنا جەتكىزىلەدى. اتالعان ءىس پاۆلودار وبلىسىنىڭ مامانداندىرىلعان اۋدانارالىق قىلمىستىق سوتىندا قاراستىرىلادى.
ىزدەۋدە جۇرگەن اقتاۋ اكىمىنىڭ بۇرىنعى ورىنباسارى وزبەكستاندا ۇستالعانىن جازعان بولاتىنبىز.
اۆتور
ەلميرا ورالبايەۆا
