اقمولالىق وقۋشىنىڭ اقىلدى ايالداما جوباسىن اكىمدىك ءىس جۇزىندە جۇزەگە اسىرماقشى
كوكشەتاۋ. KAZINFORM - اقمولا وبلىسىنىڭ شۋچە قالالىق مەكتەپ-ليتسەيىنىڭ 10-سىنىپ وقۋشىسى سۇلۋحان امانگەلدى اقىلدى ايالداما جوباسىن ازىرلەدى. قالا باسشىلىعى بۇل جوبانى ءىس جۇزىندە جۇزەگە اسىرماقشى.
ۇستازدارىنىڭ ايتۋىنشا، سۇلۋحان بۇل جوبانى ازىرلەۋدى ءبىر جارىم جىل بۇرىن باستاعان.
«قالامىزدا حالىق سانىنىڭ ارتۋى، جەكە كولىكتەردىڭ جانە اۆتوبۋستاردىڭ كوبەيۋى تۇرعىنداردىڭ قاتىناپ تۇرۋىنا ىڭعايسىزدىق تۋعىزۋدا. بۇعان قالامىزداعى ايالدامالاردىڭ جايسىزدىعى دا كەرى اسەر ەتىپ وتىر. وسى ماسەلەنى شەشۋ ءۇشىن وقۋشىمىز سۇلۋحان امانگەلدى اقىلدى ايالداما جوباسىن ازىرلەدى. ول بۇل جوبامەن 1,5 جىل اينالىستى. جوبادا كورسەتىلگەندەي، اقىلى ايالداما جولاۋشىلارعا قولايلى جاعداي جاساپ قانا قويمادى، قوعامدىق كولىكتى كۇتۋ ۋاقىتىن قىسقارتۋعا مۇمكىندىك بەرەدى»، - دەيدى جوبا جەتەكشىسى، ينفورماتيكا ءپانىنىڭ مۇعالىمى اسەل گابدۋللينا.
وقۋشى جوبانى قولعا الماس بۇرىن شەت ەلدەردىڭ تاجىريبەسىن زەرتتەگەن.
«بۇنداي ايالدامالار ا ق ش، نيدەرلاندى ەلدەرىندە قارقىندى دامىپ كەلە جاتىر. بىزدە ونى جەرىلىكتى اۋا رايىنا بەيىمدەۋ عانا قاجەت. ايالدامادا سەنسورلى اۆتوبۋستار كارتاسى، اۆتوبۋستاردى باقىلايتىن GPS داتچيكتەر، اۆتوبۋس كۇتۋ كەزىندە ۋاقىتتى ءتيىمدى پايدالانۋ ءۇشىن ونلاين كىتاپتار ۇسىنىلعان. كوفە ماشينا، تەلەفون قۋاتتاعىش روزەتكالار، بەينە-كامەرالار جانە اۆتوماتتى تۇردە قوسىلاتىن كونديتسيونەر بولادى. بۇنىڭ بارلىعى كىشى بيسنەسكە دە ۇلكەن كومەك. قارجىلىق جاعىنان ءوزىن-ءوزى اقتايدى. سونىمەن بىرگە جوبا مۇمكىندىگى شەكتەۋلى ادامداردىڭ قاجەتتىلىكتەرىن ەسكەرەدى، بۇل ونىڭ الەۋمەتتىك ماڭىزدىلىعىن كورسەتەدى»، - دەپ ءتۇسىندىردى وقۋشى.
وسى جوبامەن ءتۇرلى بايقاۋدا ءبىرىنشى ورىن العان ول شۋچە قالاسى اكىمىنىڭ قابىلداۋىندا بولعان. قالا باسشىلىعى جوبانى ىسكە اسىرۋعا ۋادە بەرگەن.
ايتا كەتسەك، بۇدان بۇرىن اقمولا وبلىسىندا مۇگەدەكتىگى بار ادامدار ءۇشىن 900 دەن استام نىسان بەيىمدەلگەنىن جازعان ەدىك.
