اقمولادا قىزدى زورلاپ، ولتىرگەن قىلمىسكەر 24 جىلدان كەيىن جازاسىن الدى
استانا. KAZINFORM - اقكول قالاسىندا 29 جاستاعى قىزدى ەرەكشە قاتىگەزدىكپەن زورلاپ، ولتىرگەن 61 جاستاعى ەر ادام 2002 -جىلدان بەرى ىزدەۋدە بولعان، دەپ حابارلايدى Kazinform ءتىلشىسى.
اقمولا وبلىسىنىڭ قىلمىستىق ىستەر بويىنشا مامانداندىرىلعان اۋدانارالىق سوتىندا 61 جاستاعى ايىپتالۋشىنىڭ ءىسى قارالدى. ول 2002 -جىلى قىزدى زورلاپ، ەرەكشە قاتىگەزدىكپەن ولتىرگەن.
- 2002 -جىلى تۇندە اقكول قالاسىندا 37 جاستاعى ي. 29 جاستاعى ا.-نى جولدا كولىك توقتاتىپ تۇرعان قىزعا قول كوتەرىپ، ولتىرەمىن دەپ قورقىتىپ، ونى جەرگىلىكتى ستاديون اۋماعىنا اپارىپ زورلاعان. قىلمىستى جاسىرۋ ماقساتىندا ونى ولتىرگەن. قىزدىڭ ءولىمى تۇنشىقتىرۋدان بولعان، - دەلىنگەن حابارلامادا.
قىلمىسكەر ءمايىتتى كوشەدەگى دارەتحاناعا تاستاپ، وقيعا ورنىنان قاشىپ كەتكەن. ونىڭ كىناسى كۋاگەرلەردىڭ ايعاقتارىمەن، فوتوسۋرەت ارقىلى انىقتاۋ، وقيعا ورنىن قاراۋ، ساراپتامالار مەن باسقا دا ماتەريالدار ارقىلى دالەلدەنگەن. سوت سونىمەن قاتار ايىپتالۋشىنىڭ بۇرىن بىرنەشە رەت سوتتالعانىن جانە اۋىر قىلمىس جاساعانىن ەسكەرگەن.
- سوت ۇكىمى بويىنشا ايىپتالۋشى 22 جىلعا باس بوستاندىعىنان ايىرىلدى. سونداي-اق، زارداپ شەككەن تاراپقا مورالدىق زيان رەتىندە 10 ميلليون تەڭگە وتەماقى تولەنۋگە مىندەتتەلدى، - دەلىنگەن سوت حابارلاماسىندا.
سونىمەن قاتار، سوت ايىپتالۋشىعا جازاسىن وتەۋ كەزىندە الكوگولگە بايلانىستى پسيحيكالىق جانە مىنەز-قۇلىق بۇزىلىستارىن ەمدەۋدى مىندەتتەدى. سوت ۇكىمى ءالى زاڭدى كۇشىنە ەنگەن جوق.
