اقمولا وبلىسىندا ورتا عاسىرلارعا جاتاتىن قورىمنان قولا اينا تابىلدى

كوكشەتاۋ. KAZINFORM - اقمولا وبلىسىندا ورتا عاسىرلارعا جاتاتىن التىنتاۋ IX قورىمىندا ارحەولوگيالىق قازبا جۇمىستارىنىڭ بارىسىندا مويىنعا تاعاتىن اسپالى قولا اينا تابىلدى.

اقمولا وبلىسىندا مادەنيەت باسقارماسىنىڭ باستاماسىمەن «جوشى ۇلىسىنىڭ 800 جىلدىعى» جانە ق ر كونستيتۋتسيا كۇنىنە وراي ارحەولوگيالىق قازبا جۇمىستارى جۇرگىزىلدى.

«قازبا جۇمىستارى زەرەندى اۋدانىنداعى ۆاسيلكوۆكا اۋىلىنىڭ وڭتۇستىك - شىعىسىندا، شاعالالى وزەنىنىڭ بويىندا ورنالاسقان ورتا عاسىرلارعا جاتاتىن التىنتاۋ IX قورىمىندا جۇرگىزىلگەن. وعان ارحەولوگ، ەۆرازيا ۇلتتىق ۋنيۆەرسيتەتىنىڭ ارحەولوگيا جانە ەتنولوگيا كافەدراسىنىڭ اعا وقىتۋشىسى دانيار تىلەۋقابىلوۆ، تاريحي-مادەني مۇرانى قورعاۋ جانە پايدالانۋ ورتالىعىنىڭ ديرەكتورى جاسۇلان ۇكەيەۆ، اقىن، ولكەتانۋشى الماس تەمىرباي جانە ەۆرازيا ۇلتتىق ۋنيۆەرسيتەتىنىڭ ماگيسترانتتارى مۇسا رىسبەرگەنوۆ، سۇلەيمان تلەكىشيەۆ، ءامىر تاگلەنوۆ، ارتۋر مۋحامەتزيانوۆ جانە وزەن ورتا مەكتەبىنىڭ مۇعالىمى شىنبولات ورالوۆ پەن وقۋشىلارى قاتىستى. قازبا جۇمىستارى بارىسىندا ادامنىڭ سۇيەكتەرى جانە مويىنعا تاعاتىن اسپالى قولا اينا تابىلدى»، - دەدى ۆەدومستۆودان.

ايتا كەتسەك، بۇدان بۇرىن اقمولا وبلىسىندا تاسقا قاشالعان كونە ارتەفاكت تابىلعانىن جازعان ەدىك.