اقمولا وبلىسىندا بالىقشىنىڭ قارماعىنا «تاريحي ارتەفاكت» ءىلىندى
استانا. KAZINFORM - اقمولا وبلىسىنىڭ قورعالجىن اۋدانى سابىندى اۋىلدىق وكرۋگى اۋماعىندا، نۇرا وزەنىندەگى شليۋز ماڭىندا الدىن الا دەرەكتەر بويىنشا مامونت سۇيەكتەرى تابىلدى، دەپ حابارلايدى Kazinform ءتىلشىسى.
قورعالجىن اۋدانىنىڭ ىشكى ساياسات ءبولىمىنىڭ مالىمەتىنشە، جەرگىلىكتى تۇرعىن لۇقمان-حاكىم قاسىموۆ بالىق اۋلاۋ كەزىندە قارماعىنا ادەتتەن تىس اۋىر زات ىلىنگەنىن بايقاعان. ول سۋدان شىعارىپ العان كەزدە، ونىڭ ءىرى سۇيەك ەكەنى، ءتىپتى مامونتتىڭ ازۋ تىستەرى بولۋى مۇمكىن ەكەنى انىقتالعان.
- بۇگىن بۇل بىرەگەي تاريحي ارتەفاكت قورعالجىن اۋداندىق ولكەتانۋ مۋزەيىنە تاپسىرىلدى. جاقىن ارادا ول ارنايى عىلىمي-زەرتتەۋ جۇمىستارىنا جىبەرىلەدى. بۇل زەرتتەۋ تابىلعان سۇيەكتەردىڭ قاي داۋىرگە جانە قاي جانۋارعا تيەسىلى ەكەنىن انىقتاۋعا كومەكتەسەدى. بۇل وقيعا ءوڭىر تاريحى ءۇشىن اسا قۇندى جاڭالىق بولدى. تابيعات پەن تاريحتىڭ مۇنداي توسىن سىيى ولكەمىزدىڭ باي مۇراسىنىڭ تاعى ءبىر دالەلى، - دەلىنگەن ۆەدومستۆو حابارلاماسىندا.
سونىمەن قاتار، اقمولا وبلىسى تاريحي-مادەني مۇرانى قورعاۋ جانە پايدالانۋ ورتالىعىنىڭ ديرەكتورى جاسۇلان ۇكەيەۆتىڭ پىكىرىنشە، مۇنداي جاعدايلار ەسىل، جاباي، نۇرا وزەندەرىنىڭ بويىندا ءجيى كەزدەسەدى جانە ولاردى زەرتتەۋ - پالەونتولوگتاردىڭ قۇزىرەتىندە. اقمولا وبلىسىندا پالەونتولوگتار جوق بولعانىمەن، بۇل جاڭالىق باسقا ءوڭىر ماماندارىنىڭ قىزىعۋشىلىعىن تۋدىرۋى مۇمكىن.
ايتا كەتەلىك س ق و-دا الىپ مامونتتىڭ سۇيەگى تابىلعان ەدى.
