اقمولا وبلىسى سۋ تاسقىنىمەن قالاي كۇرەسىپ جاتىر
استانا. KAZINFORM - اقمولا وبلىسى ت ج د توتەنشە جاعدايلاردىڭ الدىن الۋ باسقارماسىنىڭ باستىعى ەردەن بەرلىبەكوۆ وڭىردە سۋ تاسقىنىنا قارسى قانداي ءىس-شارالار قولعا الىنعانىن ايتىپ بەردى.
قازىرگى ۋاقىتتا وبلىس اۋماعىندا سۋ تاسقىنى تۇراقتى اۋىر رەجيمدە ءوتىپ جاتىر. كوكشەتاۋ قالاسىندا جەرگىلىكتى اۋقىمداعى توتەنشە جاعداي رەجيمى جاريالاندى.
سونداي-اق، تاسقىن قاۋپى بولعان ستەپنوگور قالاسى، ءبىرجان، اقكول، ەرەيمەنتاۋ جانە ەگىندىكول اۋداندارىندا جاعداي تۇراقتالدى.
«بۇل رەتتە، ەسىل، جارقايىڭ، شورتاندى، سەلينوگراد، ارشالى، بۇلاندى اۋداندارىندا سۋ تاسقىنى جاعدايى ءالى دە كۇردەلى بولىپ وتىر. ەسىل وزەنى مەن ونىڭ سالالارىندا - اتباسار، ساندىقتاۋ جانە استراحان اۋداندارىنداعى جاباي جانە كولۋتون وزەندەرىندەگى ەرىگەن سۋ دەڭگەيىنىڭ كوتەرىلۋىنەن ەلدى مەكەندەردى سۋ باسۋ قاۋپى ساقتالادى. اتالعان وڭىرلەردە سۋ تاسقىنىنا قارسى ءىس-شارالار، ونىڭ ىشىندە مۇز جارۋ جۇمىستارى بەلسەندى جۇرگىزىلۋدە. بيىل 29-ناۋرىزدان باستاپ 12 اۋداندا سۋ تاسقىنى قاۋپى بار 15 وزەن ۋچاسكەسىندە 4 توننادان استام جارىلعىش زات پايدالانىلدى»، - دەدى ە. بەرلىبەكوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
ونىڭ ايتۋىنشا، ەلدى مەكەندەردى قورعاۋ ءۇشىن ۇزىندىعى 32 شاقىرىم ۇيىندىلەر تۇرعىزىلىپ نىعايتىلدى، 18 شاقىرىم سۋ نىساندارىنىڭ جاعالاۋ سىزىعى، 5 شاقىرىم قورعانىس بوگەتتەرى سالىندى.
2 ميلليون تەكشە مەتردەن استام سۋ سورىلدى، ينەرتتى ماتەريال سالىنعان 150 مىڭنان استام قاپشىق توسەلدى، 200 شاقىرىمنان استام كانالدار مەن ارىقتار تازارتىلىپ، تەرەڭدەتىلدى جانە 1442 سۋ وتكىزۋ قۇرىلىسى تازارتىلدى.
اپاتتىق-قۇتقارۋ جۇمىسىنا 1269 ادام، 347 تەحنيكا، 16 قايىق، 108 موتوپومپا جۇمىلدىرىلدى.
ناتيجەسىندە 1225 ادام ەۆاكۋاتسيالاندى، ونىڭ ىشىندە 269 بالا بار.
بۇگىنگى تاڭدا ەۆاكۋاتسيالانعان 1035 تۇرعىن ۇيلەرىنە ورالدى.
18 مىڭنان استام مال ۋاقىتىلى ەۆاكۋاتسيالاندى، بۇل سۋ تاسقىنى كەزەڭىندە ولاردىڭ ولىمىنە جول بەرمەدى.
