اقشانى قانداي دەپوزيتكە سالعان ءتيىمدى
استانا. قازاقپارات - 2026 -جىلدىڭ ءبىرىنشى جارتىجىلدىعىنىڭ قورىتىندىسى بويىنشا جەكە تۇلعالاردىڭ ەكىنشى دەڭگەيلى بانكتەردەگى سالىمدارىنىڭ كولەمى العاش رەت 30 تريلليون تەڭگەدەن استى. ءبىر جىل ىشىندە بۇل سوما 18,5 پايىزعا، ياعني 4,7 تريلليون تەڭگەگە ءوستى، دەپ حابارلادى Ranking.kz.
سالىمشىلار ءالى دە كوبىنە جيناق دەپوزيتتەرىن تاڭدايدى. ولاردىڭ باسقا سالىم تۇرلەرىنەن باستى ارتىقشىلىعى - تابىستىڭ جوعارى بولۋى.
«اقشانى كەز كەلگەن ۋاقىتتا ەركىن شەشىپ الۋعا بولاتىن دەپوزيتتەردەن ايىرماشىلىعى، جيناق سالىمدارىندا قاراجاتتى مەرزىمىنەن بۇرىن الۋ شارتتارى قاتاڭىراق. سوندىقتان بانكتەر مۇنداي سالىمدار بويىنشا جوعارى سىياقى ۇسىنادى»، - دەپ جازدى پورتال.
جيناق دەپوزيتتەرىنىڭ تاعى ءبىر ماڭىزدى ارتىقشىلىعى - قازاقستاننىڭ دەپوزيتتەرگە كەپىلدىك بەرۋ قورى (ق د ك ب ق) تاراپىنان بەرىلەتىن كەپىلدىك مولشەرىنىڭ جوعارى بولۋى. تەڭگەدەگى جيناق سالىمدارى بويىنشا ءبىر بانكتەگى ءبىر سالىمشىعا بەرىلەتىن كەپىلدىكتىڭ ەڭ جوعارى سوماسى 20 ميلليون تەڭگەنى قۇرايدى. بۇل - دەپوزيتتىك ونىمدەر اراسىنداعى ەڭ جوعارى قورعانىس دەڭگەيى.
سالىستىراتىن بولساق، باسقا دەپوزيتتەر بويىنشا كەپىلدىكتىڭ شەكتى سوماسى تومەن: تەڭگەدەگى كارتوچكالار، شوتتار جانە جيناق دەپوزيتتەرىنە جاتپايتىن سالىمدار بويىنشا - 10 ميلليون تەڭگەگە دەيىن، ال شەتەل ۆاليۋتاسىنداعى دەپوزيتتەر بويىنشا - 5 ميلليون تەڭگەگە دەيىن.
«جيناق دەپوزيتتەرىندە باستى باسىمدىق تابىستىلىققا بەرىلەدى. قاراجاتتى ءىشىنارا الۋعا قويىلاتىن شەكتەۋلەر بانكتەرگە وزدەرىنىڭ رەسۋرستىق بازاسىن تيىمدىرەك جوسپارلاۋعا، ال سالىمشىلارعا جوعارى سىياقى الۋعا مۇمكىندىك بەرەدى. سوندىقتان مۇنداي ءونىم بەلگىلەنگەن مەرزىم ىشىندە قاجەت بولمايتىن قاراجاتتى ورنالاستىرۋعا قولايلى»، - دەيدى ساراپشىلار.
جيناق دەپوزيتىن اشقاندار تۇسەتىن تابىستى الدىن الا ەسەپتەي الادى. سالىمشى قاراجاتتى ورنالاستىرۋ مەرزىمىن، سىياقى مولشەرلەمەسىن جانە ءونىمنىڭ نەگىزگى شارتتارىن الدىن الا بىلەدى. ەگەر شارتتا سىياقىنى كاپيتالداندىرۋ كوزدەلسە، تابىس باستاپقى سالىم سوماسىنا عانا ەمەس، بۇعان دەيىن ەسەپتەلگەن سىياقىعا دا ەسەپتەلەدى.
نارىقتا دەپوزيتتەردىڭ باسقا دا تۇرلەرى، اتاپ ايتقاندا، مەرزىمدى جانە تالاپ ەتىلمەلى سالىمدار بار. ولاردىڭ نەگىزگى ايىرماشىلىعى - قاراجاتتىڭ قولجەتىمدىلىگى مەن تابىستىلىعىندا.
تالاپ ەتىلمەلى دەپوزيتتەر ادەتتە سالىمشىعا اقشاسىن ەركىنىرەك پايدالانۋعا مۇمكىندىك بەرەدى، الايدا ولار بويىنشا مولشەرلەمەلەر كوبىنە تومەن بولادى. ال مەرزىمدى دەپوزيتتەر وسى ەكەۋىنىڭ ورتاسىندا: قاراجاتتى بەلگىلى ءبىر مەرزىمگە ورنالاستىرۋعا ءارى سالىستىرمالى تۇردە يكەمدى شارتتاردى ساقتاۋعا مۇمكىندىك بەرەدى.
