Apple ءتورتىنشى توقساننىڭ قارجىلىق ەسەبىن جاريالادى
استانا. قازاقپارات - Apple كومپانياسى بەيسەنبى كۇنى 28-قىركۇيەكتە اياقتالعان قارجىلىق جىلدىڭ ءتورتىنشى توقسانىنىڭ ناتيجەسىن جاريالادى. كومپانيانىڭ كىرىسى 6 پايىزعا ارتىپ، 94,9 ميلليارد دوللارعا جەتكەن. بۇل وتكەن جىلمەن سالىستىرعاندا الدەقايدا كوپ. بۇل تۋرالى شينحۋا اگەنتتىگى جازدى.
كومپانيانىڭ توقسان سايىنعى تازا پايداسى ءبىر جىل بۇرىنعى 22,96 ميلليارد دوللاردان 14,74 ميلليارد دوللارعا دەيىن تومەندەگەنى ايتىلدى.
توقساندا اكسياعا شاققانداعى تاراتىلعان پايدا ءبىر جىل بۇرىنعى 1,46 دوللارمەن سالىستىرعاندا $0,97 قۇرادى.
iPhone ساتىلىمى ءبىر جىل بۇرىن 43,81 ميلليارد دوللار كىرىس كىرگىزسە، بيىلعى ساتىلىمنان تۇسكەن كىرىس 46,22 ميلليارد دوللارعا جەتكەن. Mac ساتىلىمى 7,61 ميلليارد دوللاردان 7,74 ميلليارد دوللارعا دەيىن، ال قىزمەتتەردەن تۇسكەن تابىس 22,31 ميلليارد دوللاردان 24,97 ميلليارد دوللارعا دەيىن وسكەن.
قارجىلىق ەسەپ بويىنشا Apple كومپانياسىنىڭ ۇلكەن قىتاي ايماعىنداعى تازا ساتىلىمى ءبىر جىل بۇرىنعى 15,08 ميلليارد دوللاردان 15,03 ميلليارد دوللارعا دەيىن تومەندەپ كەتكەن.
«بۇگىن Apple ءتورتىنشى توقسانداعى جاڭا رەكوردتىق كورسەتكىشتى جاريالادى. تابىسى 94,9 ميلليارد دوللارعا جەتىپ ولتىر. بۇل بىلتىرعى كورسەتكىشپەن سالىستىرعاندا 6 پايىزعا كوپ. وسى توقساندا ءبىز تۇتىنۋشىلارعا ەڭ ۇزدىك ونىمدەرىمىزدى ۇسىنامىز. ولار: جاڭا iPhone 16 جەلىسى، Apple Watch Series 10 ،AirPods 4 جانە ەستۋ دەنساۋلىعى مەن ۇيقى اپنوەىن انىقتاۋعا ارنالعان قىزىقتى مۇمكىندىكتەر»، - دەدى باس ديرەكتور تيم كۋك.
ەسكە سالا كەتەيىك، بۇعان دەيىن Apple كومپانياسى Telegram مەن WhatsApp قوسىمشاسىن قىتايدىڭ App Store دۇكەنىنەن الىپ تاستاعانىن جازعان بولاتىنبىز.
