انتيكور ازىق- تۇلىك باعاسىن ءوسىرۋ كەزىندەگى جەمقورلىقتى ەرەكشە باقىلاۋعا الادى

жемқорлық
Фото: Антикор

استانا. KAZINFORM - انتيكوردا جەمقورلىققا قارسى ءىس-قيمىلدىڭ جەكەلەگەن ماسەلەلەرى، ونىڭ ىشىندە ازىق-تۇلىك قاۋىپسىزدىگىن قامتاماسىز ەتۋ بويىنشا ءماجىلىس ءوتتى.

اگەنتتىك ءتوراعاسى اسحات جۇماعالي ماۋسىمارالىق كەزەڭدە ۇكىمەت الەۋمەتتىك ماڭىزى بار ازىق-تۇلىك ونىمدەرىنىڭ باعاسىن ۇستاپ تۇرۋعا جانە تۇراقتاندىرۋعا باعىتتالعان ءبىرقاتار شارالار قابىلداپ جاتقانىن اتاپ ءوتتى.

بۇل ماسەلە اسىرەسە سۋ تاسقىنىنان زارداپ شەككەن ايماقتار ءۇشىن وزەكتى.

اتاپ ايتقاندا، وزبەكستان مەن تاجىكستاننان جەتكىزۋشىلەردەن ازىق-تۇلىك اۋىل شارۋاشىلىعى تاۋارلارىن تىكەلەي جەتكىزۋ مۇمكىندىكتەرى پىسىقتالدى.

تاۋارلار تىكەلەي قازاقستاندىق نارىققا دەلدالدارسىز جانە الىپ ساتۋشىلارسىز جانە نەعۇرلىم قولجەتىمدى باعامەن جەتكىزىلەتىن بولادى.

وسىعان بايلانىستى، ا. جۇماعالي اۋماقتىق بولىمشەلەرگە جەمقورلىق تاۋەكەلدەرى مەن كورىنىستەرىن بولدىرماۋ ماقساتىندا اتالعان پروتسەستەرگە مونيتورينگ جۇرگىزۋدى تاپسىردى.

سىبايلاس جەمقورلىققا قارسى قىزمەت ورگاندارى كەز كەلگەن جەمقورلىق قۇقىق بۇزۋشىلىقتاردىڭ، ونىڭ ىشىندە زاڭسىز پايدا الۋعا باعىتتالعان ءتۇرلى قۇقىققا قارسى سحەمالاردى قۇرۋعا بايلانىستى قۇقىق بۇزۋشىلىقتاردىڭ جولىن كەسەدى.

باعا بەلگىلەۋگە تەرىس اسەر ەتەتىن جەمقورلىق فاكتورلارىنا، ونىڭ ىشىندە تاراپتاردىڭ ۇلەستەستىگىنە، مەملەكەتتىك اپپارات تاراپىنان نەگىزسىز اكىمشىلىك كەدەرگىلەر قۇرۋعا، نارىققا جوسىقسىز قاتىسۋشىلار تاراپىنان ايلا-شارعى جاساۋعا جانە تەرىس پايدالانۋعا ەرەكشە نازار اۋدارىلادى.

سىبايلاس جەمقورلىققا قارسى قىزمەت باسشىسى بۇل جۇمىستىڭ ماڭىزىن اتاپ ءوتىپ، اتالعان ماسەلەلەردى ەرەكشە باقىلاۋدا ۇستاۋدى تاپسىردى.

سوڭعى جاڭالىقتار