Anthropic ج ي- ءدى تەرىس پايدالانۋدىڭ جاڭا قاۋىپتەرىن انىقتادى - شەتەلدەگى قازاق باسپا ءسوزى

شىڭجاڭداعى ەڭ كونە اعاشتىڭ جاسى 15 عاسىردان اسادى - جەنمين جيباو

شىڭجاڭداعى كونە جانە قۇندى اعاشتاردىڭ سانى 31 مىڭ تۇپكە جەتتى. بۇل تۋرالى جەنمين جيباو اقپاراتتىق پورتالى شىڭجاڭ گازەتىنە سىلتەمە جاساپ حابارلادى.

اتالعان ب ا ق- تىڭ دەرەگىنشە، 15-قىركۇيەكتە شىڭجاڭ اۆتونوميالىق ولكەسىنىڭ ورمان شارۋاشىلىعى جانە جايىلىم باسقارماسى ءمالىم ەتكەن اقپاراتقا سايكەس، وڭىردە 30897 ءتۇپ كونە اعاش پەن 103 ءتۇپ قۇندى اعاش بار. سونداي-اق 36 اۋماقتا 16886 ءتۇپ اعاشتان تۇراتىن كونە اعاشتار شوعىرى انىقتالعان. وڭىردەگى ەڭ كونە اعاشتىڭ جاسى 15 عاسىردان اسادى، ياعني 1507-جىلعا جەتەدى.

جەنمين جيباو اقپاراتتىق پورتالىنىڭ مالىمەتىنشە، سوڭعى جىلدارى شىڭجاڭدا كونە جانە قۇندى اعاشتاردى قورعاۋ جۇمىستارى كۇشەيتىلگەن. ناتيجەسىندە جاعدايى ناشارلاعان كونە اعاشتاردىڭ تىرشىلىك قابىلەتىن قالپىنا كەلتىرۋگە مۇمكىندىك تۋعان.

قىتايداعى قانداسىمىز ءۇرىمجى مارافونىنىڭ چەمپيونى اتاندى - Harajorga

قىتايدا تۇراتىن قانداسىمىز ءۇرىمجى مارافونىندا توپ جاردى.

قىتايلىق Harajorga پورتالىنىڭ مالىمەتىنشە، 2026-جىلعى ءۇرىمجى مارافونى 13-قىركۇيەك كۇنى وتكەن. بيىل مارافونعا قاتىسۋشىلاردىڭ سانى العاش رەت 15 مىڭنان اسقان. ونىڭ 67 پايىزى ەلدىڭ باسقا ايماقتارى مەن كەنيا، كانادا سياقتى الىس-جۋىق شەت ەلدەردەن كەلگەن. تولىق مارافوندا 5000 جەلاياق جۇگىرگەن.

ەرلەر اراسىندا قىتايدا تۇراتىن قانداسىمىز، موڭعۇلكۇرە اۋدانىنىڭ تۋماسى ايقىن باقىتبەك ۇلى مارە سىزىعىن ءبىرىنشى بولىپ كەسىپ ءوتتى. ونىڭ فينيشكە جەتۋ ۋاقىتى - 2 ساعات 25 مينۋت 58 سەكۋند.

ايتا كەتەيىك، ايقىن باقىتبەك ۇلىنىڭ مارافونعا بۇل ەكىنشى رەت قاتىسۋى ەكەن.

قازاقستان مەن يران كاسپي ەكوجۇيەسىن قورعاۋ بويىنشا ىنتىماقتاستىقتى كۇشەيتەدى - Eurasia Today

قازاقستان مەن يران قورشاعان ورتانى قورعاۋ جانە كاسپيي تەڭىزىنىڭ ەكوجۇيەسىن ساقتاۋ باعىتىنداعى ىنتىماقتاستىقتى نىعايتۋعا نيەتتى.

بۇل تۋرالى وسى اپتادا قىرعىزستاندا شىعاتىن Eurasia Today اقپارات اگەنتتىگى حابارلادى.

كەلتىرىلگەن دەرەكتەرگە سۇيەنسەك، قر ەكولوگيا جانە تابيعي رەسۋرستار ءمينيسترى الىبەك قۋانتىروۆ يراننىڭ قازاقستانداعى ەلشىسى ءالي اكبار دجوۋكارمەن كەزدەسىپ، ەكى ەلدىڭ وسى سالاداعى ءوزارا ءىس-قيمىلىن دامىتۋ، ۆەدومستۆوارالىق بايلانىستى كۇشەيتۋ جانە ءوزارا تۇسىنىستىك تۋرالى مەموراندۋمعا قول قويۋ ماسەلەلەرىن تالقىلادى.

كەزدەسۋ بارىسىندا يران ەلشىسى ءمينيستردى 23-قىركۇيەكتە تەگەراندا وتەتىن تەگەران كونۆەنسياسىنا قاتىسۋشى ەلدەردىڭ قورشاعان ورتا مينيسترلەرى كەزدەسۋىنە شاقىردى.

تاراپتار كاسپيي تەڭىزىنىڭ ەكوجۇيەسىن ساقتاۋ ەكى ەل ءۇشىن ستراتەگيالىق ماڭىزى بار باعىت ەكەنىن اتاپ ءوتتى. سونىمەن قاتار ديپلوماتيالىق ميسسياسىنىڭ اياقتالۋىنا بايلانىستى ءالي اكبار دجوۋكارعا قازاقستان-يران بايلانىسىن دامىتۋعا قوسقان ۇلەسى ءۇشىن العىس ءبىلدىرىلدى.

سونداي-اق اپتا سوڭىنا قاراي Eurasia Today باسىلىمىندا «ءال-فارابي اتىنداعى قاز ۇ ۋ- دا «شاھريار - ماڭگىلىك پوەزيانىڭ ءۇنى» اتتى ادەبي كەش ءوتتى» دەگەن تاقىرىپتاعى اقپارات جارىق كوردى.

ءال-فارابي اتىنداعى قازاق ۇلتتىق ۋنيۆەرسيتەتى شىعىس تانۋ فاكۋلتەتىندە پارسى پوەزياسىنىڭ كورنەكتى وكىلى موحاممەد حوسسەين شاھرياردىڭ شىعارماشىلىعىنا ارنالعان كەش وتكەن.

ەۋرازيا تۋدەيدىڭ حابارلاۋى بويىنشا، 18-قىركۇيەك كۇنى شىعىس تانۋ فاكۋلتەتىندە الماتىداعى يراننىڭ باس كونسۋلدىعى جانە مادەني وكىلدىكتىڭ ۇيىمداستىرۋىمەن «شاھريار - ماڭگىلىك پوەزيانىڭ ءۇنى» اتتى ءىس-شارا ءوتتى.

«رۋحاني شارانىڭ باستى ماقساتى - ستۋدەنتتەردى شىعىس كلاسسيكالىق ادەبيەتىمەن تانىستىرۋ، ەكى ەل اراسىنداعى مادەني- گۋمانيتارلىق بايلانىستاردى نىعايتۋ جانە جاستاردىڭ پوەزياعا دەگەن قىزىعۋشىلىعىن ارتتىرۋ»، دەپ تۇيىندەيدى Eurasia Today.

تاشكەنتتە اۆتوبۋسپەن جولاۋشى تاسىمالداۋ بويىنشا رەكورد تىركەلدى – ءو ز ا

تاشكەنت قالاسىندا اۆتوبۋسپەن جولاۋشى تاسىمالداۋ بويىنشا رەكوردتىق كورسەتكىش تىركەلدى. 15-قىركۇيەكتە قالانىڭ قوعامدىق كولىگىن 1 ميلليون 520 مىڭ 113 جولاۋشى پايدالانعان. بۇل تۋرالى تاشكەنت قالاسى كولىك باسقارماسى حابارلادى، دەپ جازادى «ءو ز ا» اقپارات اگەنتتىگى.

حابارلامادا ايتىلۋىنشا، ۆەدومستۆو رەكوردتىق كورسەتكىشتىڭ ناقتى سەبەبىن اتاعان جوق. الايدا 14-قىركۇيەكتە جوعارى وقۋ ورىندارىندا ەكىنشى جانە ودان جوعارى كۋرس ستۋدەنتتەرى ءۇشىن جاڭا وقۋ جىلىنىڭ باستالۋى قوعامدىق كولىككە سۇرانىستىڭ ارتۋىنا اسەر ەتكەن بولۋى مۇمكىن. بۇل رەتتە اتالعان فاكتور رەكوردتىڭ سەبەبى رەتىندە رەسمي تۇردە راستالعان جوق.

سونداي-اق وسى اپتادا «ءو ز ا» - دا «استانادا قازاقستان مەن وزبەكستان تۋريزم فورۋمى ءوتتى» دەگەن تاقىرىپتاعى اقپارات جاريالاندى.

وزبەكستاندىق باسىلىمنىڭ مالىمەتىنە سۇيەنسەك، استانادا «وزبەكستان مەن قازاقستان: ستراتەگيالىق سەرىكتەستىك جانە جاڭا تۋريزم حابتارىن قالىپتاستىرۋ» تاقىرىبىندا تۋريزم فورۋمى ءوتتى. جيىنعا ەكى ەلدىڭ مەملەكەتتىك ورگاندارى، ديپلوماتيالىق كورپۋس، اۋە كومپانيالارى، تۋروپەراتورلار، قوناق ءۇي بيزنەسى جانە باق وكىلدەرىن قوسا العاندا، 300 گە جۋىق ادام قاتىستى. تاراپتار تىكەلەي اۋە قاتىناسىن كەڭەيتۋ، جاڭا تۋريستىك باعىتتاردى دامىتۋ جانە كولىك بايلانىسىن جەتىلدىرۋ ماسەلەلەرىن تالقىلادى. ءقازىر ەكى ەل اراسىندا اپتاسىنا 50 دەن استام تۇراقتى رەيس ورىندالادى، سوڭعى ءبىر جىلدا التى جاڭا باعىت اشىلعان. سونىمەن قاتار ءقوناقۇي بيزنەسى، مەديتسينالىق جانە ساۋىقتىرۋ، زيارات جانە گاسترونوميالىق تۋريزم سالالارىنداعى ىنتىماقتاستىق پەرسپەكتيۆالارى قارالىپ، بىرلەسكەن تۋريستىك ونىمدەر ازىرلەۋ جانە ەكى ەلدىڭ تۋريستىك الەۋەتىن ءۇشىنشى نارىقتاردا ىلگەرىلەتۋ ماسەلەلەرى ءسوز بولدى.

قىتاي-قازاقستان استىق ساۋداسى پلاتفورماسى ىسكە قوسىلدى - حالىق گازەتى

قىتاي مەن قازاقستان اراسىنداعى استىق ساۋداسىن دامىتۋعا باعىتتالعان ونلاين پلاتفورما ىسكە قوسىلدى. بۇل تۋرالى 5-قىركۇيەكتە وتكەن ەكى ەلدىڭ استىق كاسىپورىندارى وكىلدەرىنىڭ كەزدەسۋىندە جاريالاندى، دەپ حابارلايدى قىتايدىڭ حالىق گازەتى باسىلىمى.

اتالعان ب ا ق- تىڭ كەلتىرگەن دەرەگىنە سۇيەنسەك، پلاتفورما ەكى ەل اراسىنداعى استىق ساۋداسىن سيفرلاندىرۋعا جانە كاسىپورىندار اراسىنداعى ءوزارا بايلانىستى جەڭىلدەتۋگە باعىتتالعان. بيىل مامىر ايىندا قىتايدىڭ ۇلتتىق ازىق-تۇلىك جانە ستراتەگيالىق رەزەرۆتەر باسقارماسى مەن قازاقستاننىڭ اۋىل شارۋاشىلىعى مينيسترلىگى استىق سالاسىنداعى ىنتىماقتاستىق تۋرالى ءوزارا تۇسىنىستىك تۋرالى مەموراندۋمعا قول قويعان بولاتىن.

سونىمەن قاتار جاڭا پلاتفورمانى قىتايدىڭ ۇلتتىق ازىق- تۇلىك جانە ستراتەگيالىق رەزەرۆتەر باسقارماسىنىڭ استىق ساۋداسىن ۇيلەستىرۋ ورتالىعى مەن قازاقستاننىڭ ۇلتتىق استىق ساۋدا توبى بىرلەسىپ ازىرلەدى. ونىڭ كومەگىمەن ەكى ەلدىڭ كاسىپورىندارى استىق ساۋداسىن ونلاين جۇرگىزىپ، ساۋدا ۇدەرىستەرىن ستاندارتتاندىرۋعا جانە ءوزارا بايلانىس تيىمدىلىگىن ارتتىرۋعا مۇمكىندىك الادى.

سونداي-اق وسى اپتادا حالىق گازەتىندە «قىتاي-ورتالىق ازيا مادەني-تۋريستىك پويىزى تۇراقتى قاتىناي باستادى» دەگەن تاقىرىپتاعى اقپارات جاريالاندى.

كەلتىرىلگەن دەرەكتەرگە سۇيەنسەك، قىتايدىڭ سيان قالاسىنان قازاقستاننىڭ الماتى قالاسىنا قاتىنايتىن Y499 تۋريستىك پويىزى 14-قىركۇيەكتە العاشقى رەيسىنە شىقتى. بۇل قىتاي-ورتالىق ازيا مادەني-تۋريستىك پويىزىنىڭ تۇراقتى قاتىناسقا كوشكەنىن بىلدىرەدى. 15 كۇن 14 تۇنگە جوسپارلانعان ساپار «باياۋ ساياحات» قاعيداتىنا نەگىزدەلگەن. پويىز جۇمساق ۇيىقتايتىن كۋپەلەرمەن جابدىقتالىپ، جولاۋشىلارعا جول بويىندا جۇگىن قايتا تيەپ اۋرە بولمايتىن قىزمەت ءتۇرىن ۇسىنادى.

باعدارلاما ەكى باعىتتى قامتيدى. ءبىرىنشى باعىت قورعاس ارقىلى الماتىعا دەيىن جالعاسىپ، قازاقستاننىڭ تابيعاتى مەن مادەنيەتىمەن تانىسۋعا مۇمكىندىك بەرەدى. ەكىنشى باعىت شىڭجاڭداعى قاناس پەن دۋكۋ تاسجولى سياقتى تۋريستىك نىسانداردى قامتيدى. ساپار بارىسىندا ءداستۇرلى قولونەر مەن جىبەك جولىنىڭ مادەنيەتىنە ارنالعان شارالار ۇيىمداستىرىلادى. ءۇشىنشى تۋريستىك پويىزدىڭ قازان ايىنىڭ سوڭىندا جولعا شىعۋى جوسپارلانعان. ۇيىمداستىرۋشىلار تۇراقتى قاتىناس قىتاي مەن ورتالىق ازيا ەلدەرى اراسىنداعى مادەني جانە تۋريستىك بايلانىستاردى دامىتۋعا مۇمكىندىك بەرەتىنىن اتاپ ءوتتى.

Anthropic ج ي- ءدى تەرىس پايدالانۋدىڭ جاڭا قاۋىپتەرىن انىقتادى - TRT

جاساندى ينتەللەكت مۇمكىندىكتەرىنىڭ ارتۋى ونى كيبەرشابۋىلدار، باقىلاۋ جانە بيولوگيالىق قارۋ جاساۋعا باعىتتالعان زەرتتەۋلەر ءۇشىن پايدالانۋ ءقاۋپىن كۇشەيتىپ وتىر. بۇل تۋرالى Claude مودەلىن جاساعان Anthropic كومپانياسى مالىمدەدى، دەپ جازادى تۇركيا راديو تەلەۆيزيا پورتالى.

«TRT» - نىڭ دەرەگىنشە، 2025-جىلعى جەلتوقسان مەن 2026-جىلعى تامىز ارالىعىندا كومپانيا شپيوندىق باعدارلامالاردى ساتۋشىلار، ساياسي ماقساتتاعى تۇلعالار جانە مەملەكەت قولدايتىن ۇگىت- ناسيحات توپتارىنىڭ ج ي- ءدى تەرىس پايدالانۋ ارەكەتتەرىن انىقتاعان. Anthropic مالىمەتىنشە، ج ي كومەگىمەن كۇردەلى كيبەرشابۋىلدار ۇيىمداستىرۋ ءۇشىن بۇرىنعىداي جوعارى بىلىكتىلىك قاجەت بولماۋى مۇمكىن.

كومپانيا بيولوگيالىق قاۋىپتەرگە دە نازار اۋدارعان. Anthropic زەرتتەۋشىلەرى Claude-تان چيكۋنگۋنيا ۆيرۋسىنىڭ قاۋىپتىلىگىن ارتتىرۋى مۇمكىن زەرتتەۋگە گرانتتىق ءوتىنىم ازىرلەۋگە كومەك سۇرالعان جاعدايدى انىقتاپ، ونى بۇعاتتاعان. زەرتتەۋ ۆيرۋستىڭ جۇققىشتىعى مەن يممۋندىق جۇيەدەن جالتارۋ قابىلەتىن ارتتىرۋعا باعىتتالعان گەنەتيكالىق وزگەرىستەردى قاراستىرعان. كومپانيا مۇنداي جاعدايلاردى ج ي- ءدى تەرىس پايدالانۋدىڭ جاڭا ءارى الاڭداتارلىق تۇرلەرى دەپ اتاپ، ۇكىمەتتەر مەن تەحنولوگيالىق كومپانيالاردى قاۋىپتەردىڭ الدىن الۋ شارالارىن كۇشەيتۋگە شاقىردى.

التايداعى ءۇش مەكتەپ «كىتاپقۇمار مەكتەپ» اتاندى - «التاي اقپاراتى»

قىتايداعى قازاقتار كوپ قونىستانعان ءوڭىر التاي ايماعىنداعى ءۇش مەكتەپ شىڭجاڭ ۇيعىر اۆتونوميالىق ولكەسى دەڭگەيىندەگى «كىتاپقۇمار مەكتەپتەر» قاتارىنا ەندى. 15-قىركۇيەكتە جاريالانعان باعالاۋ قورىتىندىسىنا سايكەس، التاي قالاسىنداعى 3-ورتا مەكتەپ، قابا اۋدانىنداعى 1-باستاۋىش مەكتەپ جانە كوكتوعاي اۋدانى كۇرتى اۋىلىنداعى مالشىلارعا ارنالعان مەكتەپ اتالعان تىزىمنەن ورىن الدى. وسىلايشا، سوڭعى ءۇش جىلدا التاي ايماعىنداعى بەس مەكتەپ اۆتونوميالىق ولكە دەڭگەيىندەگى «كىتاپقۇمار مەكتەپ» رەتىندە باعالانعان. بۇل تۋرالى «التاي اقپاراتى» باسىلىمى حابارلادى.

قىتايلىق ب ا ق- تىڭ دەرەگىنە سۇيەنسەك، باعالاۋ مەكتەپتىڭ كىتاپ وقۋ باعدارلاماسى، كىتاپحانا جاعدايى، وقۋ ۇدەرىسىنە كىتاپ وقۋدى ەنگىزۋ، مۇعالىمدەردىڭ وقۋشىلارعا كىتاپ وقۋعا باعىت- باعدار بەرۋى، ءداستۇرلى مادەنيەتتى ناسيحاتتاۋ، كىتاپ وقۋ ورتاسىن قالىپتاستىرۋ جانە سيفرلىق رەسۋرستاردى پايدالانۋ، كلاسسيكالىق شىعارمالاردى وقۋ، وي جۇگىرتۋ سياقتى جەتى باعىت بويىنشا جۇرگىزىلەدى.

ايتا كەتەيىك، 2024-جىلى التاي قالاسىنداعى تاجىريبەلىك باستاۋىش مەكتەپ، 2025-جىلى بۋرىلتوعاي اۋدانىنداعى 2-باستاۋىش مەكتەپ وسى اتاققا يە بولسا، بيىل تاعى ءۇش مەكتەپ قاتارىنان تىزىمگە ەندى.