انتاليادا قازاقستاندىق ىسكەر ادامدار قاۋىمداستىعى قۇرىلدى
انتاليادا قازاقستاندىق ىسكەر ادامدار قاۋىمداستىعىنىڭ رەسمي اشىلۋى ءوتتى. شاراعا قازاقستان رەسپۋبليكاسىنىڭ باس كونسۋلدىعى مۇرىندىق بولدى، دەپ حابارلايدى ق ر س ءى م باسپا ءسوز قىزمەتى.
بۇل قاۋىمداستىق انتاليادا تۇراتىن قازاقستاندىقتاردىڭ باستاماسىمەن ق ر ازاماتتارىن ەرىكتى نەگىزدە بىرىكتىرۋ جانە جالپى بەيىمدەلۋ ماسەلەلەرىندە وتانداستارعا كومەك كورسەتۋ، سونىڭ ىشىندە انا ءتىلىن، مادەنيەتىن، داستۇرلەرى مەن ادەت-عۇرىپتارىن قولداۋ ماقساتىندا قۇرىلعان.
قاۋىمداستىق پرەزيدەنتى دينارا مۋرزاعالييەۆا جاڭا قاۋىمداستىقتىڭ قىزمەتىن دامىتۋ جوسپارلارىمەن ءبولىستى. اتاپ ايتقاندا، جاقىن ارادا قازاق ءتىلى مەن قازاقستان تاريحىن تەگىن نەگىزدە وقىتاتىن كۋرستاردى اشۋ جوسپارلانىپ وتىرعانىن ايتتى.
ءىس-شاراعا الانيا مەن ىستانبۇلداعى قازاقستاندىق بىرلەستىكتەردىڭ وكىلدەرى، سونداي-اق انتالياداعى ءبىرقاتار شەت ەلدەرى قاۋىمداستىقتارىنىڭ جەتەكشىلەرى قاتىستى.
قاۋىمداستىقتىڭ رەسمي اشىلۋىندا قازاقستان رەسپۋبليكاسىنىڭ انتالياداعى باس كونسۋلى قۋات كانافەيەۆ وتانداستاردى وسى ماڭىزدى ساتپەن قۇتتىقتاپ، جوسپارلارىنىڭ ءساتتى جۇزەگە اسۋىن تىلەدى.
