ۋگاندا 40 جىلدان كەيىن ەلدەگى ۇلتتىق پارككە ءمۇيىزتۇمسىقتاردى قايتارا باستادى
استانا. KAZINFORM - ۋگاندادا وڭتۇستىك اق ءمۇيىزتۇمسىقتاردىڭ العاشقى ەكى باسى ەلدىڭ سولتۇستىك- شىعىسىنداعى كيدەپو-ۆەللي ۇلتتىق پاركىنە جەتكىزىلدى.
بۇل - اتالعان اۋماقتا ءمۇيىزتۇمسىقتار جوعالىپ كەتكەننەن كەيىنگى 40 جىلدان استام ۋاقىتتان كەيىنگى العاشقى قايتارۋ شاراسى بولدى. بۇل تۋرالى TV BRICS حابارلادى.
جالپى العاندا، ەلدىڭ سولتۇستىك-شىعىسىنداعى قورىق ايماعىنا زيۆا ءمۇيىزتۇمسىقتار پانالىعىنان كەزەڭ- كەزەڭىمەن سەگىز جانۋار كوشىرىلەدى. زيۆا - ۋگاندادا اق ءمۇيىزتۇمسىقتار پوپۋلياتسياسىن قالپىنا كەلتىرۋ ءۇشىن ارنايى قۇرىلعان بىرەگەي قورعالاتىن اۋماق.
بۇرىن ءمۇيىزتۇمسىقتار بۇل پارك اۋماعىندا كەڭىنەن مەكەندەگەن. الايدا سوڭعىسى 1983-جىلى جوعالىپ كەتكەن.
ۋگاندانىڭ جابايى تابيعاتتى قورعاۋ باسقارماسىنىڭ (Uganda Wildlife Authority, UWA) اتقارۋشى ديرەكتورى دجەيمس مۋسينگۋزي بۇل وقيعا كيدەپوداعى ءمۇيىزتۇمسىقتار تاريحىنىڭ جاڭا كەزەڭىنىڭ باستالعانىن اتاپ ءوتتى. ونىڭ ايتۋىنشا، بيلىك الداعى ۋاقىتتا پارك اۋماعىندا وزدىگىنەن كوبەيىپ، تۇراقتى ءومىر سۇرەتىن پوپۋلياتسيا قالىپتاستىرۋدى جوسپارلاپ وتىر.
جانۋارلاردى كوشىرۋ بىرنەشە جىلعا سوزىلعان زەرتتەۋلەردەن كەيىن مۇمكىن بولدى. ماماندار مەكەن ەتۋ ورتاسىنىڭ جارامدىلىعىن، ەكولوگيالىق جاعدايلاردى جانە ءتۇردى ءساتتى قايتا بەيىمدەۋ ءۇشىن قاجەت قاۋىپسىزدىك تالاپتارىن جان-جاقتى باعالاعان.
پارك اۋماعىندا قورعالاتىن ارنايى رەزەرۆات قۇرىلدى. وندا پەريمەترلىك قورشاۋ، كىرمە جولدار، تابيعاتتى قورعاۋ ماماندارى - رەيندجەرلەرگە ارنالعان بەكەتتەر، سۋ ينفراقۇرىلىمى جانە مونيتورينگ جۇيەلەرى جاساقتالعان. بۇل شارالار جانۋارلاردىڭ قاۋىپسىزدىگىن قامتاماسىز ەتىپ، جاڭا ورتاعا بەيىمدەلۋىنە كومەكتەسەدى.
پارككە جەتكىزىلگەننەن كەيىن ءمۇيىزتۇمسىقتار الدىمەن ارنايى دايىندىقتان وتكەن رەيندجەرلەر مەن ۆەتەرينارلىق توپتاردىڭ ءجىتى باقىلاۋىندا بولادى. كەيىن ولاردى پاركتىڭ كەڭىرەك اۋماقتارىنا كەزەڭ-كەزەڭىمەن جىبەرەدى.
ساراپشىلاردىڭ پىكىرىنشە، ءمۇيىزتۇمسىقتاردىڭ قايتا ورالۋى ەكولوگيالىق تەپە- تەڭدىكتى نىعايتىپ، بيوالۋانتۇرلىلىكتى ساقتاۋ بويىنشا ۇلتتىق جانە وڭىرلىك ماقساتتارعا قول جەتكىزۋگە ىقپال ەتەدى.
ۋگاندادا ءمۇيىزتۇمسىقتار پوپۋلياتسياسىن قالپىنا كەلتىرۋ باعدارلاماسى 2005 -جىلى باستالعان. ول كەزدە بۇل ءتۇر ەلدىڭ جابايى تابيعاتىنان تولىق جويىلىپ كەتكەننەن كەيىن زيۆا قورىق ايماعىندا جانۋارلاردى قولدان ءوسىرۋ باستاماسى ىسكە قوسىلعان ەدى.
ەسكە سالا كەتسەك، موڭعوليا سيرەك كەزدەسەتىن جانۋارلار مەن قۇستار ءتىزىمىن جاڭارتتى.
