امبەباپ بانكتەردە «يسلام تەرەزەلەرىن» اشۋعا مۇمكىندىك بەرىلمەك

استانا. KAZINFORM - قارجى نارىعىن رەتتەۋ جانە دامىتۋ اگەنتتىگى مەملەكەت باسشىسىنىڭ تاپسىرماسىمەن ازىرلەنەتىن «بانكتەر تۋرالى» جاڭا زاڭنىڭ نەگىزگى نوۆەللالارىن اتادى.

«مەملەكەت باسشىسى 2024 -جىلعى 2-قىركۇيەكتەگى «ادىلەتتى قازاقستان: زاڭ جانە ءتارتىپ، ەكونوميكالىق ءوسىم، قوعامدىق وپتيميزم» اتتى قازاقستان حالقىنا جولداۋىندا ەكونوميكالىق بەلسەندىلىكتى ىنتالاندىرۋ جانە قارجى-تەحنولوگيالىق سەكتوردىڭ سەرپىندى دامۋى جونىندەگى زاماناۋي تالاپتارعا سايكەس كەلەتىن «بانكتەر تۋرالى» جاڭا زاڭدى ازىرلەۋ قاجەتتىلىگى تۋرالى اتاپ ءوتتى. تاپسىرمانى ىسكە اسىرۋ ءۇشىن اگەنتتىك جاڭا زاڭ ازىرلەۋ جانە بانك سەكتورىن رەتتەۋدىڭ جاڭا تاسىلدەرىن ايقىنداۋ بويىنشا جۇمىس جۇرگىزۋدە. جاڭا زاڭدى ازىرلەۋ ۇلتتىق بانكپەن جانە باسقا دا مۇددەلى مەملەكەتتىك ورگاندارمەن، بانك سەكتورىمەن بىرلەسىپ جۇزەگە اسىرىلاتىن بولادى»، - دەپ اتاپ ءوتتى اگەنتتىكتەن رەداكسيانىڭ رەسمي ساۋالىنا بەرگەن جاۋابىندا.

«بانكتەر تۋرالى» جاڭا زاڭ ەكونوميكالىق بەلسەندىلىكتى ىنتالاندىرۋدىڭ جانە قارجى- تەحنولوگيالىق سەكتوردىڭ ودان ءارى سەرپىندى دامۋىنىڭ وزەكتى مىندەتتەرىن شەشۋگە باعىتتالادى.

اگەنتتىك مالىمەتىنشە، جاڭا زاڭدا مىناداي نەگىزگى نوۆەللالار بولادى:

- ەنشىلەس شەتەلدىك بانكتەر مەن بەيرەزيدەنت-بانكتەردىڭ فيليالدارىن اشۋدى ىرىقتاندىرۋ؛

- ەكىنشى دەڭگەيدەگى بانكتەردى پروپورتسيونالدى رەتتەۋدى ەنگىزۋ؛

- امبەباپ بانكتەردە «يسلام تەرەزەلەرىن» اشۋعا مۇمكىندىك بەرۋ؛

- تولەمگە قابىلەتسىز بانكتەردى رەتتەۋ تەتىگىن جەتىلدىرۋ؛

- بانكتەردىڭ حالىقپەن جانە بيزنەسپەن جۇمىسىنىڭ ءىس-قيمىل ستاندارتتارىن ەنگىزۋ؛

- قارجى-تەحنولوگيالىق كومپانيادا بانكتەردى ترانسفورماتسيالاۋ ءۇشىن جاعداي جاساۋ.