الەمدىك مۇناي قورى نەبارى ءۇش ايعا جەتەدى - Goldman Sachs
استانا. قازاقپارات - Goldman Sachs مالىمەتىنشە، الەمدىك مۇناي قورى كۇرت ازايىپ، سەگىز جىلدىق ەڭ تومەنگى دەڭگەيگە جاقىنداپ كەلەدى، ال ورمۋز بۇعازى ارقىلى جەتكىزىلەتىن مۇناي كولەمى شەكتەۋلى بولعاندىقتان ونىڭ سارقىلۋ قارقىنى الاڭداۋشىلىق تۋدىرىپ وتىر، دەپ حابارلايدى Reuters.
الەمدەگى ەڭ ءىرى ينۆەستيتسيالىق بانكتەردىڭ ءبىرىنىڭ مالىمەتىنشە، قويمالارداعى مۇنايدىڭ جالپى الەمدىك قورى تەك 101 كۇندىك تۇتىنۋعا جەتەدى. بۇل كورسەتكىش مامىر ايىنىڭ سوڭىنا قاراي 98 كۇنگە دەيىن تومەندەۋى مۇمكىن.
بانكتىڭ باعالاۋىنشا، مۇناي ونىمدەرىنىڭ الەمدىك قورى ا ق ش پەن يزرايلدىڭ يرانعا قارسى سوعىسىنا دەيىنگى 50 ميلليون دوللاردان قازىرگى كەزدە 45 ميلليون دوللارعا دەيىن قىسقارعان.
Goldman Sachs اتاپ وتكەندەي، جالپى الەمدىك قور «وسى جازدا ەڭ تومەنگى وپەراتسيالىق دەڭگەيگە جەتۋى ەكىتالاي، ءبىراق كەيبىر ايماقتاردا جانە كەيبىر ونىمدەر بويىنشا مۇناي قورىنىڭ ازايۋى مەن جەتكىزىلىم شىعىندارى الاڭداۋشىلىق تۋدىرىپ وتىر».
SP تالداۋشىلارىنىڭ مالىمەتىنشە، سۇرانىستىڭ تومەندەۋىنە قاراماستان ءساۋىر ايىندا مۇناي قورى تاۋلىگىنە ورتا ەسەپپەن 6,6 ميلليون باررەلگە تومەندەدى، بۇل باقىلاۋ جۇرگىزۋدىڭ بۇكىل تاريحىندا رەكوردتىق ەڭ ۇلكەن ەكىنشى تومەندەۋ. مۇنايعا سۇرانىستىڭ كۇرت تومەندەۋى كوروناۆيرۋس پاندەمياسى كەزىندە عانا بولدى.
Financial Times اتاپ وتۋىنشە، نەگىزگى اسەردى ازىرگە كوبىنە ازيا ەلدەرى سەزىنگەنىمەن، ا ق ش- تاعى بەنزين قورى جازعى دەمالىس ماۋسىمىنىڭ شىڭىندا تاريحي تومەن دەڭگەيگە جەتۋى مۇمكىن.
ايتا كەتەيىك، بۇعان دەيىن مۇناي باعاسى ا ق ش پەن يران اراسىنداعى كەلىسسوزدىڭ وتكىزىلمەۋىنە بايلانىستى كۇرت وسكەنىن جازدىق.
سونداي-اق يران ا ق ش- تىڭ تەڭىز بلوكاداسى اياسىندا مۇناي قويمالارىنىڭ تولىپ كەتۋىنە جول بەرمەۋ ءۇشىن مۇناي ءوندىرۋ كولەمىن قىسقارتىپ جاتقانىن جازدىق.
قازاقستان مۇناي وڭدەۋدى 39,2 ميلليون تونناعا دەيىن ارتتىرۋدى كوزدەيدى.
