پاۆلودارلىق شەنەۋنىكتەر جەتىم جىگىتتى ءۇي كەزەگىنەن الىپ تاستاعان

پاۆلودار. KAZINFORM - جەتىمدەر ۇيىندە تاربيەلەنىپ شىققان ازامات كامەلەت جاسىنا تولعان سوڭ ەكىباستۇزعا بارىپ جۇمىس ىستەگەن. ونىڭ سول جاقتا ۋاقىتشا تىركەلۋىنە بايلانىستى جەرگىلىكتى كوميسسياعا باسپاناعا تۇرعان كەزەگىنىڭ كۇشىن جويىپ تاستاعان.

жалдамалы пәтер
فوتو: pixabay.com

پاۆلودار وبلىسىنىڭ مامانداندىرىلعان اۋدانارالىق ەكونوميكالىق سوتىندا تۇرعىن ءۇي كەزەگىنەن زاڭسىز شىعارىپ تاستاۋ فاكتىسى بويىنشا سوت ءىسى قارالدى.

بەلگىلى بولعانداي، تالاپ قويۋشى پاۆلودار قالاسىندا 2009-2016 -جىلدار ارالىعىندا جەتىم بالالارعا ارنالعان مەكتەپ-ينتەرناتتا تاربيەلەنگەن.

سول كەزەڭدە مەملەكەتتىك تۇرعىن ءۇي قورىنان باسپانا الۋعا كەزەككە قويىلعان. كامەلەتكە تولعان سوڭ پاۆلودار قالاسىندا جالدامالى باسپانادا تۇرا باستايدى.

ال جۇمىسقا تۇرۋ ءۇشىن ەكىباستۇز قالاسىندا ۋاقىتشا تىركەلگەن. ءبىراق تۇراقتى تۇرعىلىقتى جەرى بولماعان.

ءوز كەزەگىندە پاۆلودار قالالىق تۇرعىن ءۇي كوميسسياسى تالاپ قويۋشىنى باسقا ەلدى مەكەنگە تۇراقتى تۇرۋعا كەتۋىنە بايلانىستى كەزەكتەن شىعارۋ تۋرالى شەشىم قابىلداعان.

«سوت شەشىمىمەن تالاپ قويۋشىنىڭ تۇرعىن ءۇي قۇقىعى قالپىنا كەلتىرىلدى. سەبەبى جۇمىس ورنى بويىنشا ۋاقىتشا تىركەۋگە تۇرۋ ازاماتتىڭ تۇراقتى تۇرعىلىقتى جەرى بولىپ تابىلمايدى. سوت تۇرعىنجايعا مۇقتاج دەپ تانىلعان جانە تۇرعىنجاي العانعا دەيىن ەسەپكە قويىلعان جەتىم بالالار مەن اتا-اناسىنىڭ قامقورلىعىنسىز قالعان بالالار ەسەپتەن شىعارىلىپ تاستالۋعا جاتپايتىندىقتان «تۇرعىن ءۇي قاتىناستارى تۋرالى» زاڭنىڭ 73-بابى 1-تارماعىنىڭ نورمالارىن قولدانۋدى ورىندى جانە ءادىل دەپ سانادى» دەپ حابارلادى پاۆلودار وبلىستىق سوتىنىڭ باسپا ءسوز قىزمەتىنەن.

سوت اكتىسى زاڭدى كۇشىنە ەندى.

ەسكە سالا كەتەيىك، بۇعان دەيىن اليمەنت بەرەشەگىن ازايتىپ كورسەتكەن پاۆلودارلىق سوت ورىنداۋشىلارى جازالانعانىن جازعان ەدىك.

اۆتور
مۇرات اياعان

سوڭعى جاڭالىقتار