پاۆلوداردا وقۋشىنى ۇشكىر زاتپەن تۇيرەپ وتكەن مۇعالىم كىناسىز دەپ تانىلدى

پاۆلودار. KAZINFORM - پوليتسيا سوتقا دەيىنگى ءوندىرىستى توقتاتىپ، وقۋشىنى ارقاسىنان وتكىر زاتپەن تۇيرەگەن ۇستاز دەنە جاراقاتىن سالماعان دەگەن قورىتىندى جاسادى.

بيىلعى قاڭتار ايىندا پاۆلودار قالاسىندا تاقتا الدىنا شىققان وقۋشىنى ماتەماتيكا مۇعالىمى ارقاسىنان ۇشكىر زاتپەن (بۇراندالى شەگەمەن) تۇيرەپ كەتكەنى تۋرالى وقيعا الەۋمەتتىك جەلى قولدانۋشىلارىن شۋلاتقان ەدى.

- اتالعان وقيعا بويىنشا سوتقا دەيىنگى تەرگەۋ شارالارى اياقتالىپ، ءىس توقتاتىلدى. ماتەريالدار وندىرىسىندە بۇل ءىستىڭ قۇرامىندا قىلمىستىق زاڭبۇزۋشىلىقتىڭ جوق ەكەنى انىقتالدى. كامەلەتكە تولماعان ەر بالاعا دەنە جاراقاتىن كەلتىرۋدىڭ قانداي دا ءبىر دەرەكتەرى انىقتالماعانى سوت-مەديتسينالىق ساراپتامانىڭ قورىتىندىسىمەن، كامەلەتكە تولماعاندى كۋالاندىرۋدى جۇرگىزگەن ساراپشىنىڭ جاۋاپ الۋ حاتتاماسىمەن جانە كابينەتتەن تۇسىرىلگەن بەينەجازبا ارقىلى راستالدى، - دەپ حابارلادى وڭىرلىك پوليتسيا دەپارتامەنتىنىڭ باسپا ءسوز قىزمەتىنەن.

ەسكە سالا كەتەيىك، وقيعا قاڭتار ايىندا، پاۆلودارداعى 26-مەكتەپتىڭ  9- سىنىبىندا الگەبرا ساباعى ءجۇرىپ جاتقاندا بولعان.

ماتەماتيكا ءپانىنىڭ مۇعالىمى تاقتاعا شىعىپ، تاپسىرمانى شەشىپ تۇرعان ەر بالانىڭ ارتىنان كەلىپ، الدەنەمەن تۇيرەپ وتەدى. بەينەجازبادان وقۋشىنىڭ اۋىرسىنىپ قالعانى بايقالادى ءارى ونىڭ الدىندا مۇعالىمنىڭ شكافقا جاقىنداپ كەلىپ، ودان بۇراندالى شەگەنى (شۋرۋپ) بوساتىپ العانى دا كامەراعا ءتۇسىپ قالعان.

پوليتسيا قىلمىستىق ءىس قوزعاپ، مەكتەپ اكىمشىلىگى اتالعان مۇعالىممەن ەڭبەك شارتىن بۇزىپ، جۇمىستان شىعارىپ جىبەرگەن ەدى.

الەۋمەتتىك جەلى قولدانۋشىلارى مەكتەپ باسشىلىعىنىڭ شەشىمى دۇرىس ەمەس دەگەن بايلام جاسادى. ال مەكتەپ اتا-انالارى ۇستازدى قولداۋ ءۇشىن قول جيناماق بولدى.

اقىر-سوڭى پەداگوگ وقۋشىنىڭ اتا-اناسىنان كەشىرىم سۇراپ، ارادا ەكى كۇن وتكەندە جۇمىسقا قايتادان الىندى.

اۆتور

مۇرات اياعان