پاۆلوداردا قىستا قانداي اڭداردى اۋلاۋعا رۇقسات بار

پاۆلودار. KAZINFORM - پاۆلودار وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى بيىلعى 1-قاراشادان 2025 -جىلدىڭ 15-اقپانىنا دەيىن تۇلكى، قارساق جانە قويانداردى اۋلاۋ ماۋسىمى اشىلعاندىعىن حابارلادى.

پاۆلوداردا تۇلكى، قارساق جانە قوياندى اۋلاۋعا اڭشىلىق ماۋسىم اشىلدى. سونداي- اق 31-جەلتوقسانعا دەيىن جابايى تۇياقتى جانۋارلاردى - قاباندار مەن ەلىكتەردى اۋلاۋ جالعاسادى. تۇياقتى جانۋارلاردى اۋلاۋ ءتيىستى اڭشىلىق شارۋاشىلىعى سۋبەكتىسى قورىقشىسىنىڭ قاتىسۋىمەن جۇرگىزىلەدى.

«اڭ اۋلاۋ كەزىندە ءاربىر اڭشىنىڭ وزىمەن بىرگە رۇقسات بەرۋ قۇجاتتارى بولۋى ءتيىس: اڭشى كۋالىگى، اڭ اۋلاۋعا جولداما نەمەسە اڭشىلىق شارۋاشىلىعى ۇيىمىنىڭ جانۋارلار دۇنيەسىن پايدالانۋعا رۇقسات، اتىس قارۋىن الىپ جۇرۋگە جانە ساقتاۋعا رۇقسات، اڭ اۋلايتىن جىرتقىش قۇستاردىڭ پاسپورتى. اڭشىلىققا بەرىلگەن جولداما نەمەسە جانۋارلار دۇنيەسىن پايدالانۋعا رۇقسات اڭشىلىق شارۋاشىلىعى سۋبەكتىسىنىڭ اۋماعىندا جانۋارلاردىڭ باسقا تۇرلەرىنە، اتاپ ايتقاندا، قاسقىرلاردى، شيبورىلەردى، قارعالاردى، ساۋىسقانداردى، ۇلكەن سۋقۇزعىنداردى، تاعانداردى، قاڭعىباس يتتەردى اۋلاۋعا (اتۋ) جەكە رۇقساتتى تالاپ ەتپەيدى»، - دەپ مالىمدەدى پاۆلودار وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسىنان.

2024-2025 -جىلدار ماۋسىمىندا پاۆلودار وبلىسىنداعى جابايى جانۋارلاردى اۋلاۋعا ارنالعان كۆوتا - 49,9 مىڭ داراق. ونىڭ ىشىندە 187 تۇياقتى جانۋار، 7980 تەرىسى باعالى اڭ، 41825 قۇس.

اۋماقتا باياناۋىل مەملەكەتتىك ۇلتتىق تابيعي پاركىنىڭ « قىزىلتاۋ» مەملەكەتتىك قاۋمالىندا، «ەرتىس ورمانى» ورمان رەزەرۆاتى مەن «ەرتىس وزەنىنىڭ جايىلماسى» قاۋمالىندا اڭ اۋلاۋعا تىيىم سالىنعان.

بۇعان دەيىن پاۆلودار وبلىسىندا كۇزگى اڭشىلىق ماۋسىمى اشىلعانى تۋرالى حابارلاعانبىز