پاۆلوداردا ۆەنگريا ەلشىلىگىنىڭ وكىلدىگى اشىلدى
پاۆلودار. KAZINFORM - وكىلدىك پاۆلودار، اباي جانە شىعىس قازاقستان وڭىرلەرى ءۇشىن قىزمەت كورسەتەدى. ونىڭ اشىلۋىنا ۆەنگريانىڭ ەلىمىزدەگى توتەنشە جانە وكىلەتتى ەلشىسى وتتو يۆان رونا قاتىستى.
قازاقستان مەن ۆەنگريا - سەرىكتەس ەلدەر. قوس مەملەكەت اراسىنداعى ىقپالداستىق وڭ تۇرعىدا دامىپ كەلەدى. سوڭعى جىلدارى ساۋدا- ەكونوميكالىق اينالىم، مادەنيەت پەن ءبىلىم-اعارتۋ بايلانىسى جاقسى قارقىن العان. وبلىس ورتالىعىندا اشىلعان ەلشىلىك وكىلدىگى ىنتىماقتاستىقتىڭ الەۋەتىن ارتتىرا تۇسپەك.
«قازىرگى ۋاقىتتا ءبىزدىڭ مەملەكەتتىڭ قازاقستان بويىنشا 5 قالادا قۇرمەتتى كونسۋلى بار. پاۆلوداردا اشىلعان وكىلدىك شىعىس قازاقستان، اباي جانە پاۆلودار وبلىستارىن قامتيدى دەپ جوسپارلانعان. ەكى ەل اراسىنداعى ارىپتەستىك دامىپ كەلەدى. بۇل ءبىزدى ايرىقشا قۋانتىپ وتىر. ۆەنگريالىق ديپلوماتيا جەرگىلىكتى كاسىپكەرلەر ءۇشىن ءتيىمدى بولاتىنى ءسوزسىز»، - دەپ اتاپ ءوتتى ۆەنگريانىڭ ەلىمىزدەگى توتەنشە جانە وكىلەتتى ەلشىسى وتتو يۆان رونا.
اۆتور
مۇرات اياعان
