پاۆلوداردا كىسى ءولتىرىپ، 13 جىل بويى قاشىپ جۇرگەن قىلمىسكەر ۇستالدى
استانا. KAZINFORM - جىل باسىنان بەرى ىشكى ىستەر مينيسترلىگىنىڭ جەدەل قىزمەتتەرى ىزدەۋدە جۇرگەن 300 دەن استام قىلمىسكەردى ۇستادى، سونداي-اق حابار-وشارسىز كەتكەن 200 دەن استام ادام تابىلدى، دەپ حابارلايدى Polisia.kz.
- ماسەلەن، پاۆلودار وبلىسىنىڭ كەنتتەرىنىڭ بىرىندە جەدەل-ىزدەستىرۋ شارالارىن جۇرگىزۋ كەزىندە پاۆلودارلىق تۇرعىندى اتىس قارۋىمەن اتىپ ولتىرگەنى ءۇشىن 2011 -جىلدان بەرى حالىقارالىق ىزدەۋدە جۇرگەن دانات باكيبايەۆ ۇستالدى.
الماتى وبلىسىندا سابىرجان ماساحبايەۆ ۇستالدى. ول 2023 -جىلدىڭ اياعىندا الماتىدا توپ قۇرامىندا بولا وتىرىپ، الدىن الا ءسوز بايلاسۋ ارقىلى سينگاپۋر ازاماتىنا شابۋىل جاساپ، 3 ميلليون تەڭگە مەن 13 مىڭ ا ق ش دوللارىنان استام اقشاسىن تارتىپ العان. ۇستالعان ادامنىڭ سىبايلاستارى بۇرىن قۇرىقتالعان.
تۇركىستان وبلىسىندا پوليتسيا 10 جىل بويى حالىقارالىق ىزدەۋدە جۇرگەن وزبەكستان ازاماتى جامشيد احمەدوۆتى ۇستادى. شەتەلدىك سارىاعاش اۋدانىنداعى «جىبەك جولى» شەكارا بەكەتىندە شەكارادان ءوتۋ كەزىندە قاماۋعا الىندى. ەر ادام 2014 -جىلدان بەرى رەسەي فەدەراتسياسىنىڭ يركۋتسك قالاسىندا كىسى ولتىرگەنى ءۇشىن ىزدەۋدە بولعان.
ءى ءى م جەدەل بولىنىستەرىنىڭ قىزمەتكەرلەرى شىمكەنتتە كورشى مەملەكەتتىڭ قۇقىق قورعاۋشىلارى الاياقتىق جاساعانى ءۇشىن ىزدەپ جاتقان تاعى ءبىر وزبەكستاندىق مارۋفجون جۋرايەۆتى ۇستادى، - دەدى ق ر ءى ءى م كريمينالدىق پوليتسيا دەپارتامەنتى باسقارما باستىعىنىڭ ورىنباسارى جانگەلدى تابيلوۆ.
ايتا كەتۋ كەرەك، ىشكى ىستەر ورگاندارى جۇرگىزەتىن ىزدەستىرۋ جۇمىستارى جاسالعان قىلمىس ءۇشىن جازانىڭ بۇلتارتپاستىعىن قامتاماسىز ەتۋدى كوزدەيدى.
