پاۆلودار وبلىسىندا رەكوردتىق استىق جينالدى

استانا. قازاقپارات - بيىل وبلىستاعى ەگىس القاپتارىنىڭ جالپى اۋماعى 1 ميلليون 406,2 مىڭ گەكتار بولدى. پاۆلودار وبلىسىنىڭ ديقاندارى استىقتى ءداندى داقىلدار بويىنشا بيىل تاعى رەكوردتىق ونىمگە قول جەتكىزدى. وڭىردە 1 ميلليون 116 مىڭ توننا استىق قامبالارعا قۇيىلىپ جاتىر.

پاۆلودار وبلىسىنىڭ ەگىس دالالارىندا قازىرگى ۋاقىتتا مايلى داقىلدان وزگە داقىلداردىڭ بارلىعى جينالدى. فەرمەرلەر ءۇشىن جيىن-تەرىم ناۋقانى تابىستى ءوتىپ، رەكوردتىق ونىمدەر الىندى.

وڭىرلىك اۋىل شارۋاشىلىعى باسقارماسىنىڭ ءبولىم باسشىسى ەسەنتاي ءمۇرسالىموۆتىڭ دەرەگىنشە، بيىل وبلىستاعى ەگىس القاپتارىنىڭ جالپى اۋماعى 1 ميلليون 406,2 مىڭ گەكتار بولدى. بۇل وتكەن جىلمەن سالىستىرعاندا 165,5 مىڭ گەكتارعا كوپ.

- اۋىل شارۋاشىلىعى تاۋارلارىن وندىرۋشىلەرىمىز جيىن-تەرىم ناتيجەسىندە 1 ميلليون 116 مىڭ توننا استىق جيناعانى ءمالىم بولدى. سوڭعى رەت ءبىزدىڭ وڭىردە 2022 -جىلى 1 ميلليون 25 مىڭ توننا استىق الىنعان ەدى. سوندىقتان بيىلعى كورسەتكىش رەكوردتىق ءونىم بولىپ وتىر. ءداندى داقىلدار بويىنشا بارلىق ءونىمنىڭ 289,5 مىڭ تونناسىن نەمەسە 26 پايىزىن ەرتىس اۋدانى بەرىپ وتىر. جالپى بۇل اۋدانداعى استىق ونىمدىلىگى بيىل اسا بەرەكەلى بولدى. وبلىستا استىقتىڭ ورتاشا ونىمدىلىگى 12 تسەنتنەردى قۇراسا، ەرتىستە 12,7 بولدى. ال ارپا، تارى، قاراقۇمىق بويىنشا دا ولار العا وزدى، - دەيدى ەسەنتاي ءمۇرسالىموۆ.

بيىل وبلىستا 769 مىڭ توننا كارتوپ جينالعان. ورتاشا ونىمدىلىك - گەكتارىنان 310 سەنتنەر.