پاۆلودار اليۋميني زاۋىتىندا جازاتايىم وقيعا بولدى
استانا. KAZINFORM -«قازاقستان اليۋميني» ا ق گيدرومەتاللۋرگيالىق سەحىندا جۇمىس كەزىندە ەكى جۇمىسشىعا ءسىلتىلى ەرىتىندى تيگەن. ولاردىڭ ءبىرى جانساقتاۋ بولىمىندە جاتىر.
وقيعا 15-تامىزعا قاراعان ءتۇنى بولعان.
«زارداپ شەككەندەر قالالىق اۋرۋحانانىڭ كۇيىك بولىمىنە جەتكىزىلدى. ولاردىڭ ءبىرى جالپى پالاتادا ەمدەلسە، ەكىنشى قىزمەتكەر جانساقتاۋ بولىمىندە جاتىر. زارداپ شەككەندەرگە بارلىق قاجەتتى كومەك كورسەتىلۋدە. كاسىپورىن قاجەتتى ءدارى- دارمەكتەر ساتىپ الدى، جانساقتاۋ بولىمىندەگى قىزمەتكەرگە كۇيىككە قارسى توسەك ساتىپ الىندى، ول بولىمدە قالادى»، - دەپ ءتۇسىندىردى اليۋميني زاۋىتىندا.
وقيعا تۋرالى ءتيىستى ورگاندارعا حابارلانىپ، تەرگەۋ امالدارى جۇرگىزىلۋدە. وبلىستىق دەنساۋلىق ساقتاۋ باسقارماسى ناۋقاستاردىڭ جاعدايى تۋرالى كەيىنىرەك حابارلاۋعا ۋادە بەردى.
ەسكە سالا كەتسەك، 2024 -جىلدىڭ مامىر ايىندا اقسۋ فەرروقورىتپا زاۋىتىندا بولعان ءورت كەزىندە ەكى كرانشى زارداپ شەكتى: ىستىق مەتالى بار ءشومىش سۋدىڭ شۇڭقىرىنا ءتۇسىپ، مەتالل اعىلىپ، سالدارىنان ەكى كران ورتەندى. زارداپ شەككەندەردىڭ ءبىرى العان جاراقاتتارىنان كوماعا ءتۇسىپ، كەيىن قايتىس بولدى. كەيىن ەڭبەك باسقارماسى كاسىپورىننىڭ كىناسى 100 پايىز دالەلدەنگەنىن حابارلادى.
