«التىن ىزدەگەن»: جەتىسۋ وبلىسىندا بىرەۋلەر جەردى ويدىم-ويدىم قازىپ كەتكەن
استانا. KAZINFORM - جەتىسۋ وبلىسى اقسۋ اۋدانى سۋىقساي اۋىلىنان 25 شاقىرىم جەردە تەرەڭدىگى 2 مەتردەن اساتىن شۇڭقىرلار پايدا بولعان.
تۇرعىنداردىڭ ايتۋىنشا، 2-3 -جىلدان بەرى قازبا بايلىق ىزدەگەندەر ويدى دا، قىردى دا قوپارىپ تاستاعان. جۇرت جايلاۋعا شىعاتىن سايدى قازىپ، تاس الاتىن زاڭسىز كاسىپكەرلەردىڭ جۇمىسىنا قارسى. سونىڭ كەسىرىنەن مال جاياتىن جەر ويدىم-ويدىم بولىپ قالعان.
«مىنا جەردە ەل مال شارۋاشىلىعىمەن، ەگىنشىلىكپەن اينالىسادى. كەلەشەك بالالارىمىزعا قالاتىن جەر عوي. ەشكىمنەن رۇقسات سۇراماعان. ويىنا كەلگەندەرىن ىستەپ جاتىر. ءبىزدىڭ تابيعاتىمىزدى ءبۇلدىرىپ، جەرىمىزدى قازىپ كەتكەندەرى دۇرىس ەمەس»، - دەدى سۋىقساي اۋىلىنىڭ تۇرعىنى عالىمجان مەرەكەنوۆ.
حالىق ءتيىستى مەكەمەلەردىڭ وسى ماسەلەگە قاتىسى بار ما دەپ كۇدىكتەنەدى. ويتكەنى تاۋ-تاستى قوپارىپ، قازبا ىزدەگەندەرگە بىرنەشە جىلدان بەرى توسقاۋىل بولماعان كورىنەدى.
«مىنا اڭگىمە ۇزارىپ بارا جاتىر، توقتاتۋ كەرەك. ءبىرىنشى جىل ەمەس، ءبارى ءبىلىپ وتىر. قازىرگى اكىمنىڭ الدىنداعى باسشى كەزىندە باستالعان. توقتاتۋ كەرەك، باقىلاۋ جاسايتىن ەتەتىن ورگان بار ما ءوزى؟ !» - دەدى اۋىل تۇرعىنى سايلاۋ سەكسەنبايەۆ.
جينالعان جۇرتتىڭ الدىنا اۋدان اكىمىنىڭ ورىنباسارى دا كەلدى.
«ەندى قۇقىق قورعاۋ ورگاندارىنا تاپسىرامىز، تۇرعىندار تىلەگى ەسكەرىلەدى. بۇل جەردەگى جۇمىس ىستەپ جاتقانداردىڭ ءبارى زاڭسىز. بىزدەن دە، باسقا ورگانداردان دا رۇقسات الىنباعان. ءبىز حاباردار بولعانىمىزعا، مىنە، 2-3 كۇن عانا بولدى. ەشكىم ايتقان جوق»، - دەيدى اقسۋ اۋدانى اكىمىنىڭ ورىنباسارى اماندوس سابىربايەۆ.
3 جىلدان بەرى اۋىل ماڭىن قوپارىپ، قازىپ، التىن تاۋىپ جۇرگەندەردىڭ بارلىعىن جەرگىلىكتى اكىمدىك بىلمەسە دە، سۋىقسايلىقتار جاقسى بىلەدى. ەگەر مۇنىمەن زاڭسىز ءىس بىتپەسە، تۇرعىندار جوعارى ينستانتسيالارعا شاعىمدانامىز دەپ وتىر.
