«التىن قالام-2024» ادەبي بايقاۋىنىڭ جەڭىمپازدارى انىقتالدى
استانا. KAZINFORM — الماتى قالاسىنداعى ىقىلاس دۇكەن ۇلى اتىنداعى حالىق مۋزىكالىق اسپاپتار مۋزەيىندە «التىن قالام» ادەبي بايقاۋىنىڭ قورىتىندىسى جاريالاندى.
بيىل ادەبي ورتادا تانىمال «التىن قالام» جۇلدەسىنىڭ باستاۋ العانىنا 15 جىل تولىپ وتىر. ايتۋلى داتاعا وراي ۇيىمداستىرۋشىلار ارادا ءۇش جىل ۇزىلىستەن كەيىن جاڭا ماۋسىمىن قايتا جاريالادى.
ەلىمىزدىڭ جاس دارىندارى جانە جاڭا ەسىمدەرىن قالىڭ جۇرتقا تانىستىرۋعا سەپتىگىن تيگىزىپ كەلە جاتقان «التىن قالام» ادەبي بايقاۋى نۇرلان سماعۇلوۆ قورىنىڭ قولداۋىمەن ءوتتى. سونىمەن قاتار، جوبانىڭ باس اقپاراتتىق سەرىكتەسى «رۋسسكوە راديو» جانە قازاقستان باسپا ءسوز كلۋبى، «ك ت ك»، «31-تەلەارنا»، «Almaty.tv»، «مەلومان» ساۋدا جەلىسى، «ساپالى قازاقستان» پورتالى، «Qamshy.kz» اقپارات اگەنتتىگى، «Massaget.kz» جاستار پورتالى، «ايقىن»، «جاس الاش» باسىلىمدارى اقپاراتتىق قولداۋ كورسەتتى.
— مەملەكەت باسشىسى: «كىتاپ وقۋ — رۋحاني كەمەلدەنۋدىڭ كوزى. قازىرگى ۋاقىت — سەكۋند سايىن جاڭارعان اقپارات زامانى. التىن ۋاقىتىمىزدى پايدالى ىستەرگە جۇمساعانىمىز ءجون»، — دەپ كوپشىلىكتى كىتاپ وقۋعا ىنتالاندىرۋ كەرەك ەكەنىن سونداي-اق، قازاق ءتىلىن دامىتۋ ءارقاشان مەملەكەتتىك ساياساتتىڭ باسىم باعىتى بولىپ قالا بەرەتىنىن اتاپ وتكەن ەدى. «التىن قالام» ادەبي بايقاۋى بۇل باستامانى بارىنشا قولدايدى. سوندىقتان بيىل ءبىز قازاق ءتىلدى اۆتورلاردىڭ شىعارمالارىن كوپكە تانىستىرۋدى ءجون كوردىك. ونەردىڭ ىشىندەگى ەڭ ءبىر ءقادىرلى دە قاسيەتتىسى — كوركەم ادەبيەت. قازاق ادەبيەتىنىڭ تۇعىرىن بيىكتەتە تۇسەتىن وسىنداي ىزگى شارالار كوبەيە بەرسىن، — دەيدى ادەبي بايقاۋدى ۇيىمداستىرۋشىلاردىڭ ءبىرى كەنجە جۇمان ۇلى.
مەرەيلى داتاعا تۇسپا- تۇس كەلگەن بيىلعى «التىن قالام» بايقاۋىنا 115 اۆتوردان 202 شىعارما كەلىپ تۇسكەن. ءوز كەزەگىندە وقىرماندار وزىنە ۇناعان جۇمىسقا ونلاين تۇردە داۋىس بەردى. بايقاۋدا كەلەسى نوميناتسيالار بويىنشا ادەبي تۋىندىلار ىرىكتەلىپ، ۇزدىك جەڭىمپازدار انىقتالدى:
1. جىلدىڭ ۇزدىك بالالار شىعارماسى — نۇربەك نۇرجان ۇلى؛
2. جىلدىڭ ۇزدىك پوەزياسى — التىنبەك مەرسادىق؛
3. جىلدىڭ ۇزدىك پروزاسى — بەكەن ىبىرايىم؛
4. جىلدىڭ ۇزدىك ساتيراسى — اسحات ومىربايەۆ؛
5. جىلدىڭ ۇزدىك فانتاستيكا جانە دەتەكتيۆ شىعارماسى — باقىت جاماليەۆا؛
6. جىلدىڭ ۇزدىك كينوستسەنارييى جانە دراماتۋرگياسى — شاريديار ءۋاليحانوۆ.
بايقاۋ ناتيجەسى بويىنشا ۇيىمداستىرۋشىلار جەڭىمپاز اتانعان ۇزدىكتەردىڭ ۇزدىگىنە ەستەلىك جانە اقشالاي سىيلىقتار تابىستادى. جەڭىمپازدار اراسىنان 1000000 تەڭگەلىك باس جۇلدەنى «ۋران كەنىشى» اتتى تۋىندىسى ءۇشىن بەكەن ىبىرايىم يەلەندى.
فوتو: بايقاۋ ۇيىمداستىرۋشىلارىنان
— قازىرگى جاعدايدا قالامگەرلەردىڭ شىعارماشىلىعىن ىنتالاندىرىپ، ءتۇرلى تۋىندىلاردىڭ ساپاسى مەن دەڭگەيىن ىرىكتەيتىن وسىنداي بايقاۋلار مىندەتتى تۇردە قاجەت. بۇل بايقاۋدىڭ تاعى ءبىر ەرەكشەلىگى كوپشىلىككە بەلگىسىز جاس جازۋشىلاردىڭ اتىن شىعارىپ، ولارعا مەتاريالدىق جانە مورالدىق قولداۋ كورسەتۋىندە. سوندىقتان دا ءبىز «التىن قالام» بايقاۋىنىڭ ۇيىمداستىرۋشالارى مەن قولداۋشىلارىنا العىسىمىزدى جەتكىزەمىز، — دەدى بايقاۋ لاۋرەاتى بەكەن ىبىرايىم.
بۇعان قوسا، جىل سوڭىندا قاتىسۋشىلاردىڭ ۇزدىك ادەبي شىعارمالارى جەكە جيناق تۇرىندە باسىلىپ شىعارىلاتىن بولادى.
وسى ورايدا شاراعا قولداۋ بىلدىرگەن نۇرلان سماعۇلوۆ قورىنىڭ ديرەكتورى ايدىن سۇلتانوۆ كىتاپ بۇل رۋحاني بايلىقتىڭ كىلتى ەكەنىن ايتتى.
— كىتاپ وقىعان ادام ءبىلىم كوكجيەگى كەڭ، ءتىلى باي، مادەنيەتتى، جان-جاقتى جانە پىكىرىن ەركىن جەتكىزە الىتىنى بەلگىلى. جالپى جاقسى كىتاپ وقۋ ومىردە جەكە تۇلعا بولىپ قالىپتاسۋعا كومەكتەسەدى. سوندىقتان دا ءبىز وسى باعىتتاعى «التىن قالام» سەكىلدى مادەني-اعارتۋشىلىق باستامالاردى قاشاندا قولدايمىز، — دەدى ول.
فوتو: بايقاۋ ۇيىمداستىرۋشىلارىنان
ايتا كەتۋ كەرەك، «التىن قالام» — ۇسىنىلعان تۋىندىلارعا تاعايىندالعان قازىلار ەمەس، وقىرمان قاۋىم وزدەرى تىكەلەي باعا بەرە الاتىن قازاقستانداعى العاشقى ادەبي جۇلدە. ءۇش ايعا سوزىلعان داۋىس بەرۋ قورىتىندىسىنا ساي ءار اتالىم بويىنشا التى شىعارما تاڭداپ الىنىپ، وقىرماندار تاراپىنان ەڭ كوپ ۇپاي جيناعان شىعارمالار جانە قازىلار نازارىنا ىلىنگەن تۋىندىلار سايىستىڭ ەكىنشى كەزەڭىنە وتەدى. اقتىق ىرىكتەۋ ساتىسىندا قازىلار القاسى ءاربىر نوميناتسيا بويىنشا جەڭىمپازداردى جاسىرىن داۋىس بەرۋ ارقىلى انىقتايدى. سايىس بارىسىندا ادەبي شىعارمالاردىڭ اۆتورلارى كورسەتىلمەيدى. قازاق ادەبيەتىنىڭ بۇگىنى مەن بولاشاعىنا بەيجاي قارامايتىن ازاماتتار باستاپ ۇيىمداستىرعان «التىن قالام» ادەبي بايگەسى 2009-جىلدان بەرى وتكىزىلىپ كەلەدى.
بۇعان دەيىن پرەزيدەنتتىك ادەبي سىيلىققا ەندى 35 جاسقا دەيىنگىلەر ءوتىنىش بەرە الاتىنى حابارلاندى.
