الەۋمەتتىك جەلىدە ءدىني مازمۇنداعى سۋرەت جۇكتەگەن اتىراۋ تۇرعىنىنا ايىپپۇل سالىندى

 اتىراۋ. KAZINFORM - اتىراۋلىق ايەل الەۋمەتتىك جەلىدەگى پاراقشاسىنا ءدىني مازمۇنداعى سۋرەتتى جۇكتەگەن. ونىڭ بۇل ارەكەتى ءدىني قىزمەت جانە ءدىني بىرلەستىكتەر تۋرالى زاڭناماعا قايشى ەكەنى انىقتالعان.

اتىراۋ قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان سوتىندا ەلىمىزدەگى ءدىني قىزمەت جانە ءدىني بىرلەستىكتەر تۋرالى زاڭنامانى بۇزعان ايەلگە قاتىستى ءىس قارالدى. «ۆ كونتاكتە» الەۋمەتتىك جەلىسىن قولدانۋشىنىڭ بۇل ارەكەتى ق ر اكىمشىلىك قۇقىق بۇزۋشىلىق تۋرالى كودەكسىنىڭ 490-بابىنىڭ 1-بولىگىنىڭ 3-تارماعىمەن سارالانعان.

«سوتتا انىقتالعانداي، ازاماتشا ا. «ۆ كونتاكتە» الەۋمەتتىك جەلىسىندەگى جەكە پاراقشاسىنا ءدىني مازمۇنداعى سۋرەت جۇكتەپ، اشىق تۇردە ورنالاستىرعان. ا. -نىڭ كىناسى سوت وتىرىسىندا زەرتتەلگەن ءىس ماتەريالدارىمەن، اكىمشىلىك قۇقىق بۇزۋشىلىق تۋرالى حاتتامامەن، مامان قورىتىندىسىمەن، ساۋالناما حاتتاماسىمەن راستالدى. سوت قاۋلىسىمەن ا. اكىمشىلىك قۇقىق بۇزۋشىلىق جاساعانى ءۇشىن كىنالى دەپ تانىلدى. وعان قىزمەتىن ءۇش اي مەرزىمگە توقتاتا تۇرىپ، 129 مىڭ 220 تەڭگە مولشەرىندە اكىمشىلىك ايىپپۇل سالىندى»، - دەپ حابارلادى وبلىستىق سوتتىڭ باسپا ءسوز قىزمەتى.

سوت قاۋلىسى زاڭدى كۇشىنە ەندى.

ەسكە سالا كەتەلىك، بۇعان دەيىن اتىراۋدا قارجى پيراميداسىن قۇرعان زەينەتكەرگە سوت ۇكىمى شىققانىن جازعان بولاتىنبىز.