الەمدىك رەكورد تىركەلدى: الماتى وبلىسىندا 1000 تۇيەدەن قۇرالعان كەرۋەن ءجۇرىپ ءوتتى
قونايەۆ. KAZINFORM - الەمدەگى ەڭ ۇلكەن تۇيە كەرۋەنى الماتى وبلىسى ىلە اۋدانىنىڭ كۇرتى اۋىلدىق وكرۋگىندە ءجۇرىپ ءوتتى.
كەرۋەن قۇرامىنا 1000 تۇيە ەنگىزىلىپ، ولار ارنايى دايىندالعان 1 شاقىرىمدىق جولدى ءجۇرىپ ءوتتى. بۇعان دەيىنگى الەمدىك رەكورد 2022 -جىلى قىتايدا تىركەلگەن بولاتىن. ول كەزدە تەك 365 تۇيە قاتىسقان ەدى. قازاقستان بۇل جەتىستىكتى ءۇش ەسەدەن استام ارتتىرىپ، الەم نازارىن وزىنە اۋداردى.
ءىس- شاراعا انگليادان ارنايى كەلگەن گيننەستىڭ رەكوردتار كىتابىنىڭ وكىلى ريچارد ستەننينگ قاتىسىپ، كەرۋەننىڭ ءار قيمىلىن قاتاڭ باقىلاپ وتىردى.
- مەن مۇنداي كولەمدەگى تۇيە كەرۋەنىن ءبىرىنشى رەت كورىپ وتىرمىن. قازاقستاننىڭ بۇل جەتىستىگى تەك ۇلتتىق مادەني مۇرا عانا ەمەس، بۇكىل الەمدىك قازىنا رەتىندە باعالانۋى ءتيىس، - دەدى ول جەتىستىك تىركەلگەن ساتتە.
ءىس- شارا بارىسىندا ۇلتتىق ناقىشتاعى 5 كيىز ءۇي تىگىلىپ، قوناقتارعا ءداستۇرلى تاعامدار ۇسىنىلدى. ارنايى فۋدكورت ايماعى جۇمىس ىستەدى. سونىمەن قاتار بەلگىلى ەسترادا جۇلدىزدارى مەن وڭىر ونەرپازدارى قاتىسقان كونتسەرتتىك باعدارلاما ۇيىمداستىرىلدى.
كەرۋەننىڭ قاۋىپسىز ءارى ۇيىمداسقان تۇردە وتۋىنە ەرەكشە ءمان بەرىلدى. پاترۋلدىك پوليسيا قىزمەتكەرلەرى، ءورت ءسوندىرۋ تەحنيكاسى، مەديتسينالىق قىزمەت جانە ۆەتەرينارلىق باقىلاۋ تولىق قامتاماسىز ەتىلدى. قوعامدىق ءتارتىپتى ساقتاۋ ءۇشىن تۋرنيكەتتەر ورناتىلىپ، كورەرمەندەردىڭ كەرۋەنگە جاقىنداۋىنا شەكتەۋ قويىلدى.
بۇل باستاما الماتى وبلىسى اكىمدىگىنىڭ قولداۋىمەن جانە ءوڭىردىڭ ءىرى شارۋاشىلىقتارىنىڭ ءبىرى - «داۋلەت- بەكەت» كومپانياسىنىڭ جەتەكشىلىگىمەن جۇزەگە استى.
ەسكە سالايىق، بۇعان دەيىن الماتىدا قۇراق كورپە جيناۋدان الەمدىك رەكورد ورناتىلدى.
