الەمدىك رەكورد: ءبىر قولى، ءبىر اياعى جوق سپورتشى بۋراباي كولىن ءجۇزىپ ءوتتى
استانا. KAZINFORM - ەلوردا تۇرعىنى اقنازار مۋتاليپوۆ اپاتقا ۇشىراپ، ءبىر قولى مەن ءبىر اياعىنان ايىرىلعان. قازىر ول پروتەزدىڭ كومەگىمەن ءجۇرىپ-تۇرادى، دەگەنمەن جاس جىگىت تاعدىر تالكەگىنە مويىمايدى. اگەنتتىك ءتىلشىسى كوپتى جىگەرلەندىرەتىن جەرلەسىمىزبەن تىلدەسكەن ەدى.
26 جاستاعى اقنازار مۋتاليپوۆ قاراعاندى وبلىسىنىڭ تۋماسى. ول تۋعان جەرىندە ورتا جانە جوعارى ءبىلىم الىپ، تەمىرجولعا جۇمىسقا تۇرعان. وكىنىشكە قاراي، جاس مامان ەڭبەك جولىن باستاي بەرگەندە قايعىلى جاعدايعا تاپ بولعان.
«2018 -جىلى 5-ساۋىردە جۇمىستا تۇنگى اۋىسىمدا پويىز قاعىپ، ءبىر قولىم مەن ءبىر اياعىمنان ايىرىلدىم. جۇزۋگە كەلسەك، بالا كەزىمنەن ۇناتامىن، ءبىراق كاسىبي تۇردە اينالىسامىن دەپ ويلامادىم. قايعىلى جاعدايدان كەيىن، جۇزە الام با دەگەن وي كەلىپ، بالقاش كولىنەن باستادىم. ءجۇزۋ قولىمنان كەلگەن سوڭ، پارا سپورتقا بەت بۇردىم، كەيىن باسسەينگە جازىلىپ، جاتتىقتىرۋشىمەن كاسىبي تۇردە اينالىسۋعا كوشتىم ، - دەدى اقنازار مۋتاليپوۆ اگەنتتىك تىلشىسىنە سۇحبات بەرە وتىرىپ.
ەرەن ەڭبەك پەن توگىلگەن تەر ناتيجەسىن كوپ كۇتتىرمەدى. اقنازار بيىل ناۋرىزدا تاراز قالاسىندا وتكەن 400 مەترگە ەركىن جۇزۋدەن جارىس جەڭىمپازى اتاندى.
«سودان سوڭ الدىما بۋراباي كولىن ءجۇزىپ ءوتۋ ماقساتىن قويدىم. باسسەيندە كۇندەلىكتى ءجۇزىپ، دايىندىقتى جالعاستىردىم. سونداي- اق، كارتادان كولدىڭ ۇزىندىعىن قاراسام، شاشامەن 2 شاقىرىم بولىپ كورىندى، ءبىراق، ءجۇزىپ وتكەن سوڭ 2,5 شاقىرىم بولىپ شىقتى. ماقساتىما جەتتىم، ارينە قاسىمدا جاتتىقتىرۋشىم بولدى»، - دەيدى ول.
جەرلەسىمىزدىڭ ەندىگى ارمانى جەكە جەڭىسىن گيننەستىڭ رەكوردتار كىتابىنا ەنگىزۋ.
«گيننەستىڭ رەسمي سايتىنا كىرىپ، زەردەلەپ شىقتىم، ءبىر قولى مەن ءبىر اياعى جوق جاندار اراسىندا مۇنداي قاشىقتىقتا ءالى ەشكىم ءجۇزىپ وتپەگەن. ءوز رەكوردىمدى گيننەسكە ەنگىزگىم كەلەدى، ءبىراق، ءبارى قارجىعا كەلىپ تىرەلەدى، قولداۋ كەرەك. سول ءۇشىن قازىر دەمەۋشى ىزدەپ جاتىرمىن. ال بۋرابايدى تاڭداعان سەبەبىم، بۇيىرسا، گيننەس رەكوردتار كىتابىنا ەنۋگە ءوتىنىم بەرسەك، ونىڭ وكىلدەرى بۋرابايعا كەلىپ، ءوز كوزدەرىمەن كورۋى كەرەك. وسى ورايدا مەن ءبىر وقپەن، ەكى قوياندى اتقىم كەلىم وتىر. ءبىر جاعىنان رەكورد ورناتۋ، ەكىنشى جاعىنان تابيعاتى اسەم بۋرابايدى الەمدىك دەڭگەيدە تانىتا ءتۇسۋ. ءوزىڭىز ويلاڭىز، گيننەس رەكوردتار كىتابىنىڭ Facebook پاراقشاسىندا 40 ميلليون، ال Instagram جەلىسىندە 10 ميلليون وقىرمان بار»، - دەيدى پارا ءجۇزۋشى.
وتانداسىمىزدىڭ الداعى ۋاقىتتا پارا جۇزۋدەن رەسپۋبليكالىق جانە حالىقارالىق جارىستارعا قاتىسىپ، باسقا دا وزەندەردى ءجۇزىپ ءوتۋ جوسپارى بار.
سونداي-اق، اقنازاردان ادامداردى جىگەرلەندىرەتىن كەڭەس سۇراعان ەدىك.
«ادام ەڭ الدىمەن وزىنە ۇنايتىن ىسپەن اينالىسۋى كەرەك دەپ ويلايمىن. سونىمەن قاتار الدىنا ماقسات قويىپ، سوعان جەتۋ جولىندا ەڭبەكتەنۋى ءتيىس. كەز كەلگەن ىسپەن شىن نيەتپەن اينالىسقان جاعدايدا، ماقساتقا جەتەسىز»، - دەيدى جاس جەرلەسىمىز.
اۆتور
داۋلەت ىزتىلەۋ
