الەمدىك فۋتبول جۇلدىزدارى حولاند پەن ەدەگور الماتىعا كەلدى
استانا. KAZINFORM - ەرتەڭ، 6-قىركۇيەكتە الماتىدا UEFA ۇلتتار ليگاسىندا قازاقستان مەن نورۆەگيا قۇرامالارى شەبەرلىك بايقاسادى.
وسىعان وراي نورۆەگيا قۇراماسى باسپا ءسوز ءماسليحاتىندا جۋرناليستەر ساۋالىنا جاۋاپ بەرىپ، ورتالىق ستاديوندا العاشقى دايىندىعىن جۇرگىزدى.
الماتىعا كەلگەن نورۆەگيا قۇراماسى ساپىندا ەرلينگ حولاند جانە مارتين ەدەگور سەكىلدى الەم فۋتبولىنىڭ جۇلدىزدارى بار.
«جول وتە كۇردەلى بولدى. ءبىز قۇراماداعى بارلىق ويىنشىنى الىپ كەلدىك. ءبىز قازاقستان قۇراماسىنداعى ءار فۋتبولشىنى جاقسى بىلەمىز. ولار دانيا مەن فينليانديانى جەڭدى. ءبىز بۇل ويىنداردى كوردىك جانە بۇرىنعى جانە قازىرگى باپكەرلەردى سالىستىردىق. سونداي-اق «سيلكەبورگ» ساپىندا رامازان ورازوۆتىڭ وينايتىنىن بىلەمىز. ءبىزدىڭ توپتاعى قۇرامالاردىڭ بارلىعى دەڭگەيلەس. ءاربىرى ءبىر- بىرىنەن ۇپاي ولجالاۋى مۇمكىن. الداعى ماقساتىمىز - الەم چەمپيوناتى مەن ەۋروپا چەمپيوناتىنىڭ فينالدىق ساتىسىنا جولداما الۋ. بۇل - ءبىزدىڭ قۇراما ءۇشىن ۇلكەن سەرپىلىس. جيىرما جىلدان بەرى ءبىز ەشقانداي دودالارعا شىعا العان جوقپىز. كەيىنگى جىلدارداعى ساتسىزدىك ءبىزدى تاڭعالدىردى»، - دەدى نورۆەگيا قۇراماسىنىڭ باس باپكەرى ستولە سولباككەن.
ال، اتالعان قۇرامانىڭ نەگىزگى ويىنشىسى مارتين ەدەگور الداعى كەزدەسۋگە دايىندىعى جونىندە ويىمەن ءبولىستى.
«ءبىز قازاقستان قۇراماسى جونىندە كوبىرەك مالىمەت الۋعا تىرىستىق. مۇنداي جۇمىس ءاربىر ويىننىڭ الدىندا جاسالادى. قارسىلاستى زەرتتەيمىز. الدىمەن ءوزىمىزدىڭ ويىنىمىز بەن مىقتى تۇسىمىزدى وي ەلەگىنەن وتكىزەمىز»، - دەدى ول.
باسپاءسوز ءماسليحاتىنان كەيىن نورۆەگيا قۇراماسى ورتالىق ستاديوننىڭ جاسىل الاڭىندا كەزەكتى ويىن الدىنداعى جاتتىعۋىن جاسادى.
ايتا كەتسەك، قازاقستان مەن نورۆەگيا قۇرامالارى 6-قىركۇيەكتە 19:00 دە الماتىنىڭ ورتالىق ستاديونىندا كەزدەسەدى.
